Romu 14 - BAṈARA KO VAIRU AMA LEVELEVEO

Meta pui titizimo meko lotu tamania kale amu

¹ Meta baroekimomo sea maba poso se lekuleku amu seko oqu kale, melai pui tamati zolizoliekinio seko kerukeru meko kerukeru kale.

² Ako kala maba ta voko oqu kale inio o rovea kuo kiadama quli, melai kala pado maba vo lekuleku ama oqu sala ta pui o rovea kuo ko marabau.

³ Voa maba vo utu kuo o evani kiadama sailao poso ta pui o zaraevou voa maba vo pui o utu vuatani; ni voa maba vo pui o kuani ko marabau ta pui o titizivou vo utu vuato o evani maba; ako vota obeta korota vo Baṉara ko vilu kasa sole.

⁴ Lalaṉa inio ko ṉo ṉoṉo ditizivani ṉa edolola maba vo nabulu? O ṉavi voa nabulu vo lekasa inio okai nianiiovo ala vovo nabulu ko uria ereko ma pui uria ereko voko koidi. Melai vota o uria erekou voko koidi, ako Baṉara ta o pizativa vo sole.

⁵ Kala maba ko kerukeru kale kiolani ta kala pitopito ala ṉaniu inio qulepo ala ṉaniu kama ṉaniu poso kasi azo, melai mata kala ta koa kiadama ṉaniu poso ti omadeu podepodeti ama kiola. Qo ṉaviṉavi ta qo vinaeko qo ṉaviṉavi ko kerukeru kikolani.

⁶ Vo tabu o ikani ko ṉaniu ta ovai rauraeka vo Baṉara koa ṉaniu, ni vo o kuovo ala ko marabau vo melai ovai rauraeka vo Baṉara koa keve kale kude, ni vota o ilusiva vo Baṉara.

⁷ Ako puliala anime azo kala ta o rovea saevo ni vou o kiada kaqe.

⁸ Ako anime me jaeva keru, animeta me jaeva inio vo Lekasa kaqe, ni me vouva keru, animeta me vouva vo Lekasa kasi. So sole anime mebeta saeva keru ma me vouva keru, animeta vo Lekasa ko mela.

⁹ Ako vo Karisito ta o vovi ni mata o saeve voukale azo, tu vota se saevomu ni se voumu vo Lekasa o elo.

¹⁰ So sole ṉo, ṉo pui ṉo quani ṉa ko marabau, ta noi sole inio ṉota kuiripato saṉa ṉo iva ṉovo visi? Ni ṉo, ṉo utu kuani ṉa kiadama sailao poso, noi sole inio ṉota ṉovai kedua ṉovo visi? Ako animea kiada mela ta me lojou vo Baṉara ko kuleto voko titizato kale sole.

¹¹ Ako Tabu ama Riki ta eri nio kikolani sole, “Tuvevo aṉata saevola Baṉara lala, kiola vo Baṉara, Kiadamu ta ke iqeiqeovou aṉako kuleto, ni kiadamu ta kelai bazutou aṉa, ta aṉata vo Baṉara lala inio kio, kiola.”

¹² So sole animea kiada mela ta me qasekou animeko saevo vo Baṉara kasi.

Ṉota pui pivo ṉovo visi

¹³ So sole, animeta me epezou kuirikinio me ṉavio kude, melai kerukeruekomo tu meta pui me erekou ko mevo visi tupara ko ivo ama quli ni ko pivo ama vo sarueko kale.

¹⁴ Aṉako tuvevo puevo kale vo Lekasa Jisu inio aṉata tuvevo a ika ta puliama sailao ta ko kaitizia tu kuo vo Baṉara ko kelokelozato kale; melai kala maba ta tuvevo o ikou voko tuvevo puto kale ta kama sailao ta ko kaitizia kio inio, kota tabu ikio vokasi tu o kuo.

¹⁵ Ṉota tiṉoliṉoli ṉovai ikou ṉovo visi koa sailao ṉoṉo quako kale inio ṉota roquano pidea laṉa. Ṉota pui vai niumaeko voa maba koa sailao ko ṉoṉo quako vo lula Karisito ova vovini!

¹⁶ Ṉota pui ruqe taka iko koko ṉi ko quli ṉo uri ka kiṉolako quli.

¹⁷ Ako vo Baṉara ko lekasa puo kale elo ta pui sailao ko kuo ko kio kale ama ni ju ko nozueko kale, melai kota sidopu, ni bule kale, ni zoleilo kale vo Tabu ala Auvana o puarikake kale inio sole.

¹⁸ Voa maba vo ova nabuluputani vo Karisito koa keve kale ta o zoleva vo Baṉara ni vota uri ala se maba madu kasi.

¹⁹ So sole animeta me zuatikou kiada keru ko bule ko erekako quli ni ko omadeu pizatimelo ko elo ama quli animea kiada mela.

²⁰ Ṉota pui kai niumaeko vo Baṉara ko iruruputo kama sailao poso ṉoṉo quako kale. Ako kiadama sailao ta keazato ko quli sole, melai pui uri tu kala ta o saruilo ṉoko keazato kale.

²¹ Melai ṉoko kuo ko marabau, ni ṉoko nozueko ko vaini ko ju, ni ṉoko ereko kama quli ta ko pivou ṉovo visi, ta koroto ama quli ta pui ṉo quovou ni pui ṉo nozuekou ni pui ṉo erekou ko quli.

²² Ko ṉoṉo duvevo puekako quli komi quli kale ta ṉo ni Baṉara ko tiania mutamutale kobeta elo. O zoleiva tisoiko voa maba vo pui niuniala okai evani vo kova zariziako quli kale!

²³ Melai vota niuniala okai elou ko vo o kuako quli nio Baṉara ko kuiripato ta ko vovou vo so keru vo o kuovou keru koa sailao, ako vota o utu ereka oqu pide sole. Ko oqu pide ko ereivako quli ta sarueko ikio.