AYUB 1 - BALA LUK DO'

Sétan Nutun Ni Ayub

¹ Inan aceh lemulun luk ngadan Ayub, luk tudo bang bawang Us. Ieh sembayang inan Allah idi lutep maya' Neneh. Ieh ineh aceh lemulun luk pelaba do', idi luk na pian nganau' anun-anun luk dat.

² Ieh inan tudu' anak deléi idi teluh anak decur.

³ Idi teh ieh inan 7,000 dumba, 3.000 unta, 1,000 sapi', idi 500 keladai. Idi teh ieh inan pelaba ula' demulun, idi ieh aceh lemulun luk lun do' arang amung-amung lemulun luk tudo déi' pa busat aco.

⁴ Idi anak-anakneh luk deléi pelibal-pelibal nganau' irau, idi lun baken miak amé', idi ideh megéi' neteng teluh kinanakdeh luk decur ineh.

⁵ Kareb anid irau ineh pangeh, Ayub megéi' kulat muka pekak idi maré baré ku ngeligan anakneh. Ieh megéi' nganau' kudeng ineh. Ngaceku ieh ngerawé kian seburur rat arangdeh lek pangeh nenganau' sala' idi nenguyo Allah dengan na kali'.

⁶ Idi kareb aco luk inan melaikat amé' papu' Tuhan, Sétan idi arangdeh.

⁷ Kebala Tuhan neneh, “Anunké luk inau'mu?” Idi kebala Sétan, “Ui lawé-lawé luun tana'.”

⁸ Kebala Tuhan, “Kali'mu demulunKu Ayub? Luun tana' ineh, seburur pana' nateh luk lutep idi do' mepad kudeng ieh. Ieh sembayang Negku idi na pian nganau' luk dat.”

⁹ Kebala Sétan, “Miakké Ayub sembayang Namu, kudeng ieh na ngalap anun-anun rat Namu?

¹⁰ Iko pangeh nengelibung neneh idi tetek ruma'neh idi amung binawehneh pana'. Iko megéi' ngeperuan amung luk ruenneh, idi Iko nemaré neneh mula' sapi' aput bawang ineh.

¹¹ Iamo' kudeng Iko ngalap amung binawehneh, kali' rungen ieh ngediman Namu.”

¹² Kebala Tuhan inan Sétan, “Mo, amung binawehneh bang paladmu, iamo' aleg iko ngedereh ni Ayub.” Kareb ineh, idi Sétan neburo.

Anak Ayub Maté Idi Binawehneh Inusag

¹³ Idi bang aceh aco kareb anak Ayub nenganau' irau déi' ruma' kinanakdeh luk rayeh,

¹⁴ seburur lun duken nupun iné' ni Ayub, kebalaneh, “Kai uned ngeradu lati' makai sapi', idi amung keladai idi bang laman luk muneng ku lati'.

¹⁵ Idi denak-denak lun Sabian iné' mano nedeh. Idi ideh nengaté amung-amung demulunmu. Idi ui sebuleng mo' luk mulun luk maré kali' namu.”

¹⁶ Kareb nateh balaneh nepangeh, idi seburur demulunneh luk baken nacing, kebalaneh, “Dumbamu idi lun luk matar nedeh naté nekaneh ku purét. Idi ui sebuleng mo' luk mulun luk maré kali' namu.”

¹⁷ Kareb nateh balaneh nepangeh, idi teh seburur demulunneh luk baken nacing, kebalaneh, “Teluh babpat bunu' lun Kasdim nemunu' nekai, idi nengaté amung-amung demulunmu. Idi ui sebuleng mo' luk mulun luk maré kali' namu.”

¹⁸ Kareb nateh balaneh nepangeh, idi teh seburur demulunneh luk baken nacing, kebalaneh, “Idi kareb anak-anakmu uned kuman irau déi' ruma' anakmu luk rayeh,

¹⁹ idi inan aceh barui luk nacing rat su luk ali-ali, idi nemalid ruma' ineh idi amung-amungdeh naté. Idi ui sebuleng mo' luk mulun luk maré kali' namu.”

²⁰ Idi Ayub nudur idi nengerarak kuyu'neh ngaceku ieh dat niat. Idi ieh nengiki uluhneh, idi netekeradung.

²¹ Kebalaneh, “Ui tinganak lubpa idi miak maté lubpa teh. Tuhan nemaré luk amung-amung, idi nekini Ieh pangeh nengalap ineh. Do' ngadanNeh buren!”

²² Sagan tu pana' susa' ineh, na Ayub nenganau' sala' idi ngedat Allah.