AYUB 10 - BALA LUK DO'

¹ Ui musam mulun. Nier kudeng apeh ét niatku.

² O Allah aleg ngukum negku. Mada' negku anun punMu museh negku.

³ petuluké Iko mekuel, pad Iko ngedat luk inau'Mu, idi meriruh ninger gayam lun luk dat?

⁴ Inanké Iko nier, mepad kudeng luk siren lemulun?

⁵ Mekamu'ké ulunMu, mepad kudeng ulun kai?

⁶ Ngudehké Iko nakap amung sala' idi datku?

⁷ Iko kali' negku na mesala', idi seburur pana' nateh miak muit negku rat Namu.

⁸ Ticu'Mu luk nemudut negku, idi nekini ticu' ineh pian ngusag negku.

⁹ Ngerawé kudeng apeh Iko nemudut negku ratnan tana' salit; pianké Iko ngareg negku mangun ku abuh?

¹⁰ Iko nemaré tueh kuan tamanku, pad ieh nenginul negku; Iko nenubu' negku bang nakan tinanku.

¹¹ Iko nenganau' bururku dengan tulang idi urat, idi nengebpu tulangku ku uang idi kubil.

¹² Iko pangeh nemaré ulun negku idi awaMu luk lutep, idi Iko nematar negku pad ui mulun.

¹³ Iamo' nekini ui kali' ruked ineh Iko inan terawé luk inalum kuanKu.

¹⁴ Iko nenier kudeng ui mesala', pad Iko ara' maré do' negku.

¹⁵ Kareb ui mesala', ui petacu inan susa' pa kiungMu, iamo' kareb ui nganau' luk matu, na samal kuanku. Ui dat niat idi migu'.

¹⁶ Kudeng ui inan sesuut do', Iko ngerada' negku mepad kudeng balang; Iko nganau' kekamen luk melalud pad ngedereh negku.

¹⁷ Iko megéi' inan adu' ratnan ui; usehMu negku iuk-iuk amé' rayeh. Iko megéi' inan adu' luk mebaruh.

¹⁸ O Allah, ngudehké Iko nenima' negku tinganak? Meluun do' ui naté kareb nateh lemulun nenier negku.

¹⁹ Idi petacu rat bang nakan tinanku amé' bang tanem mepad kudeng na tinganak.

²⁰ Naké ulunku malé mabud? Nima' negku, pad ui mawang niat segageh!

²¹ Ui malé nalan, idi na lemubed, Ui amé' inan aceh bawang luk medacem,

²² ieh ineh su luk inan dacem, lungung, idi gagau, idi acang pana' mangun ku dacem.