Qelesia 4 - BAṈARA KO VAIRU AMA LEVELEVEO

¹ Aṉa kialani ta eri. Voa meqora vo o kovo ala vovo mama ko lomaloma ta o meqora inio, ni voko silo ala keru vota pui edolovo se mabaku poso kasi azo, obe ṉeamukou melai kiadama lomaloma.

² Ni so keru voko silo ala keru, vota o zorimou se vo ke vati vailani. Melai so keru nea meqora o rapukou keru ni okai barolou keru koa sabere vovo mama ova kasekema inio o rupasiovou.

³ Ni anime melai so inio lula animeta se meqora poso jari. Puliako Karisito kilo animeta mabaku jari me evake animeko vai nabuluputo kale vo Baṉara piza kama bazu poso ko lulueko kale.

⁴ Melai so keru koa tutututuki ama taku ko baroi keru inio vo Baṉara ta o soroevake o ṉavivo Meqora, ni voa Meqora ta o alilake rekoreko kale ni o zorikake vo Mosese ko Bazu voko saevo kale.

⁵ Ni vo Baṉara ta o erekake komi quli tu vovo Meqora ta oma tatabaraeko ko rupasio se mabaku kekai eveni vo Mosese ko Bazu, tu seta vo Baṉara ko meqora poso o imo.

⁶ Ni meta vo Baṉara ko meqora poso mela. Sokale avo inio vo Baṉara ta o soroeke vovo Meqora ko Auvana animeko bulo poso kale. Ni voa Tabu ala Auvana kale inio meta eri kimela meko bulo ko vualavuala kale, “Mama, aṉavo Mama ṉa!” kimela.

⁷ So inio erisaṉa meta pui mabaku mela, melai meta vo Baṉara ko meqora poso mela, ni vo Baṉara ta o katimelou me vo leveleveo o mela ikema, ako meta voko meqora poso mela sole.

Paula ko tiṉoliṉoli mai elo se Qelesiama lotu qoqono

⁸ Ni koko paloasako taku kale meta pui meba vai nianiiovi vo Baṉara ni meta se lipalipa kama baṉara poso ko mabaku mela.

⁹ Melai erisaṉa inio meta mevai uria nianiia vo tuvevo ala Baṉara, ma esa matu uri tu eri kiavou, voa tuvevo ala Baṉara ta o melai nianiia me. So sole loma kaqe inio meta mata me vaita koa lekuleku ama ni utube ama bazu kale ko meme luluekema jari ama koko paloasako taku kale? Meqai zaria tu mata mabaku me elo?

¹⁰ Ako meta mebe lulueka inio Jiu mu ko ṉaniu poso, ni kaboso poso, ni seko ṉojola poso, ni sabere poso ko nianiiekato sole.

¹¹ So inio aṉata duki a mela eva me, ako aṉako ṉalo ta aṉako iruruputo a erekako mekasi ta esa utu ama kota eva sole.

¹² Ni aṉata a mela titia me a qaka ni visi poso mela, tu meta aṉa jari emo meko pui kai mabaku puilo Jiu mu ko Bazu, ako aṉa melai me jaria lala inio so keru mekasi a eve keru sole. So keru inio meta matu uri ama kalo me erekake aṉa kasi.

¹³ Ako meta meqai nianiia, kuleto aṉa mekasi a quevi keru kai bazutole ko Uri ama Bazu ta aṉako kilo ko raki ta aṉata ada verepe.

¹⁴ Ni tuvevo aṉako vere ta kubo tapata ko katimele me, melai meta pui meba lai kaikuape aṉa ni pui meba perile aṉa. Melai meta me baroekilake aṉa omadeuvo aṉata vo Baṉara ko mateana jari ma omadeuvo aṉata vo Jisu Karisito jari!

¹⁵ Ni meta melai matu zoleike. So sole lai nio erisaṉa koa meko lai zoleilo? Aṉata pui ukaka a ika meko so keru ama zarizari ama kalo, ko roveovi tea meta mela lokoeko inio meko vilu tu me qatilo aṉa.

¹⁶ Melai erisaṉa aṉata mevo kana lala kimela, rouka aṉata abeta ola melai bazueko koa omadeuma Uri ama Bazu melai.

¹⁷ Meko lipalipa kama nianiiekato ko maba poso ta ke matu madoeka tu ke sebiemelo me, melai se kekai zariako quli ereko ta pui uri mekasi, ako seta ke sebiemela me tu ke pitasimelo me sole eṉe kasi azo. Ni seko zario ta meta zarizari mema elou se.

¹⁸ Ni kota uri tu zarizari elo uri ama quli kale, ni kiada keru ti so me qalou, melai pui aṉa mekasi abeta eva keru ko kiada.

¹⁹ Meta aṉako meqora poso jaria mela. Ako aṉata a melai matu tolaiva me omadeuvo ko niania ta ko tolaiva jari, so keru koko vijara keru. Ni aṉata soa tolailo abeta elou, ti kobeta barolou meko Karisito jari elo.

²⁰ Ni aṉata aqai matu zaria tu elo me sase erisaṉa. Ako so tea aṉata ada roveo nio uria melai rukueko aṉako kerukeru kora kale. Melai erisaṉa ta matu niuniala a melai eva me!

Ebarahami ko omuqa reko ko podepodeti, Heqa mabaku ama ni Sera pui mabaku ama

²¹ Me mebe kai zariani mela elo vo Mosese ko Bazu ko vima ta bazuelomo, meta meqai nianiia koa Bazu kikolani, ma?

²² Ako ko Tabu ama Riki kikolani ta eri nio sole. Vo Ebarahami ta omuqa meqora sala. Ni kala pado meqora ko niania ta mabaku, melai kala pado meqora ko niania ta o ṉaviko reko, pui mabaku ama.

²³ Ni vo Ebarahami vo meqora koa mabaku kale o alileni ta maba ko kalo kale o alileni. Melai voa meqora vo o alileni o ṉaviko reko kale ta Baṉara ko leveleveo kale o alileni, koa leveleveo o ikema Ebarahami kasi.

²⁴ Ni komi ta ko ereka ka pado mudalidali anime kasi. Ako nioqia omuqa rekoreko ta omuqa piza kama korokoroti Baṉara ni maba ko tiania jari sole. Ni omadeu piza kama korokoroti ta vo Baṉara ko Bazu Mosese o kativema Sainai sopu kale. Ni sea maba poso komia Bazu kale ke saevani ta mabaku madu. Ni koa niania Heqa mabaku ama ikio ko mamola pueka koa korokoroti.

²⁵ Sole kota Sainai sopu jari Arebia ni kota mata ko mamola pueka komia miduku kale ama Jiu mu ko matu peuru Jerusalema. Ako Jerusalema matu peuru ta mabaku niania jari, ni saizama maba poso Jiu mu ta koko mabaku meqora poso jari, vo Mosese ko Bazu ko mabaku madu.

²⁶ Melai ko aukale ama Jerusalema ta koa reko Sera jari, ko pui mabaku ama, ni animeta koko meqora poso mela, pui mabakua mela.

²⁷ Ako ko Tabu ama Riki kikovevo ta eri nio sole, “Jerusalema ṉota zolei, ṉo padu ama rekoreko jaria lana, ni ṉota keraovi ni kati upaupate ko zoleilo, ṉo pui ṉo lainikani ṉa ko vijaro ko tola. Ako ṉota lasive o vaeṉeni ṉa jari, melai ṉota ṉo qovou matu kubo meqora, kokai paloasako lasive sama rekoreko sole.”

²⁸ A qaka ni visi poso mela, meta vo Baṉara ko meqora poso mela o ṉaviko leveleveo kale, omadeuvo vo Aisake jari, koa pui mabaku ama reko vo meqora.

²⁹ Ni koa taku keru koa mabaku ama reko Heqa vo meqora vo o alileni maba ko kalo kale ta o matu niumaevake voa pado meqora vo o alileni Baṉara ko Auvana kale. Ni so pado jari nio vairutu.

³⁰ Melai noi nio kikolani ko Tabu ama Riki? Ko kikolani ta eri nio, “Butueka koa mabaku ni kovo meqora! Tu voa meqora vo o alileni o maba reko kale inio o ṉeamukou vovo mama ko lomaloma melai koa mabaku vo meqora ta pulia quli opa ṉeamukou.”

³¹ So sole a qaka ni visi poso, animeta pui koa mabaku ko meqora poso jaria mela, melai animeta koa maba reko ko meqora poso jaria mela.