Romu 9 - BAṈARA KO VAIRU AMA LEVELEVEO

Baṉara ko tuvevo ama meqora poso

¹ Aṉata a qasekou ko tuvevo ama quli; tuvevo avole aṉata vo Karisito vo lala sole pui a lipalipatou. Aṉako kerukeru ta ko aveaveiva vo Tabu ala Auvana kale, ni kota tuvetuve ko ila aṉa ta aṉata pui kala lipalipa kalala.

² Aṉako upotuqu ta matu ti matuma ni aṉako bulo kale ama tola ta paito pide ama

³ se Izireli amu kale avo, se a maba dara madu! Ko roveo tauvemo se aṉako kovo vo Baṉara ko levezo ni aṉako pitasio vo Karisito kasi azo tea, aqa zario nio levezio seko kio kale avo.

⁴ Se inio vo Baṉara ko maba madu ni se inio voko meqora poso o imeni, ni omai kasa puekeni voko ṉaṉaidara kama pizato; ni se inio mata omai vikuekeni voko piza kama leveleveo poso ni o katimeni Mosese ko Bazu; ni se inio ke ṉeamukeni ko tuvevo ama ilusato ko keve; ni se inio mata vo Baṉara leveleveo oma ikeni voko pakio.

⁵ Seta se Hiburu qoqono ko taite poso ko vikuvikula kale amu inio, ni seko vikuvikula kale inio vo Baṉara o soroeveni Pakio ta o puratake. Animeta me ilusivou vo raura kala Baṉara vo o kati vailani kiadama quli latau ṉaniu ni ka ṉaniu. Emeni.

⁶ Aṉata pui eri kiala, vo Baṉara ko leveleveo ta lula peje kota eva, ako pui sea kiadama Izireli amu inio vo Baṉara ko tuvevo ama meqora poso sole.

⁷ Ni pui sea kiadamu vo Ebarahami ko vikuvikula kale amu inio vo Baṉara ko tuvevo ama meqora poso. Ako vo Baṉara ta eri kiolake Ebarahami kasi sole, “Vo Aisake kale kude inio ṉota ṉo ṉeamukou koa vikuvikula ko lula aṉa aṉa kasekema tu a qatiṉou ṉo.”

⁸ Kokale inio animeta me rovea paqumuko ta seke alilani Ebarahami ko vikuvikula kale ta pui vo Baṉara ko tuvevo ama meqora poso, melai seke alilani vo Baṉara ko leveleveo kale ta tuvevo ama vo Ebarahami ko vikuvikula madu.

⁹ Ako vo Baṉara ko leveleveo ta lula eri kikove sole; “Ko kilo ama sabere kale komia sabere ko eri ama taku kale inio aṉata mata a vaitou, ni ko Sera ta ko vovou kala meqora,” kikovema.

¹⁰ Ni pui ko ko kiada. Ako Ribeka ko omuqa lasive meqora kidi ta omadeu mama kanioqa, vo animevo taite Aisake.

^11-12 Melai kala pado meqora nioqʼazo ko pitoilo ta vo Baṉara ko maba vatolo kale inio o pitoi. Baṉara ta eri kiolake koa reko kasi, “Vo kaka kala ta nabulu ova elou vo visi ala.” Vota o kaseke koa pesio puliako nioqa alilo, ni puliako nioqa ereko ko uri ni ruqe; so sole vo Baṉara o pitoeve keru voa maba ta vota pui o nokaeva vo vo o erekako iruruputo ko kio kale, melai o ṉaviko vatolo kale inio vota o nokaeva vo.

¹³ Eri nio ko Tabu ama Riki kikovevo, “Aṉata lula a bitoeve vo Jekopi, melai avai kedui vo Isoa.”

¹⁴ So sole mata noi nio kimevou ko anime, vo Baṉara ta pui sidopu ala inio kimevou, kio? Maba pui!

¹⁵ Ako vota eri kiove sole vo Mosese kasi, “Aṉata a roquevou kala vo aṉa ava zariani roquevo.”

¹⁶ So sole kiadama quli ta koko kalo sama. Pui vo maba oka zariako quli kale ma o erekako quli kale inio ko ereiva, melai kota ko ereiva vo Baṉara ko akoekato sama roquano kale.

¹⁷ Ako ko Tabu ama Riki kikolani ta vo Baṉara ta ovai bazuekake vo Ijipi ala Aikovakova ko eri, “Aṉata aikovakova a iṉe ṉo ni aṉako iruruputo lomaloma jari a iṉe tu ṉo buratikou aṉako pizato ni kokale aṉako ṉi ta ko zorarou peuru ma peuru kale.”

¹⁸ So sole vo Baṉara ta o baiseva kala vo ova zariani baisevo, akoekato sama roquano kale, ni vota zokele bulo o iva kala vo ova zariani zokele bulo ivo.

Vo Baṉara ko korakorailo ni baiseo

¹⁹ Kala ṉa ta esa eri kiṉovou aṉa kasi, “Baṉara so o ika tea, noi sole inio vo Baṉara ta o kea kala maba topi ama saruilo? Ako puliala o rovea tizaeko vo Baṉara ko vatolo sole,” kiṉovou.

²⁰ Melai lalaṉa inio ṉo, a lolo ṉa, ṉoṉo deuteuvani ṉa vo Baṉara? Ko miduku raro ta pui kovai kuimaeka voa maba vo o erekeni ko ko eri kio, “Noi sole inio ṉota eria erelo ṉo eve?” kio.

²¹ Ako voa maba koa raro o erekani nio o kati lulueka o vatolo koa miduku, tu vota okai ereko omuqa ijatiniama miduku raro, kala ta matuma taku keru ala ni kala pado ta kiada keru vai iruruputo kaqe.

²² So jari nio mata vo Baṉara o erekema quli ko tuveano. Vota oka zariovi puratiko voko korakorailo tu voko pizato ta ko kasa puilo. Melai vota inobea taremo o evake se vo omai korakoraivani, se heli kale tolailo ko male amu.

²³ Ni vota mata oka zariake kasa iko voko ṉaṉaidara ko pui ko lalamatake, koko taloima anime kasi anime me qoeni mela voko akoekato sama roquano, ni anime mata o inainaemeleni mela tu me zomanou voko ṉaṉaidara kale.

²⁴ Ako anime inio ko lula o nokaemeleni mela sole, pui anime Jiu amu mela me qiada, melai anime pui Jiu amu mela melai me nokai.

²⁵ Vo Hosea ko buka kale ko rikiziovima ikio so ka kiovema ko eri kikolako, “Se pui aṉako madu kepa eveni se inio aṉako maba madu ke elou. Koa toutou ko aṉa pui aba roquekema aṉata a matu roquemou se.

²⁶ Ko omadeuma zae kale sai ‘Meta pui aṉako mabamu mela,’ ma kiovekoi sai nio vo saevola Baṉara o meqora poso ma kiovoa koi.”

²⁷ Aisea ta o velavelaoke Izireli qoqono kale avo ni eri kiolake, “Izireli amu ta keta kale ama karokoni jaria kubo amu, melai kama poso madu inio ke pakiovo amu;

²⁸ ako vo Baṉara ta taukavole o koqotaemou seko pado ama kalo ko reketekete kale peuru ma peuru kale amu sole.”

²⁹ Omadeuvo vo Aisea kiovevo jari, “Vo piza kala Baṉara ta pui opa saevime kama vikuvikula poso tea, animeta Sodomo ni Qomora peuru kale amu jari nio meda elo.”

Paula mati vararaito se Izireli amu

³⁰ Sokale avo inio se pui Jiu amu, se pui kepa vailikeni ko sidopu elo vo Baṉara ko kelokelozato kale, ta sidopu keta evake seko vai oqu kale vo;

³¹ melai vo Baṉara ko maba madu Izireli amu se keka zarini sidopu elo vo Baṉara ko kelokelozato kale Mosese ko Bazu ko zoriko kale, ta pui sidopu kepa eve kokale.

³² Noi sole inio kota so kota kae? Ako seta pui kepa ka zariovi pataito vai oqu kale vo melai seta kekai oquake seke erekema quli sole. So inio seta keta tupariake koa “tupatupario ko lado” topi.

³³ Ko ikio ko Tabu ama Riki eri ka kikovema, “Keatini, aṉata a vaeva kala lado Jerusalema, Vo kevai tupariovo ala se maba madu, Voa lado vo o pimo ala se. Melai se kevai keruani vo ta pui kepa quratou.”