AMOS 6 - BALA LUK DO'

Usag Bawang Israil

¹ Pelaba susa' kuan muyuh luk do' udeng déi' Sion, idi kuan muyuh luk mawang niat déi' Samaria — muyuh lun rayeh ratnan pupu Israil luk mebala ineh, luk inan pupu tau merapet ngalap pedengan!

² Amé' nier bawang Kalni. Idi amé' bawang Hamat luk rayeh, idi macing bawang Gat déi' bawang Pilistin. Ideh meluun do' ratnan imet Yahuda idi Israilké? Inanké tana'deh meluun rayeh ratnan tana' muyuh?

³ Muyuh nutun ngiuk aco susa', iamo' kekamen muyuh ngacing susa'.

⁴ Pelaba susa' kuan muyuh luk telubid luun pagau luk do', idi teh luun kerusi, idi kuman uang anak sapi' idi teh uang anak dumba.

⁵ Muyuh pain nganau' nani idi nateg gita mepad kudeng Daud.

⁶ Muyuh ucet ngirup abpa' anggur idi ngumau burur muyuh ku umau luk pelaba do', iamo' na muyuh mesusa' ratnan usag Israil.

⁷ Ngaceku ineh muyuh luk pun-pun tebanen. Irau idi lawé rayeh muyuh miak mabud.

⁸ Tuhan sebuleng pangeh nepebulung. Kebala Tuhan luk Melalud, “Ui megateh ku dita' niat lun Israil. Ui megateh ku ruma' raca'deh. Ui maré bawangdeh idi amung uangneh kuan bunu'deh.”

⁹ Kudeng pulu' burur deléi ketecan bang setetek ruma', amung-amungdeh miak maté.

¹⁰ Kareb pupu lun luk maté ineh amé' ngalap butungdeh pad ideh sabpen, ieh nawar lemulun luk sigapung bang ruma' ineh, kebalaneh, “Inanké butung baken?” Idi kebaladeh, “Na luk idi!” Idi kebala pupudeh ineh, “Pirud iko! Tau na miak neten ngadan Tuhan pana'.”

¹¹ Kareb Tuhan ngecuk, amung ruma' luk rayeh idi luk isuut uen ngareg.

¹² Miakké kuda upun luun batu? Miakké lemulun ngeradu abpa' rayeh ku sapi'? Iamo' muyuh nengisu' ukum luk mesiri mangun ku racun, pad luk matu mangun ku sala'.

¹³ Muyuh mawang niat ku luk na ulek, idi pebala dengan medita' niat, “Kai metueh ngaceku lalud kai sebuleng.”

¹⁴ Tuhan Allah luk Melalud ngor bala muyuh, “Ui ngecuk aceh pupu ngerieng nemuyuh lun Israil. Ieh miak ngedereh nemuyuh rat Ruan Hamat luk pa tinueh busat aco macing Raked Araba luk pa kabing busat aco.”