AMOS 2 - BALA LUK DO'

Moab

¹ Kebala Tuhan, “Lun Moab megéi' nganau' sala'. Kali' rungen Ui ngukum nedeh ngaceku ideh nengeseb tulang raca' Edom mangun ku kapur.

² Ui ngacing apui kuan tana' Moab pad amung libung Keriot sabpen. Lun Moab miak maté bang bunu' uned arod lun pebunu' idi uni serupit.

³ Ui ngaté raca' Moab idi amung lun rayeh bang bawang ineh.”

Yahuda

⁴ Kebala Tuhan, “Lun Yahuda megéi' nganau' sala'. Kali' rungen Ui ngukum nedeh, ngaceku ideh situnga ku bada'Ku, idi na maya' ukumKu. Ideh rinaruh allah luk mebalih luk inan tepundeh nesembayang.

⁵ Ngaceku ineh Ui ngacing apui kuan Yahuda pad amung libung Yerusalim sabpen.”

Ukum Allah Kuan Israil

⁶ Kebala Tuhan, “Lun Israil megéi' nganau' sala'. Kali' rungen Ui ngukum nedeh, ngaceku ideh masui nelun luk na mesala' ngaceku na mayar balehdeh, idi ideh masui lun masi' luk na miak mayar raga kasut pana' mangun ku demulun.

⁷ Ideh ngeradu' nelun luk melaya' idi masut nelun masi'. Anak adi' deléi idi luk mengered pana' pasét nan decur luk mesawa' déi' ruma' sembayang nan akang, pad ngadanKu luk meligan uen ngedat.

⁸ Déi' ruma' sembayang ineh ideh telubid luun ayung luk inuit ku duduk ngaceku balehdeh. Bang Ruma' Allahdeh ideh ngirup abpa' anggur luk ilapdeh rat nelun luk pebaleh nedeh,

⁹ sagan pana' ngaceku ideh, Ui nengaté nelun Amori luk medita' mepad kudeng kayuh tumuh idi metueh mepad kudeng kayuh luk meraben. Ui nengaté nedeh amung-amung.

¹⁰ “O pupuKu, Ui nenated nemuyuh remuat rat bang bawang Masir, idi nenguyut nemuyuh déi' su luk ali-ali apat ngepulu' lak kinioneh, idi Ui nemaré tana' lun Amori nemuyuh.

¹¹ Ui nemili' sebuang anak muyuh mangun ku nabi, idi sebuang anak adi' deléi' mangun ku lun Nasiri. Naké ini matu, O pupu Israil? Ui ini Tuhan pangeh nepebala.

¹² Iamo' muyuh nengecuk nelun Nasiri ngirup abpa' anggur, idi nemebpeng nelun nabi na mada' balaKu.

¹³ Idi nekini Ui ini ngeradu' nemuyuh ieni, mepad kudeng aceh keréta luk mepanu' ku padé pana' ngeradu'.

¹⁴ Lun luk upun luk mawer pana' na mepuit. Lun luk metueh amé' melaya' idi lun pebunu' pana' na miak ngulun bururdeh.

¹⁵ Lun luk ngimet binor na miak tuped meraben, lun luk upun luk mawer na miak uen ngulun, idi lun luk maya' kuda na mepuit idi na mulun.

¹⁶ Lun pebunu' luk mekuu' buro dengan lubpa kareb aco sineh.” Tuhan pangeh nepebala.