AMOS 3 - BALA LUK DO'

¹ O Lun Israil, do' ninger bala ini luk bila Tuhan ratnan lawé muyuh: “Ui nenguyut amung pupu muyuh remuat rat bang bawang Masir.

² Rat arang pupu bang tana' ini muyuh sebuleng mo' luk initiKu idi luk isa'Ku. Ngaceku ineh Ui ngukum nemuyuh ngaceku sala' muyuh.”

Kekamen Nabi

³ Miakké dueh burur lemulun nalan pad-pad kudeng na pegayam atun?

⁴ Miakké balang ngeku bang pulung kudeng na luk ilapneh? Miakké anak balang ngeku bang lubangneh kudeng na luk kikemneh?

⁵ Miakké suit mekaneh abpung kudeng na upanneh? Miakké abpung metamat kudeng na luk mekaneh idi?

⁶ Miakké inan kukor bang bawang kudeng na luk katot? Inanké susa' luk rayeh bang bawang kudeng Tuhan na ngacing ineh?

⁷ Tuhan na nganau' anun-anun dengan na ngegala' terawéNeh kuan demulunNeh lun nabi.

⁸ Kudeng balang ngeku, idéké luk na matot Kudeng Tuhan pebala, idéké luk tuman na mada' balaNeh?

Ukum Samaria

⁹ Mada' lemulun luk tudo bang ruma' raca' déi' Asdod idi Masir, kebala muyuh, “Do' muyuh mepamung déi' Samaria pelé muyuh nier ria' luk su ineh, idi sala' luk kikemdeh bang bawang ineh.”

¹⁰ Kebala Tuhan, “Lemulun ini manu' ruma'deh ku binaweh luk uendeh ngaro dengan kekamen luk dat. Ideh na kali' dalan luk mesiri.

¹¹ Ngaceku ineh bunu' miak ngelibut bawangdeh, idi ngusag libungdeh, idi ngaro ruma'deh.”

¹² Kebala Tuhan, “Mepad kudeng lun luk matar dumba ngalap dueh kukud idi sebuleng lalid dumba luk kinan balang, kudeng ineh teh Allah miak ngulun teceh pupu Israil luk telubid luun bitaran luk do' déi' Samaria.

¹³ Do' muyuh ninger idi mada' inul Yakub,” kebala Tuhan Allah luk Melalud.

¹⁴ “Kareb Ui ngukum pupu Israil ngaceku sala'deh, Ui ngusag amung bubpun Baitel. Lidung bubpun pana' uen nangal idi mebpeh luun tana'.

¹⁵ Ui ngusag ruma' idi lepo. Ruma' luk inayung ku batu gading miak metabpa, idi amung ruma' luk rayeh uen ngusag.”