Romu 7 - BAṈARA KO VAIRU AMA LEVELEVEO

Roroto kati podetiko

¹ Me aṉako tamania kalea mela, meta me uria paqumukou aṉa a qaseko ama quli, ako mea kiada mela ta me baqumuka sole ko bazu. Maba poso ta ke eva ko bazu ko poro kale se kebeta saeva keru pala.

² Keatini kama pado roroto ama reko, ta kota pirizia kovo lasive kale roroto ko bazu kale vo obeta saeva keru, melai vo o vouva keru kota kota rupasia koa bazu ko piri kale azo.

³ So sole kota ko elou kala edolola maba kasi so keru kovo lasive obeta saeva keru, ta kota kota pauvezata inio; melai so keru kovo lasive lula o vouva keru koa reko ta ruparupasi ama ikio koa bazu kasi azo, ni kota pui ko pauvezata so keru koko raeva keru kala edolola maba.

⁴ Sokale avo me, aṉako tamania kalea mela, Mosese ko Bazu kati vailo kale azo meta lula meda zomana vou vo Karisito sate, ni erisaṉa meta voko mela inio vo o saeveni voukale azo, tu animeta me uria va nabuluputou vo Baṉara.

⁵ Ako puliako anime lilizio sarueko kale azo, inio koa sarueko, ko Mosese ko Bazu ko pizatikema, ta ko irurupute animeko saevo kale, ni animeta me uria ka nabulupute ko vou.

⁶ Melai erisaṉa animeta ruparupasia mela ko Mosese ko Bazu kasi azo, ako animeta lula meda vovi koa Bazu, koko piriemelema anime kale azo. Melai erisaṉa animeta pui mevai nabuluputa vo Baṉara koa lulama Bazu vo Mosese o rikiekema kale, melai vairu ama keve kale kude vo Tabu ala Auvana kale.

Mosese ko Bazu ko kasa iko ko sarueko

⁷ Noi nio mata kimevou, vo Mosese ko Bazu ta sarueko ikio kimevou kio? Maba pui! Ako koa Bazu ko nianiiekato kale inio aṉata a baqumuka ta ko sarueko ta sarueko ikio. Ako koa Bazu ta pui ko bazuela aṉa ko eri tea, “Ṉota pui viluloqu tavai elo kala maba ko quli,” so tea aṉata pui nio aba paqumuko koa viluloqu ko kio ni kalo.

⁸ Melai koa pado bazu kikolani kale ta sarueko ta ko kea koko rora tu ko pizatiko azaazama aṉako viluloqu poso. Ako sai puliama bazu ko evakoi ta sarueko ta vouma.

⁹ Lulavo aṉata Bazu pidea lala ni so keru inio aṉata ada saeve. Melai so keru kama pado bazu ko kueva keru inio ko sarueko ta kokai zorarake aṉako saevo,

¹⁰ ni aṉata ada vouvake. Nio koa bazu koko saevilo kikolako aṉa, melai ko ikio ko vouvaelake aṉa.

¹¹ Sarueko ta ko keake koko rora koa bazu kale, ni kokale ta ko lipaelake aṉa ni kota ko vouvaelake aṉa.

¹² So sole koa pado ama Mosese ko Bazu ta tabu ama ikio, ni kiadama koko omaomadeu bazu poso melai tabu ama, kota sidopu ama ni uri ama.

¹³ Melai noi nio, koa uri ama quli kio ko vouvaelema aṉa kio? Maba pui! Tuvevo ko sarueko ikio ko vouvaelema aṉa, melai koa uri ama bazu poso kale inio ko sarueko ta ko vouvaelake aṉa, ni Sokale inio animeta me baqumuka ko sarueko ta ruqe ama koko kalo. So sole koa bazu poso kale ta sarueko ko matu ti matuma ruqe ta kasa ko eva.

Pazokinio maba ko saevo kale ama

¹⁴ Animeta meqai nianiia ko Mosese ko Bazu ta auvana ko quli kio; melai aṉata kala maba lala tupu kale a jaevani lala, ni lula sarueko ko mabaku a evani lala.

¹⁵ Aṉata pui a baqumuka ko aṉa a erekako quli, ako aṉata pui a ereka sole ko quli aṉa aqa zariako ereko, melai ko aṉa matu ruqe ka kialako quli, ko ikio aṉata a ereka.

¹⁶ Ako aṉa a bikoirika keru ko Bazu, melai pui aqa zaria bikoiriko ko, ko aṉa pui ka zario bikoiriko ko Bazu ikio kasa ko ika aṉako tuvevo iko ko Bazu ta sidopu ama kio.

¹⁷ So sole pui maba aṉa inio a erekani lala komia kalo, melai koa sarueko ikio koko ereka ko, koko evako aṉako saevo kale.

¹⁸ A vakakuka ta ko sidopu ta puliama aṉako tupu kale ama saevo kale. Ako sidopu ko ereko ko vatolo ta kobe elou aṉa tona melai, aṉata pui a roveovou ereko ko.

¹⁹ Aṉata pui a rovea ereko ko uri ko aṉa aqa zariako ereko, ni aṉata aqai besieka ko ruqe ko aṉa pui aqa zariako ereko.

²⁰ Sole aṉako ereko ko quli aṉa pui aqa zariako ereko ikio kasa ko ika ta koa sarueko ikio ko erekako, koko evako aṉako saevo kale. Pui aṉa inio a erekani lala.

²¹ Sai nio aṉata a qea ta komi kio ko ereivako aṉa kasi; so keru aṉa aqa zaria keru ereko ko sidopu ama quli, ta ruqe ama quli ko kiada a rovea ereko.

²² Tuvevo, aṉata aqa zoleiva aṉako bulo kale vo Baṉara ko bazu.

²³ Melai aṉata a qea edoloma bazu aṉako saevo kale ama koko pazokake koa aṉako kerukeru ko tuvevo ko ikako bazu. Kota ko piriela aṉa sarueko ko bazu kale koko iruruputako aṉako tupu kale.

²⁴ Ke, aṉata matu upotuqu ada eva! Lala inio o pakielou aṉa komia tupu vou sama kasi azo?

²⁵ Ilusiva vo Baṉara, vo lula o pakielani aṉa vo animevo Lekasa Jisu Karisito kale! Sole eri nio. A ṉavi a qiada aṉata a zorika vo Baṉara ko bazu kerukeru kale pala, melai aṉako tupu kale ama saevo ta ko zorika ko sarueko ko bazu.