AMOS 1 - BALA LUK DO'

¹ Ini bala Amos, seburur lun matar dumba rat arang lun Tekoa luk ngasa' dumba. Allah nengegala' bala ini ni Amos dueh lak atun ratnan ruyuh tana', kareb Usia ineh raca' Yahuda, idi Yerebom Yoas ineh raca' Israil.

² Kebala Amos, “Allah ngarod rat Pegkung Sion; idi arodNeh pedingeren rat Yerusalim, pad amung laman tekering, idi uduh luun buduk Pegkung Karmel luk mebata' amé' mesia'.”

Ukum Allah Kuan Pupu Luk Libut-Libut Israil Siria

³ Kebala Tuhan, “Lun Damsik megéi' nganau' sala'. Kali' rungen Ui ngukum nedeh, ngaceku ideh ucet ngedereh nelun Giliad.

⁴ Ui ngacing apui kuan imet Siria, pad amung libung Raca' Benhadad sabpen.

⁵ Ui mutul palin tanga' bawang Damsik idi mubuh amung lun luk ngimet Ruan Aben idi baiteden. Lun Siria miak tebanen amé' bawang Kir.”

Pilistin

⁶ Kebala Tuhan, “Lun Gasa megéi' nganau' sala'. Kali' rungen Ui ngukum nedeh, ngaceku ideh nenaban aceh pupu, pad ideh barén kuan lun Edom.

⁷ Ngaceku ineh Ui ngacing apui kuan libung Gasa pad amung libung bawang ineh sabpen.

⁸ Ui naban amung raca' luk ngimet bawang Asdod idi Askelon. Ui munu' bawang Ekron pad amung lun Pilistin luk ketecan maté.”

Sur

⁹ Kebala Tuhan, “Lun Sur megéi' nganau' sala'. Kali' rungen Ui ngukum nedeh ngaceku ideh nenaban aceh pupu amé' bawang Edom. Na ideh nemaya' jani' luk inau'deh inan kinanakdeh.

¹⁰ Ngaceku ineh Ui ngacing apui kuan libung Sur, pad amung libung bawang ineh sabpen.”

Edom

¹¹ Kebala Tuhan, “Lun Edom megéi' nganau' sala'. Kali' rungen Ui ngukum nedeh, ngaceku ideh nemunu' kinanakdeh lun Israil, idi na pian méi'. Usehdeh na ugka'.

¹² Ngaceku ineh Ui ngacing apui kuan Teman, pad amung libung Bosra sabpen.”

Amon

¹³ Kebala Tuhan, “Lun Amon megéi' nganau' sala'. Kali' rungen Ui ngukum nedeh, ngaceku ideh muer batek decur Giliad luk mali', ngaceku ideh melili ku tana'.

¹⁴ Ngaceku ineh Ui ngacing apui kuan libung Raba, pad amung libung bawang ineh sabpen. Inan arod kareb aco pebunu', idi bunu' ineh mepad kudeng barui.

¹⁵ Raca'deh miak tebanen dengan amung lun rayehneh.”