Romu 11 - BAṈARA KO VAIRU AMA LEVELEVEO

Vo Baṉara ko akoekato sama roquano Izireli tona

¹ Noi nio, vo Baṉara ta o ṉamume ni o edolime o ṉaviko maba madu kio? Maba pui! Ako aṉa inio kala pado lala Izirelia lala sole, ni aṉa inio kala pado vo Ebarahami ko vikuvikula kalea lala, ni kala pado vo Benijimane ko toutou kalea lala sole.

² Vo Baṉara ta pui opa ṉamume o ṉaviko maba madu, se lula o pitoemeni koko tanitanila keru. Meta meqai nianiia Ilaija okai pesiovima quli, koko kasekako kale, so keru vo o olaquapute keru Baṉara kasi se Izireli qoqono mai buzaro kale:

³ “Baṉara, seta lula ke vouvaema muli ṉoko poropita madu ni lula keta ṉa niaqarika ṉoko tabu ama siqato ko sara poso; ti aṉa a qiada inio abeta eva, ni seta kebe madoeka inio tu ke vouvaelo aṉa,” kiolake.

⁴ Ni Baṉara ta eria opato ova evake vo, “Aṉata lula a edolima sikeura vuro maba se a ṉaviko madu se pui nio ke ilusivani vo lipalipa kala baṉara Belo,” kiolake.

⁵ Ni so jari inio erisaṉa: kama poso madu inio iniseana kebeta eva, vo Baṉara o pitoemani voko pakiezato sama roquano kale.

⁶ Voko pitoto ko raki ta voko pakiezato sama roquano ikio ni pui seke erekako quli. Ako vo Baṉara ko pitoto ko raki ta maba ko erekako quli tea, voko pakiezato sama roquano ta pui tuvevo ama puaro ni katizato ikio kopa elo.

⁷ Sole komi ta koko paitopaito. Se Izireli amu ke vailikema quli ta pui kepa koe. Melai kama poso madu vo Baṉara o pitoemeni pala inio ke koe ko; ni matu kubo madu ta zokele bulo o imake ni pui kepa viqe vo Baṉara ko nokao.

⁸ Ko Tabu ama Riki kikovevo jari, “Baṉara ta udo ota ma ikake seko kerukeru ni bulo poso; koa taku keru azo ti kobeta baroa vairutu ta seta pui ke rovea kelokelozato ni viqaviqazata.”

⁹ Ni vo Devita ta eri kiolake, “Seta ke qoloilou ni ke sipatiovou seko ṉojola poso kale! Ni seta ke pialou, ni ke koqotailou!

¹⁰ Seko vilu ta leqa ko elou ni seta pui kepa roveovou kelokelozato; ni seko tapata poso ta ko lokulokuemou se kiadama taku keru,” kiolake.

¹¹ Noi nio, so keru se Jiu amu tupara ke eve keru, ta keta piavi ti pui mata kepa tova lojolou inio, kio? Maba pui! Melai se Jiu amu ta keta piavi inio. Sokale avo inio vo Baṉara ta o pakiema se pui Jiu amu, tu se Jiu amu ta kema konoilou se.

¹² Se Jiu amu ko bikoirato kale ta ko puratake vo Baṉara ko matuma mauruto peuru ma peuru kale, ni se Jiu amu kekai suatema matuma mauruto ta ke koe se pui Jiu amu. So sole animeta me qerukeruekou koa matu ti matuma mauruto ko purato ama animea kiada mela kasi so keru vo Baṉara o pakiemou keru se Jiu amu!

Se pui Jiu amu kekai koevo ko pakio

¹³ Aṉata a besia erisaṉa me pui Jiu amu mela kasi: Vo Baṉara inio o soroele aṉa tu aqai bazubazuto voko Uri ama Bazu mea pui Jiu amu mela kasi, so sole aṉako komia iruruputo ta matu qulepo ama ka kiavou.

¹⁴ Esa komi kale inio aṉata viluloqu saṉa a imou se Jiu amu a ṉavi kale amu, nio kake ta ke roveovou pakio.

¹⁵ Ako Baṉara omai kedui keru se Jiu amu so keru inio peuru ma peuru kale amu ta ke koe ko odouvo. Sole loma ikio ko ereilou se Jiu amu ke kovou keru ko odouvo! Se voumu ko mata saevo voukale azo jari ama aqasiele ta ko elou!

¹⁶ Ko kuleto ama bereti ko volevole ta ko katiziovou Baṉara kasi nio koa kiadama bereti volevole ta maurumauru ama ikio kota elou, so jari kala ore ko tataiqili ta ko katiziovou vo Baṉara kasi nio koa kiadama voa ore ko kata poso melai o ṉavi Baṉara ko ikio kota elou.

¹⁷ Kama kata poso koa mabamaba kama Olive ore ko ta kota lopai ni kama piru ama Olive ore ko kata ta kota nasoi ko tona ni Baṉara ta o qotupike. Ṉo pui Jiua laṉa inio koa piru ama Olive ore ko kata jaria laṉa ṉoṉo nasoivani ṉa vo Baṉara ko mabamaba kama Olive ore topi tu ṉo qovo voko matuma mauruto.

¹⁸ So sole ṉota pui mai kedu seke lopaini omadeuvo koa kata poso koko lopaivako jari. Ṉota pui ṉo male tu ṉo aikailo. Ako ṉota kala pado kata ṉa inio sole; ṉota pui ṉo dauveka ko ore ko tataiqili—melai ko tataiqili kio kobe tauveṉa ṉo.

¹⁹ Melai esa ṉota eri kiṉovou, “Uri, melai koa kata poso ta kota lopai tu aṉako zae kola vaeko.”

²⁰ Kota tuvevo. Koa kata poso ta ko lopai ako seta pui kepa tuvevo pute sole, melai ṉota pui ṉo lopaiva ako ṉota ṉo duvevo puta sole. Melai ṉota pui raurailo, melai ṉota balauve.

²¹ Vo Baṉara ta pui opa zarieme se Jiu amu tu ke sarueko, se tuvevo ama kata poso jari amu; so sole vota pui opa zariemelou me pui Jiu amu mela tu mebeta zio sarueko.

²² Kokale inio animeta me qea vo Baṉara ko roquemo se maba madu ni voko tapata imo se. Vota tapata o ima seke vaevani vo, melai voko roquano ta me tona—meqai noqoilou koa roquano tea. Melai meta pui me noqoilou tea, me melai meda kobuilou.

²³ Melai se Jiu amu ta pui vinavina ke elou seko pikipikinio puto kale, inio vo Baṉara ta o vaitoemou se voko roquano kale sai se lula koa ore ko kata jari ke evekoi, ako vo Baṉara ta o roveovou ereko ko quli sole.

²⁴ Me pui Jiu amu mela inio omadeuvo koko lopaima piru ama olive ore ko kata jaria mela ni vairua qotupo ko evema mabamaba kama olive ore topi. So ta pulia quli ko kavani nio, melai Baṉara inio o roveovi ereko. Melai se Jiu amu ta omadeuvo koa mabamaba kama ore jari amu; ni kota matu olu vo Baṉara kasi tu vota mata o tova nasoekou koko lopaima kata poso ko ṉaviko ore topi.

Baṉara ko akoekato sama roquano kiadamu tona

²⁵ A visi poso, ikoana kama pado mutamuta kama tuveano ko aṉa a mela zariako me tu kai nianiio, ako me baqumukou ko inio pui meqai abarou meko nianiio. Eri nio koa mutamuta kama tuveano; se Izireli amu ko pikipikinio puto ta pui noqola kama kopa elou, melai kota ko epezou so keru sea poso se pui Jiu amu ke kilo amu vo Baṉara kasi ke okotou keru.

²⁶ So inio kiadama Izireli amu kekai pakiovo avo. Omadeuvo ko Tabu ama Riki kikolani jari, “Vo Pakio ta o kilou Zaione azo ni vota o ṉamukou kiadama ruqe poso vo Jekopi ko vikuvikula kasi azo.

²⁷ Aṉata a qatimou se aṉako leveleveo so keru aṉa ada ma akoekou keru seko sarueko poso,” kikolako.

²⁸ Ako seta ke bikoirika ni ke vaeka ko Uri ama Bazu, ni kokale avo inio se Jiu amu ta vo Baṉara ko kana madu ke evake, me pui Jiu amu mela meme ṉeamukani mela koa Bazu kale avo. Melai Baṉara ta o pitoeme seko taite poso ni mata kokale avo inio vota o roquema se Jiu amu.

²⁹ Ako vo Baṉara ta pui o besieka voko kerukeru se vo o pitoemani ni se vo mauru o imani tonama.

³⁰ Lulavo me pui Jiu amu mela ta me bikoirive vo Baṉara; melai erisaṉa meta me qoa ko roquano ako se Jiu amu ta ke bikobikoirata sole.

³¹ Erisaṉa se Jiu amu ta ke bikoiriva vo Baṉara, melai seta ke kovou voko roquano, ako meta me qoe voko roquano sole.

³² Ako vo Baṉara ta o vaemake kiadama maba poso seko bikobikoirato kale tu sea kiadamu ta ke kovou voko roquano.

Ilusato Baṉara kasi

³³ Vo Baṉara ko nianiio ta matu ti matu raura kama ni voko paqumuko kiadama quli ta noqola kama! Lala inio o roveovou kaseko voko vatolo? Ni lala inio okai nianiiovou voko kalo?

³⁴ Omadeuvo ko Tabu ama Riki kikovevo jari, “Lala inio o vakakuka vo Baṉara ko kerukeru? Lala inio o rovea kativo vo ko vakakato?

³⁵ Lala inio vo lula o kativani kama quli vo Baṉara, tu vo Baṉara ta lipulipu saṉa o elou? Puliala!”

³⁶ Ako vota lula o ereke kiadama quli, ni kiadama quli ta kobeta eva vokale tu kota voko. Sole animeta me ṉaṉaidara puevou vo Baṉara latau ṉaniu ni ka ṉaniu! Emeni.