AMOS 8 - BALA LUK DO'

Luk Sinier Ratnan Tayen Luk Mepanu' Ku Bua'

¹ Tuhan nengegala' luk sinierku ini. Ui nenier aceh tayen luk mepanu' ku bua'.

² Idi kebala Tuhan, “O Amos, anunké luk sirenmu?” Idi kebalaku, “Aceh tayen luk mepanu' ku bua'.” Idi kebala Tuhan negku, “Tarekneh pangeh nacing kuan pupuKu lun Israil. Idi Ui na nginuud. Kali' rungen Ui ngukum nedeh.

³ Bang aco sineh amung nani déi' ruma' raca' mangun ku tido. Iapeh-iapeh pana' inan butung. Sebuleng uni pana' nateh luk pedingeren.”

Ukum Israil

⁴ Ninger muyuh, O lun luk ngedereh nelun luk masi' idi luk pian ngesusa' nelun dat bang bawang ini.

⁵ Kebala muyuh, “Mikat tau nganét aco luk meligan pangeh, pad tau masui padé tau. Idanké Aco luk inan Mudeng mabud, pad tau miak masui dalé tau, pelé tau muyok nedeh dengan gatang luk na matu, idi ngisu' timang pad naluk nelun luk melih?

⁶ Idi dengan raga kasut, tau melih seburur lun masi' ku demulun tau. Tau masui dalé luk dat idi ngalap raga luk petap.”

⁷ Tuhan, Allah lun Israil nepebulung, “Ui na mekelupan kekamendeh luk dat.

⁸ Tana' miak meruyuh, idi amung lun luk bang bawang ineh temido. Aput tana' sigio, pad ieh medita' idi mebeneh, mepad kudeng Abpa' Nil temubu' idi melena'.

⁹ Bang aco sineh Ui nganau' aco macep kareb muned aco, idi luun tana' medacem kareb maco. Ui ini Tuhan pangeh nepebala.

¹⁰ Ui nganau' aco rayeh muyuh mepad kudeng kareb nenem nelun luk maté, pad nani muyuh mangun ku tido, idi Ui nganau' nemuyuh nacung. Muyuh mepad kudeng taman-tinan luk temido anak bulengdeh. Idi aco sineh pelaba susa' macing kekipedneh.

¹¹ “Tarekneh macing idi Ui maré lau bang tana'deh. Lemulun miak melau, baken ku ruti, idi meparing, baken ku abpa'. Iamo' ideh melau ku bala Tuhan. Ui ini Tuhan pangeh nepebala.

¹² Lemulun miak melaya' idi nalan rat pa tinueh busat aco macing pa kabing busat aco, idi rat pa busat aco macing pa acep aco. Idi iapeh-iapeh pana' ideh nakap bala ratnan Tuhan, iamo' na luk kali'deh.

¹³ Kareb ineh anak decur luk do' taga idi anak adi' deléi miak meluka' ngaceku meparing.

¹⁴ Lemulun luk pebulung ku akang Samaria, kebaladeh, ‘Ku ulun akang Dan,’ idi ‘Ku ulun akang Birsiba’ — lemulun ini miak meluka' idi na tumui.”