AMOS 5 - BALA LUK DO'

Tuhan Ngecuk Pupu Israil Uren

¹ O muyuh lun Israil ninger tidoKu ini kuan muyuh:

² Israil ineh anak luk pun mebaruh luk pangeh nebpeh idi na miak tumui teh. Ieh telubid luun tana', idi na lun pian ngiding neneh.

³ Kebala Tuhan, “Aceh bawang lun Israil! Nengeruat 1,000 lun pebunu', iamo' 100 burur mo' luk muli'; aceh bawang baken ngeruat 100 lun pebunu', iamo' 10 burur mo' luk muli'.”

⁴ Kebala Tuhan nelun Israil, “Amé' Negku, pad muyuh mulun.

⁵ Aleg amé' sembayang déi' Birsiba. Aleg nakap Negku déi' Baitel. Baitel na ulekneh. Aleg amé' Gilgal — pupu ineh miak tebanen.”

⁶ Nakap Tuhan, pad muyuh mulun. Kudeng na, Ieh miak macing mepad kudeng apui luun inul Yusup. Apui ineh miak ngeseb nelun Baitel. Seburur pana' nateh luk ngilep ineh.

⁷ Pelaba susa' kuan muyuh luk ngekilu' ukum idi mebpeng lemulun na ngalap luk petulu!

⁸ Tuhan nenganau' gituen, Puru' idi Belatik. Ieh ngisu' dacem mangun ku acang, idi aco mangun ku alem. Ieh nawar abpa' luk bang abpa' rayeh idi ngutang ineh luun tana'. NgadanNeh ineh Tuhan.

⁹ Ieh ngaté nelun luk mesangit idi ngusag libungdeh luk meraben.

¹⁰ Muyuh megateh inan lemulun luk nganau' luk mesiri idi luk mada' luk matu bang besara'.

¹¹ Muyuh nengedereh nelun masi' idi nengaro padéden. Ngaceku ineh muyuh na miak tudo bang ruma' batu luk do' luk pinudut muyuh. Idi muyuh na miak ngirup abpa', anggur ratnan kabun anggur luk do' luk tinibu muyuh.

¹² Ui kali' sala' muyuh luk pelaba rayeh, idi kinula' kekamen muyuh luk dat. Muyuh ngedereh lemulun luk do'. Muyuh ngalap suap. Idi muyuh mebpeng nelun masi' na ngalap ukum luk mesiri bang besara'.

¹³ Bang kareb luk dat ini petulu lun luk mileh pirud.

¹⁴ Nutun nganau' luk matu idi baken luk dat, pad muyuh mulun, pelé Tuhan Allah luk Melalud miak tudo arang muyuh, maya' kudeng bala muyuh.

¹⁵ Do' megateh inan luk dat, mawa ku luk do', idi mutut ukum luk mesiri bang besara'. Kian, Tuhan Allah luk Melalud miak méi' nan sebuang pupu luk ketecan ini lek.

¹⁶ Idi kebala Tuhan Allah luk Melalud, “Inan tido idi arod ku ét déi' dalan rayeh bang bawang ini. Pupu luk punang abpa' miak darin pad temido nelun maté dengan lemulun luk ngalap tabpar temido.

¹⁷ Déi' bang kabun anggur pana' inan tido, ngaceku Ui amé' ngukum nemuyuh,” kebala Tuhan.

¹⁸ Pelaba susa' kuan muyuh luk nginulat aco Tuhan ineh. Anunké ulek aco Tuhan ineh kuan muyuh? Ieh ineh aco dacem, idi baken acang.

¹⁹ Ieh ineh mepad kudeng lemulun luk buro ratnan balang idi papu' beruang, idi mepad kudeng lemulun luk muli' idi ngakem alad ruma' idi ieh tiduken menipeh!

²⁰ Aco Tuhan ngacing dacem, baken acang. Ieh ineh aco susa' dengan na luk ngacang.

²¹ “Ui megateh inan irau sembayang muyuh, Ui na tuman ku ineh!

²² Kareb muyuh nguit baré luk sabpen idi baré akan kuanKu, Ui na pian ngalap ineh. Idi Ui na pian ku pung luk melamu luk iten muyuh ku baré ubur.

²³ Aleg muyuh menani rayeh arod. Na Ui pian ku uni gita muyuh.

²⁴ Nima' ukum luk matu idi luk mesiri manud mepad kudeng abpa' luk na miak mekeket.

²⁵ “O muyuh lun Israil, ruked apat ngepulu' lak kareb muyuh tudo déi' su luk ali-ali, muyuh na nguit luk kereten idi luk barén kuanKu.

²⁶ Idi nekini muyuh miak mabeh Sakut, raca' muyuh, idi Kaiwan, akang gituen muyuh, ieh ineh akang-akang luk pinudut muyuh kuan burur muyuh sebuleng.

²⁷ Idi Ui miak naban nemuyuh lemaba Damsik,” kebala Tuhan luk titen Allah luk Melalud.