AMOS 4 - BALA LUK DO'

¹ Ninger do'-do', O muyuh decur Samaria, luk melamu mepad kudeng sapi' luk mebor, luk ngedereh lemulun luk melaya' idi lemulun luk masi', idi luk pebala inan awan muyuh, “Do' maré luk rupen!”

² Ui ini Tuhan luk meligan idi Ui pangeh nepejani', “Tarekneh macing idi muyuh miak riden ku od, pad anid burur muyuh mepad kudeng lawid luun keluit.

³ Muyuh miak iten remuat maya' song libung idi talan,” kebala Tuhan.

Israil Na Sibada'

⁴ Kebala Tuhan Allah, “O muyuh lun Israil, amé' nganau' sala' déi' Baitel idi Gilgal! Idi nguit pung luk kereten anid-anid pekak, idi babpat pulu' muyuh bang anid teluh aco.

⁵ Maré ruti muyuh ku baré ubur, idi ngedita' burur muyuh ratnan baré muyuh maya' ran niat! Ngaceku muyuh geregan ku luk kudeng ineh.

⁶ “Ui ini luk ngacing lau kuan amung bawang muyuh, pad muyuh na akan. Iamo' na muyuh lumi Negku.

⁷ Ui nemaré rikan kareb petulu inan udan kuan lati' muyuh. Ui nemaré udan bang sebuleng bawang, idi baken bang bawang baken. Sebuleng lati' inan udan, iamo' lati' baken na udan, pad ieh tekering.

⁸ Lemulun luk melaya' ku paring ratnan dueh teluh bawang iné' nakap abpa' bang bawang baken, iamo' na petap luk rupendeh. Iamo' na muyuh lumi Negku.

⁹ “Ui nemaré uled idi bangas luk nengaté padé muyuh. Kato nekuman kabun irin, anggur, gita', idi saitun muyuh. Iamo' na muyuh lumi Negku, kebala Tuhan.

¹⁰ “Ui nemaré kaca nemuyuh mepad kudeng luk biréKu ni Masir. Ui nengaté anak adi' muyuh bang bunu' idi nengaro kuda muyuh. Ui nemanu' icung muyuh ku buen butung su luk inan muyuh nelupo. Iamo' na muyuh lumi Negku,” kebala Tuhan.

¹¹ “Ui nengukum sebuang muyuh mepad kudeng Ui nengukum Sodom idi Gemora. Muyuh mepad kudeng luten luk ilap ratnan apui. Iamo' na muyuh lumi Negku,” kebala Tuhan.

¹² “Ngaceku ineh, O lun Israil, Ui ngacing ukum ini kuan muyuh. Idi ngaceku ineh, do' muyuh temina' kumin Allah!”

¹³ Allah luk nemudut pegkung idi bui. Ieh ngegala' terawéNeh kuan lemulun; idi ngisu' acang mangun ku dacem. Ieh ineh Raca' aput-aput tana'. Idi ngadanNeh ineh Tuhan Allah luk Melalud!