Romu 16 - BAṈARA KO VAIRU AMA LEVELEVEO

O ṉavi Paula ko roquano sama pesio

¹ Aṉata a melai bazueka ko animeko visi Foebi ta kama uria iruruputo ama reko, koko nabuluputako Kenikarea lotu qoqono kasi.

² Meta me baroekikou ko vo Lekasa ko ṉikale, ako ko ikio vo Baṉara ko maba madu ko kalo sole, ni meta me dauvekou ko, ko koka zariovo ama quli kale mekasi, ako kota kama pado reko lula ko tauvemako kubo maba madu ni so jari aṉa melai sole.

³ Aṉata a joroe aṉako roquano Pirisila ni Akuila kasi, aṉako tauvezato kidi vo Jisu Karisito va nabuluputo kale;

⁴ nioqa qo inainaini nioqa tu qo vou aṉako tauvelo kale. Aṉata aqa zoleiva nioqa, ni pui aṉa a qiada, melai se pui Jiu lotu qoqono kale amu melai so.

⁵ Ni komi ta mata aṉako roquano sea lotu qoqono kasi ama seke padoivani nioqako pade kale. Ni aṉako roquano vo aṉavo baerebaere Epaenitasi kasi Eisia rana vo kuleto tuvevo o iveni vo Karisito.

⁶ Ni aṉako roquano Mere kasi koko melati matu koidipema me.

⁷ Ni aṉako roquano Adoronikasi ni Jiuniasi kasi aṉako maba kidi Jiua nioqa qo eveni nioqa aṉa sase pirito pade kale, uri ama apositolo kidi ka kikelani nioqa, ni kuleto Karisito qo lulueveni nioqa aṉa puliako luluevo.

⁸ Aṉako roquano Amipiliatasi kasi, vo aṉavo uri ala baerebaere vo Lekasa Jisu kale.

⁹ Ni mata aṉako roquano Ubanasi kasi, kala tauvezato ko maba Karisito va nabuluputo kale, ni Sitakisi aṉavo uri ala lolo.

¹⁰ Aṉako roquano Apelesi kasi vo lula kasa o ivani vo Karisito voko saevo kale.

¹¹ Roquano se Arisitobulasi saidi kasi, ni roquano Herodiani kasi, Jiu ala aṉavo lolo, ni sea lotu tamania Naesesasi ko saidi kale amu kasi.

¹² Aṉako roquano Taraepaena ni Taraeposa kasi, qo iruruputani nioqa Lekasa va nabuluputo kale, ni Pesisi vo aṉa a matu roquevani kasi, vo lula o matu erekani vo Lekasa ko iruruputo.

¹³ Aṉata mata a joroeka aṉako roquano Rupasi kasi, vo Lekasa vo matu uri ala nabulu, ni voko niania, ko meqora jaria vijarilo ko ilako mati.

¹⁴ Aṉako roquano Asinikuiritasi, Peleqoni, Heimisi, Patorobasi, Heimasi, ni kiadama lotu tamania se kebeta evani sekasi.

¹⁵ Aṉako roquano Piloloqasi ni Julia kasi, ni Neriasi ni voko visi, ni Olimipasi ni kiadama vo Baṉara ko qoqono se kebeta evani sekasi.

¹⁶ Toraekiniomo muli tabu ama roquano kale. Kiadama vo Karisito ko lotu qoqono kale amu ta ke soroeka seko roquano mekasi.

Tovatovama bazu poso

¹⁷ Aṉata a basemela me a visi poso mela: tu tama balauvomo se pitasato ko maba poso ni seke niumaekani maba ko oqu ni se ruqea kaseko ke evani koa nianiiekato ko me lula me qoema. Meta tama papariomo se!

¹⁸ Ako seke erekani soama quli ta pui keva nabuluputa animevo Lekasa Karisito sole, melai kota tupu ko zario ikio kebe ka nabuluputa. Seko uria viqo ama ni oluoluto sama pesio kale seta ke lipalipata tu ke lipalipaemo ni otao ke imo se pui malaṉaja kama maba madu.

¹⁹ Kiadama maba ta lula ke viqa meko sidopu sama iruruputo vo Jisu Karisito ko Uri ama Bazu kale, ni Sokale avo inio aṉata a mela zoleiva me. Aṉata a mela zaria me tu meta nianiio emo, uri ama quli kale, ni meta rurubiatana emo ruqe kasi azo.

²⁰ Ni vo Baṉara animeko bule ko raki ta taukavole o mujarivou vo Setani meko kiti vima. Vo animevo Lekasa Jisu Karisito ko roquano ta ko elou me tona.

²¹ Vo Timoti aṉa sate o iruruputani, ta o soroeka voko roquano mekasi; ni so jari Lusiasi, Jesoni ni Sosipata, se aṉako mabamu Jiu amu.

²² Aṉa Tetiasi vo Paula ko rikito maba a evani lala, ta a melai soroeka aṉako roquano vo Karisito kale.

²³ Vo Qaiasi, vo aṉa o ranelani voko pade kasi, sai lotu qoqono ko padoivakoi, ta o melai soroeka voko roquano. Ni Erasitasi, vo o kati vailani ko takula komia peuru kale, ni animeko tamania kale ala Kuatasi melai qo soroeka nioqako roquano.

Ilusato ko vararaito paitopaito kale ama

²⁵ Animeta ṉaṉaidara me ivo vo Baṉara! Vo inio o pizatimelani me meko oqu kale, vo Jisu Karisito Uri ama Bazu kale, ko aṉa aqai bazubazutako. Matu lulavo azo rosi ama taku kale inio kota mutai koa Bazu,

²⁶ melai erisaṉa inio kota kasa kota eva se poropita madu ko riki poso kale, ni vo saevola Baṉara ko soru ko lulueko kale kota lula zakaremu komai eva kiadama peuru ma peuru kale ama qoqono poso, tu kiadamu ta ke tuvevo puto ni ke zoripato.

²⁷ Voa omadeu pado Baṉara, vo okai nianiiani kiadama quli, ta ṉaṉaidara me ivou vo Jisu Karisito kale latau ṉaniu ni ka ṉaniu! Emeni.