Romu 13 - BAṈARA KO VAIRU AMA LEVELEVEO

Animeko koidi se qavuna poso kasi ama

¹ Kiadamu ta ke zorimo se qavuna madu, ako puliala ta pizato sala Baṉara pui o zarievo vo tea. Ako vo Baṉara kasi azo inio ke koani ko pizato sole.

² So sole voa maba vo o bikoirikani vo qavuna ko pizato, ta o bikoirika vo Baṉara o lojoekema pizato; ni vo so o kavani ta kuiripato saṉa ota eva o ṉavi ti ota titiziovou.

³ Ako se qavuna madu ta pui ṉaloṉalo amu se uri ke erekani kasi, melai seta ṉaloṉalo amu se ruqe ke erekani kasi. Ṉota pui ṉoqa zaria taka ṉalo seko pizato kio? So ko kalou ta ṉota ereka ko uri ama quli, nio seta ke rauraeṉou ṉo,

⁴ ako se inio vo Baṉara ko nabulu poso seke tauveṉani ṉo ṉoko uri ko ereko kale sole. Melai ṉota ruqe ṉo erekou ta, ṉota ṉoda ma ṉalou inio se, ako seko koqotato ko pizato ta tuvevo ama sole. Seta Baṉara ko nabulu poso sole seta ke ereka vo Baṉara ko koqotato se ruqe ke erekani kasi.

⁵ Kokale avo meta zorimomo se qavuna madu pui vo Baṉara ko koqotato ko tipaeko ko kio kale avo, melai meko uri ama vatolo lulueko kale.

⁶ Sokale avo inio mata meta me dabarika ko takisi kiada keru, ako sea raura kamu ta keva nabuluputani vo Baṉara so keru seke ereka keru seko iruruputo sole.

⁷ Sole meta vouvaekomo meko lipulipu meko tabariko kale meko takisi, ni meta tama paṉaomo ni rauraemomo sea kiadamu, ako seta ke male tu so me imo sole.

Kai tauvekiniomo

⁸ Meta vouvaekomo kiadama meko lipulipu, melai roquekinio ko lipulipu ta kobeta saevou kiada keru. Ako vo o erekani soama roquano ko keve ta o lulueka ko Bazu kikolani sole.

⁹ Komia Bazu poso eri kikolako, “Ṉota pui zavemato, pui vouvato, ni pui kuilo, ni pui viluloqu tavai elo edolola maba ko quli” — kiadama soama quli, ni mata kiadama ko jari ama ta omadeu elo ko eva omadeuma bazu kale, “Ṉota roquema kiadamu omadeuvo ṉo ṉavi ṉo roquiva jari.”

¹⁰ Ṉota ṉo roquevou kala, nio ṉota pui ṉoba niumaevou vo; so sole vo o roquanani inio o zorikani koa pado ama Bazu kikolani.

¹¹ Meta erekomo ko quli, ako meta me baqumuka ta meko toirato ko taku ta lula kota baroa sole. Ako anime meqai pakiovo ama taku ta lula sipole erisaṉa, pui anime me duvevo pute keru jaria vaṉa sole.

¹² Ko ipu ta sipole kota paloasou, ni vo ṉaniu ta matu sipole erisaṉa. So sole animeta me epezo ereko ko kutumana ko quli, melai animeta me zolaeko ko sidopu ko bako, zakaremu kale ama pazokinio ko.

¹³ Animeta sidopua talio me elo ṉaniu ko zakaremu kale, pui olavoputo kale ni piza kama ju ko nozueko kale, ni pui sasave ni zata ko iruruputo kale ni ubutianiama pauvezato kale, ni pui pazokinio ma konoilo kale.

¹⁴ Melai meta emo vo Lekasa Jisu Karisito tona, ni epezomo kerukerueko meko tupu ko zario ni pui taka lulueko koko vatolo.