Taitasi 3 - BAṈARA KO VAIRU AMA LEVELEVEO

Lotu maba o kalo avo

¹ Mai kerukerue ṉoko maba poso tu ke uria zorimou se lekasa poso ni se matuma maba poso, ni keka zariovou ereko ko uri kiadama keve kale.

² Bazuema tu seta pui ruqe kasemo ke elo maba poso, melai bule ke elou ni ke baerebaereovou, kiada keru seta ke puratikou ko akoekato sama kalo kiadama maba poso kasi.

³ Ako lulavo animeta sarubea mela, bikoirato ko maba mela, ni me jaruini mela. Animeta viluloqu me eve ni azaazama ni utube ama zoleilo me ereke. Ni me ṉamuke ko taku animeko ruqe ama iruruputo ni konoilo kale, ni se maba poso ta ke melai kaikuape anime ni animeta memai kaikuape se maba poso.

⁴ Melai so keru animevo Pakio Baṉara ko baiseo ni roquano ko purate keru,

⁵ vota o pakiemele anime. Pui kama quli uri ama anime lula me erekako kale, melai voko pakiezato sama roquano kale inio vota o pakiemele anime vo Tabu ala Auvana kale ama pusailo kale, vo o katimeleni anime vairu ama alilo ni vairu ama saevo.

⁶ Vo Baṉara ta utu puarivo o eve voa Tabu ala Auvana anime kasi vo Jisu Karisito animevo Pakio kale kude,

⁷ tu voko pakiezato sama roquano kale animeta sidopu me elou Baṉara ko kelokelozato kale ni animeta me ṉeamukou ko noqola kama saevo ko meqai zuatako.

⁸ Kota tuvevo ama bazu ikio. Aṉata aṉa zaria ṉo tu ṉota matu piza kavole ṉomai bazuekou komi quli, tu se kevai keruani vo Baṉara ta ke ereko ko uri ama iruruputo seko dikidauputo kale, koko uria tauvemo ama kiadama maba poso.

⁹ Melai taka papariovi ko sarube ama aivekinio, ni ko rosi ama koilokoilo poso ko aivekinio, ni vo Mosese ko Bazu kai ketuketuekinio. Ako koa kiadama ti utube ama ni kalo pide ama sole.

¹⁰ Katima omuqa balauvato sea maba poso seke erekani ko pitasio poso, melai so kebeta kalou ta ṉota pui mata ṉo mati lolopareovou se.

¹¹ Ṉota ṉomai nianiia soama maba poso ta lula ke vaekani nio ko tuveano, ni seko beta zio seko sarueko kale ta seta keta kuirizia ke ṉavi sole.

Tovatovama korokorotato

¹² Aṉata a joroevou vo Atimasi, ma esa vo Tikikasi ṉokasi, ni so keru vo o barolou keru ta ṉota ṉo matu madoekou kilo aṉa kasi Nikopolisi peuru kale, ako aṉata lula a bitoeka tu a baloasiko ko sarosaroro ko taku sai.

¹³ Ṉota matu madoeka tauveko voa loea, Zinasi, ni vo Apolosi, tu nioqata qo tanieko nioqako talio, tu nioqata qo korotou kiadama quli kale.

¹⁴ Mata animeko lotu qoqono poso ta ke male tu kekai nianiio tu dikidauputole uri ke ereko, tu seta ke tauvezato koa maba tuvevo ama zario poso kale, maba poso ko saevo ko korotikako, tu seta pui ke saevo utu ama saevo kale.

¹⁵ Se aṉa kasi ke evani lotu maba poso ta ke soroeka seko roquano ṉokasi. Katima eṉeko roquano eṉeko baerebaere poso se kevai oquani vo Karisito. Aṉata a vararaita tu vo Baṉara ko pakiezato sama roquano ta ko elou mea kiada mela tona. A baika.