Romu 2 - BAṈARA KO VAIRU AMA LEVELEVEO

Baṉara ko titizato

¹ Melai ṉoṉo ditizimani ṉa se edolomu koa ruqe poso kale ta pui ṉoba taka zoliovou, ko ṉota kala pado ṉa inio sole. Ako so keru ṉo ṉobe titizima keru se, ṉo melai ṉobe ereka soama iruruputo seke erekako jari ama, ṉota ṉoda kuirizia inio ṉo ṉavi.

² Ako animeta meqai nianiia ta Baṉara inio o ereka ko sidopu ama titizato sea maba poso seke erekani soama kalo poso kasi.

³ Melai ṉoṉo erekani ṉa ko kuiripato se edolomu kasi ta ṉobe roveovou taka soqoilo vo Baṉara ko kuiripato ta be kiṉola kio? Maba pui, ako ṉo ṉavi melai ṉobe ereka koa kalo sole.

⁴ Ṉo ṉoqai keduani ṉa voko matuma roquano, ni kaitizio, ni inobe, ta tuvevo avole ṉota pui ṉoqai nianiia vo Baṉara ko roqueṉo ṉo ta vota obe madoe odieṉo ṉo tu o liliṉo, kio?

⁵ Melai ṉota lado buloa laṉa so sole ṉota ṉo badoeka ṉo ṉavi vo Baṉara ko korakorailo so keru koa matuma ṉaniu voko sidopu ama titizato ko elou keru.

⁶ Ako vo Baṉara ta reketekete saṉa o imou se ruqe ama maba poso seko ruqe ama iruruputo ko reketekete kale ni uri ama maba poso seko uri ama iruruputo ko reketekete kale.

⁷ Seke erekani ko uri ta koa kalo kale inio seta ke zuatika ko ṉaṉaidara, ni raurailo, ni noqola kama saevo, ni se inio vo Baṉara o katimo amu koa noqola kama saevo.

⁸ Se kiadailo ko maba poso ni ke vaekani ko sidopu, tu seta ke ereko ko ruqe ama kalo, se inio komai voreziovo amu ko Baṉara ko iqailo.

⁹ Lisulasu ama saevo ni tola ta ko elou se ruqe ke erekani kasi, Jiu amu kasi kuleto ni so jari pui Jiu amu kasi.

¹⁰ Melai vo Baṉara ta o puarikou ko ṉaṉaidara, raurailo, ni bule se uri ke erekani kasi, Jiu amu kasi kuleto ni so jari se pui Jiu amu kasi.

¹¹ Ako vo Baṉara ta o titizimela animea kiada mela koa omadeuma titizato kale sole.

¹² Se pui Jiu amu ta puliama vo Mosese ko Bazu samu, sole seke sarueka keru seta ke koqotaiva, melai pui koa Bazu kale. Melai se Jiu amu ta ikoana koa Bazu samu, so sole seke sarueka keru koa Bazu ikio kuiripato saṉa ko ima.

¹³ Ako sidopu elo vo Baṉara ko kelokelozato kale ta pui maba madu ko viqo kale ko Bazu inio, melai ereko kale ko Bazu kikolani.

¹⁴ Se pui Jiu amu ta puliama koa Bazu samu, melai ke kati vaila keru koa Mosese ko Bazu kikolani, seta kebe lulueka koa Bazu, puliama Mosese ko Bazu samu melai.

¹⁵ Seko kalo kota ma kasa puekako ta ko rikiziake vo Mosese ko Bazu kikolani seko bulo poso kale. Ni seko kerukeru ta kasa ko ika ta kota tuvevo ama quli, ako kama taku ta kuiripato saṉa ko ima seko kerukeru, kama taku ta ko zuvarima seko kerukeru.

¹⁶ So inio ko kalo avo vo Baṉara ko matuma ṉaniu kale so keru vo o titizikou keru kiadama mutamuta kama kerukeru poso. Ni ko ikio koa Uri ama Bazu aṉa aqai bazutako, Jisu Karisito azo a qoema.

Se Jiu amu ni vo Mosese ko Bazu

¹⁷ Noi nio ko me Jiu amu mela kimelani? Meta me zukaida inio vo Mosese ko Bazu tona nio meta mevai rauraiva vo Baṉara, kimela;

¹⁸ meta me baqumuka ko quli vo Baṉara okai zariako tu me ereko, ni meta lula me baqumuka koa Bazu kale tu me bitoekou sidopu ama quli, kimela;

¹⁹ ni meta me odiemani mela se leqa kamu, ni meta se kutumana kamu ko zakaremu jaria mela, kimela,

²⁰ meta vakakato ko maba mela se nianiiekato pide amu kasi, ni nianiiekato ko maba mela se vairuvairu amu kasi, kimela. Mosese ko Bazu kale ta meta pado ama nianiiekato ni tuveano samela, kimela.

²¹ Meta me nianiiekima sea edolomu —noi sole inio meta pui me lulueka me ṉaviko nianiiekato? Meta meqai bazubazuta, “Pui kuilo,” kimela— melai meta mebeta kuila me ṉavi.

²² Meta so kimela, “Pui ṉo zavematou,” melai me ṉavi meta mebeta pauvezata. Meta meqai kideipani mela ko beku poso—melai me inio mata mebe kuilika beku ko ilusiko ko pade kale ama quli.

²³ Meta meqai abarani mela meko ṉeamuko vo Baṉara ko Bazu, melai me inio mata me zaraevani mela vo Baṉara meko pui zoriko kale voko Bazu.

²⁴ Omadeuvo ko Tabu ama Riki kikolani, “Se pui Jiu amu ta ruqe kaseko ke eva vo Baṉara ko ṉi me Jiu mu mela ko ruqe ama kalo kale avo.”

²⁵ Meta me zorikou ko Bazu inio meko moveilo ta kalo sama quli, melai meta me bikoirikou koa Bazu kikolani ta koa moveilo ta kalo pide ama ikio.

²⁶ Kala pui Jiu ala vo pui movemove ala, melai vo o zorikani Bazu kikolani, vo inio tuvevo avole vo Baṉara o roquevani, vo lula movemove ala jari.

²⁷ Me Jiu amu mela inio koa Bazu samela ni me inio mea movemovea mela, melai meta me bikoirika koa Bazu sole meta kuirikuiria mela se pui Jiu amu kasi, se pui movemove amu melai ke zorikani koa Bazu.

²⁸ Sole lala inio voa maba Jiu ala maba, tuvevo ama moveilo sala? Vota pui voa Jiu ala inio vo tupu kale Jiu o evani, vo tupu kale ama moveilo sala.

²⁹ Melai vo tuvevo ala Jiu ta vo Jiu o evani bulo kale inio, ni koa tuvevo ama moveilo sala voko bulo kale ni auvana kale, ni ko ikio vo Baṉara ko Auvana ko erekako, pui Mosese ko Bazu ko erekako. Voa maba soala inio o koa ko raurailo vo Baṉara kasi azo ama, pui maba kasi azo.