Romu 15 - BAṈARA KO VAIRU AMA LEVELEVEO

Zolemomo edolomu, pui me ṉavi pala

¹ Anime lula pizaka mela oqu kale ta me dauvemo se lekuleku amu seko niuniala kale. Animeta pui me zoleilo me ṉavi pala.

² Melai animeta me zolemo kiadama animeko tamania kale amu tu seta uri ke elo ni ke rapuko oqu kale.

³ Ako vo Karisito ta pui opa zolei o ṉavi pala ko Tabu ama Riki kikolani jari, “Koa riqariqato se kuiripato ko maba poso ke erekako ṉo tona ta ko loa aṉa,” kikolako.

⁴ Kiadama quli koko rikiziovima Tabu ama Riki topi ta ko rikiziovi tu kota ko nianiiekimelo anime, tu animeta me ṉeamuko ko noqola kama saevo ko keru, koa pizaka lojo elo kale ni koa zuvarato kale Tabu ama Riki ko katimelako.

⁵ Ni vo Baṉara, vo pizaka lojo ni zuvarato ko raki, ta o bokerimelou me tu omadeu vatolo ni kerukeru me elo meko lulueko kale vo Jisu Karisito o kaevo.

⁶ So inio mea kiada mela ta omadeu ilusivo me elou vo Baṉara, vo animevo Lekasa Jisu Karisito vo Mama.

Uri ama Bazu se pui Jiu amu kaqe

⁷ So sole meta baroekiniomo muli, tu vo Baṉara ta o ṉaṉaidara puilo, vo Karisito o baroekimelo me jari.

⁸ Ako aṉata a bazuemela me, ta vo Karisito ko saevo kale ama nabuluputo kale, vota nabulu oma eve se Jiu amu, tu kota kasa ko ivo vo Baṉara ta kerula kala kio, tu voko leveleveo seko taite poso kasi ama ta tuvevo ko elo,

⁹ tu se pui Jiu amu melai ke roveo ilusivo vo Baṉara voko akoekato sama roquano kale. Ko Tabu ama Riki kikolani jari, “So sole aṉata a ilusiṉou ṉo pui Jiu amu sase, Aṉata a ilusiṉou ṉo a qera kale,” kikolako.

¹⁰ Ni mata kota so kikola, “Zoleimo me peuru ma peuru kale ama qoqono poso mela vo Baṉara ko mabamu sase!”

¹¹ Ni mata kota so kikola mata, “Ilusivomo vo Baṉara, kiadama pui Jiu ama qoqono poso mela!”

¹² Ni mata, Aisea ta eri kiolake, “Kala pado vo Jese ko vikuvikula kale ala ta o puratou, ni vota Lekasa oma elou se peuru ma peuru kale ama qoqono poso, ni seta kevai keruvou vo,” kikolako.

¹³ Vo Baṉara, vo o katimelani anime ko keru tu me qovo ko noqola kama saevo, ta o melai avozikou me kiadama zoleilo ni bule meko vai oqu kale vo, tu koa meko keru ta ziole kobeta ziovou vo Tabu ala Auvana ko pizato kale.

Paula ko tutumazito sama riki

¹⁴ A visi poso mela: aṉata a uria paqumuka ta meta sidopua mela ni vo Baṉara ko nianiiekato me baqumukani mela, ni meta me roveani mela tu nianiiekikinio me ṉavio kude.

¹⁵ Melai komia leta kale aṉata pui a lalamata melai kerukerueko me ko lula meme baqumukako quli, ni aṉata pui a ṉava melai bazueko ko quli ako vo Baṉara ta o soroela aṉa voko pizato kale sole,

¹⁶ vo Jisu Karisito nabuluputo kale se pui Jiu amu ma koidipo kale. Aṉata a nabuluputa kala pado siama jari kai bazubazuto kale vo Baṉara kasi azo ko kuevako Uri ama Bazu, tu se pui Jiu amu ta koroto ama siqasiqa jari ke elou Baṉara kasi tu seta tabu ke elou vokasi vo Tabu ala Auvana kale.

¹⁷ Sole aṉako omadeu vati elo vo Jisu Karisito kale, aṉata ada rovea ka zoleilo aṉako va nabuluputo vo Baṉara.

¹⁸ Aṉata aqai matu velavelaovou ko quli pala vo Karisito lula o erekako aṉa kale kude tu o odiemo se pui Jiu amu tu ke zorivo vo Baṉara. Vota lula o ereka ko quli pesio ni iruruputo kale,

¹⁹ ni aqasiele ama iruruputo ni urikato ko pizato kale, ni vo Baṉara ko Auvana ko pizato kale. So inio kiadama talio kale Jerusalema azo ti ko baroa Ilirikamu peuru kale, aṉata lula aqai bazubazuta ko Uri ama Bazu Karisito ko kasevako.

²⁰ Aṉako matuma zario ta aṉata aqai bazubazuto ko Uri ama Bazu sai vo Karisito ko ṉi sai pui nio keta va viqakoi zama peuru poso kale, ako aṉata pui aqa zaria iruruputo sai kala maba lula o tanitekoi iruruputo sole.

²¹ Omadeuvo ko Tabu ama Riki kikolani jari; “Se pui kopa mai rukuini vo Baṉara vo nabulu ko bazu ta ke velou vo, ni se pui kepa tava viqeni vo ta kevai nianiiovou vo,” kikolako.

Paula ko zario tu o soipiko ko Romu peuru

²² Sokale avo inio aṉata a dizaiva kubo taku tu aṉata a qilo mekasi.

²³ Kubo sabere aṉata aqa zariani lala inio kilo tu mela lelole me ni erisaṉa ta aṉata a okotika aṉako iruruputo komia zae poso kale,

²⁴ so sole erisaṉa aṉata aqa zaria kilo. Aṉata aqa zaria mela lelo me so keru aṉa Sipeini peuru kale a ziovou keru, tu aqai zoleilou meko soipimelo puju ama taku kale. So inio aṉata a qovou ko tauvezato mekasi aṉako ziokale sai.

²⁵ Melai erisaṉa aṉata ada ola Jerusalema peuru kale tauvemole vo Baṉara ko qoqono sai ke evani.

²⁶ Ako lotu qoqono Masedonia ni Akaia peuru kale amu ta lula ke inainaeke seko katizato tu ke tauvemo vo Baṉara ko qoqono se ozaoza kamu Jerusalema peuru kale ke evani.

²⁷ Ke ṉaviko vatolo kale inio ke ereke ko; melai koko tuveano ta seko koidi ikio tu ke tauvemo se. Ako se Jiu amu ta lula ke puarike ko Auvana kale ama mauruto se pui Jiu amu kasi, so sole se pui Jiu amu ta ke male puariko ko lomaloma ko mauruto tu ke tauvemo se Jiu amu.

²⁸ So keru aṉa a baikou keru koa koidi ni aṉa a vaekou keru kiadama koa takula seko ṉase topi, aṉata a dadaovou tu a zio Sipeini peuru kale ni aṉata a joipimelou me sai Romu peuru kale alokatole.

²⁹ Aṉata aqai nianiia, ta so keru aṉa a qilou keru mekasi, aṉata a qati kilou vo Karisito ko matuma mauruto.

³⁰ Aṉata a matu pasemela me a visi poso mela, vo animevo Lekasa Jisu Karisito kale ni vo Tabu ala Auvana o puarikake roquano kale, tu meta matu tauvelomo aṉa ni lati zomanomo vararaito vo Baṉara kasi.

³¹ Vararaitomo tu aṉata a bakio se pui ke tuvevo putani Jiudia ke evani ko ṉase topi azo ni vo Baṉara ko maba madu Jerusalema peuru kale amu ta keka zoleilou aṉa ama borikako quli.

³² So inio aṉata a qilou zolezolea lala mekasi, ni kota vo Baṉara ko vatolo ko elou ta, koa soipo ta ko pizatimelou anime ni zolezole ama kota elou anime kasi.

³³ Vo Baṉara, animevo bule ko raki, ta o elou mea kiada mela tona. Emeni.