AMOS 7 - BALA LUK DO'

Luk Sinier Ratnan Kato

¹ Tuhan nemaré luk sinierku ini: Kareb uduh raca' pangeh piranih, idi ieh ngimun mulun baruh, idi ui nenier Tuhan mudut pelaba ula' kato.

² Bang luk sinierku ineh, ui nekali' kato ineh kuman amung luk mebata' bang bawang ineh macing mabud. Idi kebalaku, “O Tuhan, maré do' kuan pupuMu! Kudeng apehké ideh mulun, ngaceku ideh pelaba isuut idi melaya'?”

³ Idi Tuhan nenginuud, kebalaNeh, “Luk siniermu ineh na mangun.”

Luk Sinier Ratnan Apui

⁴ Tuhan nengegala' luk sinierku ini. Ui nekali' Neneh temina' ngukum pupuNeh ku apui. Idi apui ineh nengeseb abpa' rayeh luk liang tana', idi nengimun ngeseb tana' ineh pana'.

⁵ Idi kebalaku, “O Tuhan do' ugka'! Kudeng apehké pupuMu mulun? Ideh pelaba isuut idi melaya'.”

⁶ Idi Tuhan nenginuud, kebalaNeh, “Luk siniermu ini pana' na mangun.”

Luk Sinier Ratnan Batu Luk Pinier Siri

⁷ Tuhan nengegala' luk sinierku ini. Ui nekali' Neneh tuped iring aceh alad luk pangeh pinudut maya' batu luk pinier siri. Idi inan teh batu luk pinier siri bang paladNeh.

⁸ Idi kebalaNeh, “O Amos, anunké luk sirenmu?” Idi kebalaku, “Aceh batu luk pinier siri.” Idi kebalaNeh, “Siruh, Ui makai ineh pad ngegala' sala' pupuKu. Ui na nginuud. Kali' rungen Ui ngukum nedeh.

⁹ Amung su luk inan inul Isak sembayang miak uen ngusag. Amung su luk meligan déi' Israil pana' miak uen ngusag. Ui ngacing bunu' kuan tetek ruma' Raca' Yerobom.”

Amos Idi Amasia

¹⁰ Amasia, imam Baitel nemada' ni Yerebom, raca' Israil, kebalaneh, “Amos pegayam nelun Israil, sikal metueh rat namu. Bada'neh ngusag bawang ini.

¹¹ Kudeng ini balaneh, ‘Yerebom miak maté bang bunu', idi lun Israil miak tebanen.’ ”

¹² Idi kebala Amasia ni Amos, “O nabi, lemubed amé' bawang Yahuda ngalap akanmu idi mada' luk belén Tuhan su ineh.

¹³ Aleg mada' luk belén Tuhan déi' Baitel teh. Ini su luk inan raca' sembayang, idiruma' sembayang pupu ini.”

¹⁴ Idi kebala Amos, “Ui baken nabi — baken ini kekamenku. Ui ini lun matar dumba, idi teh ui ngasa' gita'.

¹⁵ Iamo' Tuhan nenawar negku ratnan kekamenku matar dumba idi nengecuk negku mada' nelun Israil kuanNeh.

¹⁶ Ngaceku ineh do' ninger bala Tuhan. Iko ngecuk negku ugka' mada' bala luk biré Tuhan ratnan lun Israil, pad ui ugka' megateh inan inul Isak ineh.

¹⁷ Ngaceku ineh, O Amasia, kebala Tuhan namu, ‘Awanmu mangun ku decur luk mesawa' bang bawang ini, idi anak-anakmu pitayen bang bunu'. Tana'mu uen mabpat idi barén kuan lun baken, idi iko sebuleng miak maté bang bawang pupu baken. Idi lun Israil miak tebanen.’ ”