1 YAHYA 1 - BALA LUK DO'

Bala Ulun

¹ Kai ngayud ratnan Bala Ulun luk idi rat pun-pun, luk pangeh pindenger kai, luk pangeh sinier dengan mateh kai, luk pangeh tinutong kai, idi luk kikem dengan ticu' kai.

² Kareb ulun ineh pangeh ginala', kai nenier neneh, idi maré kali' idi mada' kuan muyuh ulun luk meruked, luk idi pad-pad dengan Taman idi luk pangeh ginala' kuan kai.

³ Anun-anun luk pangeh sinier idi pindenger kai, kai mada' teh kuan muyuh, pad muyuh pana' miak perurum dengan kai; setuneh rurum kai ini inan pad-pad dengan Taman idi dengan Yésus Keristus, AnakNeh ineh.

⁴ Kai ngayud amung-amung luk kudeng ini pad awang kai mangun meriput.

Allah Ineh Acang

⁵ Idi ini bada' AnakNeh luk pangeh pindenger kai rat Neneh, idi mada' kuan muyuh teh: idi Allah, Ieh ineh acang idi na tu-tu inan dacem bang Neneh.

⁶ Kudeng tau pebala tau perurum Neneh, iamo' nalan bang dacem, tau mebalih idi na nganau' luk matu.

⁷ Iamo' kudeng tau mulun bang acang, mepad kudeng Ieh pana' bang acang, idi tau perurum seburur dengan seburur, idi dara' Yésus, AnakNeh ineh, maru' netau ratnan amung-amung sala'.

⁸ Kudeng tau mala netau na sala', idi tau naluk burur tau sebuleng, idi luk matu ineh na luk idi bang netau.

⁹ Iamo' kudeng tau ngamo amung-amung sala' tau, idi Allah ineh lutep idi matu, pad Ieh maré do' ratnan amung-amung sala' tau, idi maru' netau ratnan amung-amung luk dat.

¹⁰ Kudeng tau mala netau na tu-tu nenganau' sala', idi tau mala Allah mebalih, idi balaNeh na mudeng bang netau.