Taitasi 1 - BAṈARA KO VAIRU AMA LEVELEVEO

¹ Aṉa Paula lala, Baṉara vo nabulu ni kala pado vo Jisu Karisito vo apositolo lala, ta a rikieka komia leta. Vo Baṉara ta o pitoele ni o soroele aṉa tu a dauveko voko maba poso ko oqu ni amai nianiiekiko se koa tuvevo ama nianiiekato, koko odiemo ama uri ama lotu saevo kale.

² Ako koa seko uri ama lotu saevo ko raki ta seta ke tuvevo pueka ko seta ke kovou ko noqola kama saevo sole. Vo tuvetuve ala Baṉara ta o mela inainaeke anime komia noqola kama saevo puliako peuru ma peuru ereilo,

³ ni koa tutututuki ama taku kale vota kasa o ikake voko bazu kale. Ko ikio koa Uri ama Bazu vo Baṉara animevo Pakio o katilema aṉa tu aqai bazubazuto.

⁴ Aṉata a rikita ṉo Taitasi ṉa kasi aṉavo maba meqora jaria laṉa vo Jisu Karisito vai oqu kale. Ni aṉata a vararaita tu vo Baṉara animevo Mama ni Jisu Karisito animevo Pakio ta o katiṉou ṉo voko pakiezato sama roquano ni bule.

Taitasi ko iruruputo Kiriti udu kale ama

⁵ Aṉata a vaeṉe ṉo Kiriti udu kale, tu ṉota ṉo uria korotikou ko pui nio ko paizaivako iruruputo, ni ṉo bitoemou se lotu tanamu peuru poso kale. Ṉota ṉo qerukeruekou aṉako bazu poso, ko eri kio sama.

⁶ Vo lotu tanala ta kuiripato pide o elou; vota o ṉeamukou omadeu pado reko, ni voko meqora poso ta kerula kamu ke elo, tu maba poso ta pui kemai kuirikou seta piru amu ni zoripato pide amu.

⁷ Ako vo lotu tanala ta o kati vaila vo Baṉara ko iruruputo sole, so inio vota maba kuiripato pide ala o elou. Vota pui o aikailou ni pui taukavole o korakorailou ni pui o vuatou ko piza kama ju tu kota sarube ko ivo vo, ni pui o niumaniumaemo se edoloma maba madu, ni pui oka zario voko koidi tu okai kovo ko takula.

⁸ Melai vota kala maba o baroekiko ala ko maba o elou ni vota o roquekou ko uri. Vota kala kaitizio ko maba o elou, ni sidopu ala, ni tabu ala, ni o uria odiziani o ṉavi.

⁹ Vota pui o vaekou koa kerula kama ni korokoroti ama lotu ko bazu. So inio vota o roveovou zuvarimo se edolomu koa tuvevo ama nianiiekato kale ni vota mata kasa o ikou ko sarueko seke tizaekani koa bazu ko.

¹⁰ Ako sai Kiriti udu kale ta kubo madu se meomeo kamu ni ke lipalipaemani se edolomu seko sarube ama nianiiekato kale sole, ni kake sea Jiu amu seke tuvevo puevani vo Jisu inio ke matu erekani koa kalo.

¹¹ Ṉota maba ṉoda ma dokolikou seko pesio, ako seta upotuqu ke ima sea pado ama saidi poso sole seko mai nianiiekiko kale ko quli ko pui ko male ama nianiiekato, seko takula ko kovo ko zario kale. Ni so kebe kava melai seta pui kekai qurata.

^12-13 Kala pado Kiriti ala maba, vo ke ṉavivo poropita o eveni, inio ota ka kasekeni koko tuveano so keru eri kiove keru, “Se Kiriti amu ta lipalipa kamu kiada keru, ni kade amu ni lupalupa kamu ni vuaṉaroṉaro amu.” Komi kale avo ṉota matu riqaema se tu seta vairu ke ikou seko oqu,

¹⁴ tu seta ke vaekou se Jiu amu ko bazubazulao ni maba ko bazu poso koko kuevako se kekai kaikuapani ko tuveano kasi azo.

¹⁵ Kiadama quli ta bulebule se bulebule amu kasi; melai pulia quli ta bulebule se sarueko ko kaqa samu kasi ni se tuvevo puto pide amu kasi, ako seko kerukeru poso ni upo nianiio poso ta lula ruqe sole.

¹⁶ Seko pesio kale ta seta kevai nianiia vo Baṉara kikela, melai seko iruruputo kale ta pui tuvevo ke ika. Seta matu kuvaruvarua melo o evani vo Baṉara, ni meomeo kamu, pui ke bokaovani ereko uri ama quli.