Romu 5 - BAṈARA KO VAIRU AMA LEVELEVEO

Sidopu elo vo Baṉara ko kelokelozato kale

¹ Erisaṉa animeta lula sidopua mela vo Baṉara ko kelokelozato kale animeko oqu kale, Sokale inio animeta bule kale me vati eva vo Baṉara, animeko omadeu vati elo vo animevo Lekasa Jisu Karisito kale kude.

² Vota lula o odiemela anime oqu kale vo Baṉara ko pakiezato sama roquano kasi, sai anime me evakoi. Sokale avo inio animeta meqa zoleiva ko animeko piza kama keru, tu kai zomano vo Baṉara ko ṉaṉaidara!

³ Ni so jari animeta meqa zoleiva animeko tapata poso, ako me baqumuka ta ko tapata ko epa ta pizaka lojo elo,

⁴ pizaka lojo elo ko epa ta vo Baṉara ko mela zoleilo, ni voko mela zoleilo ta keru saṉa ko imela tu animeta me qovou vo Baṉara ko tauvezato.

⁵ Ni koa keru ta pui quraqurati ama quli anime kasi, ako Baṉara ta lula o raibike voko roquano animeko bulo poso kale vo Tabu ala Auvana kale, vo lula o katiziovini tu anime kaqe.

⁶ Ako so keru anime pizato pidea mela me eve keru, inio Karisito ta o mela vovi anime ruqea mela koa taku vo Baṉara o pitoekema kale.

⁷ Tapata ikio tu kala maba ta ova vou kala sidopu ala maba. Melai esa kala parani ala maba ta ota roveovou va vou kala uri ala maba.

⁸ Melai vo Baṉara ta lula kasa o ika voko roquemelo anime komi kale; anime sarueko kale mebeta eve keru inio Karisito ta o mela vouvake.

⁹ Vota o mela vovi tu animeta sidopu me elo vo Baṉara ko kelokelozato kale, sole matu olu vokale tu me bakiovou vo Baṉara ko korakorailo kasi azo voko matuma titizato ko ṉaniu kale.

¹⁰ Lulavo animeta Baṉara ko kana poso mela inio, melai erisaṉa vota o melati baerebaerea vovo Meqora ko voukale. Erisaṉa animeta vo Baṉara ko baerebaere poso mela, sole vo Karisito ko voukale azo mata saevo kale melai pui tapata tu animeta me bakiovou!

¹¹ Pui koko kiada, melai animeta meqa zoleiva ko quli vo Baṉara o erekema vo animevo Lekasa Jisu Karisito kale, vo erisaṉa anime Baṉara ko baerebaere poso o imelani.

Adami ni Karisito

¹² Ko sarueko ta ko kuevi peuru ma peuru omadeu maba kale kude, ni voko sarueko ta ko kati kuevi ko vou. Koko kio kale vou ta komai baroi kiadama maba poso ako seta ruqe ko kiada sole.

¹³ Ko sarueko ta ko eve peuru ma peuru puliako ko Bazu katizio, melai puliako ko Bazu elo ko sarueko ta pui kopa mamola pui.

¹⁴ Melai vo Adami ko taku keru azo ti kobeta baroi Mosese ko taku keru ta ikoana ko vou ko pizato kiadamu tona, ti kobe mai baroi se pui vo Adami jaria sarueko kepa eveni kasi so keru vo o bikoirike keru vo Baṉara ko bazu. Adami nio kala mamola o eveni vovo tova o kuevini vo.

¹⁵ Melai nioqata pui ijavoa nioqa, ako vo Baṉara ko roquano sama puaro ta pui Adami ko sarueko jari ama sole. Tuvevo kubo maba ta lula keta vovi omadeu pado maba ko sarueko kale. Melai vo Baṉara ko pakiezato sama roquano ta kokai paloasa ko sarueko, so jari vo Baṉara ko roquano sama puaro koko puariziako kubo maba poso kasi omadeu maba ko pakiezato sama roquano kale kude, vo inio vo Jisu Karisito.

¹⁶ Komi kio koko edolovo vo Baṉara ko puaro omadeu maba o erekema sarueko kasi azo. Omadeu pado sarueko ko titizato ta kuiripato sama, melai kubo sarueko ta vo Baṉara ko puaro kuiripato pide ko ika.

¹⁷ Tuvevo avole omadeu maba ko sarueko kale ko vou ta ko eve vo o erekema sarueko kale. Melai ko kobe qulepako ta omadeu maba Jisu Karisito o erekema quli ko puratikako. Ako kiadamu seke koani vo Baṉara ko palopaloasi ama roquano ni se sidopu ke evani voko kelokelozato kale ta ke raurailou noqola kama saevo kale vo Jisu Karisito kale.

¹⁸ So sole koa omadeu pado sarueko kale kiadamu ta kuiripato saṉa ke evake, melai mata omadeu pado sidopu ama iruruputo vo Karisito o erekema kale inio Baṉara ta o rovea sidopu ma kio kiadamu tu koma puarizio ko noqola kama saevo.

¹⁹ Kiadamu ta ruqe keta evake omadeu maba ko bikoirato kale, ni sea kiadamu ta mata sidopu keta elou Baṉara ko kelokelozato kale omadeu maba ko zoripato kale.

²⁰ Ko Bazu ta ko kuevake tu ko ruqe ama iruruputo ta ko rapuko, melai sai ko ruqe ko rapukekoi, sai nio vo Baṉara ko pakiezato sama roquano ta ko matu rapukake.

²¹ So sole omadeuvo ko sarueko ta ko lekasa pui voukale, so jari nio mata vo Baṉara ko pakiezato sama roquano ta ko lekasa pua voko sidopu ko puariko kale, koa roquano koko odiemelako anime noqola kama saevo kale animevo Lekasa Jisu Karisito kale.