Pilipai 3 - BAṈARA KO VAIRU AMA LEVELEVEO

Tuvevo ama sidopu ta vai oqu vo Karisito

¹ A visi poso, komi ta aṉako tovatovama pesio mekasi; meta matu zoleimo vo Baṉara kale. Ni pui tapata ikio aṉa kasi tu aṉata a rikieko koa omadeuma quli mata mekasi tu ko tauvemelo me meko pakio kale.

² Meta tama balauvomo sea ruqe ama maba poso sea siele jari amu seke zuruzuruemelani me tu me moveko meko tupu tu ko mamola pueko ta meta vo Baṉara ko mela kio.

³ Ako anime inio tuvevo avole vo Baṉara ko mela anime me ilusivani mela vo Baṉara voko Auvana kale ni anime meqai rauraivani mela animeko omadeu vati elo vo Jisu Karisito, ni pui me qerukeruekani mela ta Baṉara ta sidopu mela kiola animeko tupu kale ama saevo kale avo.

⁴ Ni aṉata soa kerukerueko aṉako tupu kale ama saevo a elou, ta aṉata maba pulia quli lala inio. Ni kala ta eri kiovou, “Aṉata koko kalo sate inio a qerukerutani ta Baṉara ta sidopu la kiola aṉako tupu kale ama saevo kale avo,” kiovou, ta vota okai nianiiovou ta aṉa inio matuma kalo salala tu soa kerukerueko a elo a ṉaviko saevo.

⁵ Ako aṉata a movei siotolu ṉaniu ko tova a alila Saita, ni aṉata Izireli qoqono kalea lala vo Benijimane ko toutou kalea lala sole. Ni aṉata Hiburu pesioa lala ni kiadama aṉako taite poso melai Hiburu pesio mu. Ni aṉata Paresea lala sole vo Mosese ko Bazu ta matu qulepo ama aṉa kasi.

⁶ Ni aṉata a qati matu parani puteni lala Jiu mu ṉela ko lotu, so inio aṉata a naquemake seke tuvevo puevani vo Jisu. Ni puliala ta ota la kea aṉako saruilo vo Mosese ko Bazu ko lulueko kale.

⁷ Ni koa taku kale komia kiadama quli ta matu qulepo ama aṉa kasi, melai komi quli ta utube ama ka kialake tu a ṉeamuvo vo Karisito.

⁸ Ni pui koko kiada, melai aṉata vairutu melai so ka kiala ta koa kiadama quli ti utube ama, ako aṉata a qati podetika sole aṉako vai nianiio vo Jisu Karisito aṉavo Lekasa. Ako vo Karisito kale avo inio aṉata a vaeke sole aṉako lulama saevo ni ko quli ta utube ama ka kiala, tu aṉata a ṉeamuvo vo Karisito

⁹ tu aṉata vovo lala. Nio erisaṉa vo Baṉara ta sidopu o ila aṉa, pui aṉako lulueko kale Mosese ko Bazu, melai aṉako vai oqu kale vo Karisito.

¹⁰ Ako aṉako matuma zario ta aṉata avai nianiiovou vo Karisito ni voko mata saevo voukale azo ko puratikako pizato, ni aṉata aqai zomanou voko tolailo, ni aṉata aqa zaria tu talio zoripato ko keve vo jari ti kobe lati baro aṉako vou.

¹¹ Koa aṉako matuma zario ko zuato ta a ṉavi ta mata a jaevou voukale azo sole.

Kovo ko reketekete

¹² Aṉata pui aqai rairizia ta aṉata lula vo Baṉara olai zariani jari a qavani lala, melai aṉata a zuatika tu Baṉara olai zariani jari a qalo, tu a qovo koa soama saevo ko reketekete, ako vo Karisito inio okai zaria tu aṉata a qovo sole. Ni Sokale avo inio vo Karisito ta o ṉavivo lala o ile aṉa.

¹³ A visi poso, so inio aṉata aqai nianiia ta aṉata maba pui nio a qoa koa reketekete, melai omadeu quli kio aṉata abe ereka; kiada keru aṉata ukaka a ika ko quli aṉako tova vasi ama quli, melai a matu madoeka tu a qovo koa reketekete ko aṉako kuleto vasi ama.

¹⁴ So inio aṉata a matu madoeka tu Baṉara olai zariani jari a qalo, tu aṉata a qovo koa soama saevo ko reketekete. Ni koa reketekete ta aṉako, ako vo Baṉara ta o nokaele sole aṉa aukale ama saevo kale vo Jisu Karisito kale tu a qovo ko.

¹⁵ Ni animea kiada mela me muqarani mela auvana kale ta me zuatikou koa omadeuma kalo. Melai kake mela ta edolovo me ikou meko kalo, ta vo Baṉara inio zakaremu o mela ikou.

¹⁶ Melai animeta mebeta zio lulueko koa tuveano ko anime lula meqai baroako.

¹⁷ So sole a visi poso, omadeu vatolo kale meta madoekomo lulueko aṉa a qavani. Ni didiemomo seke luluekani koa sidopu ama kalo, ako eṉeta kasa ṉe ika ko tuvevo ama keve ko meme lulueko ama sole.

¹⁸ Ako matu kubo taku inio aṉata a melai bazueka eri ama quli, ni vairutu aṉata a melai bazueka mata aṉako deumu sate: ako matu kubo maba madu ta lula kana ke ika sole vo Karisito ko korosi ko bazu.

¹⁹ Ako koa kalo se kekai saevako ta ko odiema sole se heli kale ama noqola tolailo kale, seta pui keva nabuluputa sole vo Baṉara melai seta ke ereka sole seko tupu kokai zariako quli. Ni kekai raurarauraiva sole koa qurato sama quli, ni kiada keru viluloqu kekai eva komia miduku kale ama quli.

²⁰ Melai animeko ṉisa peuru ta aukale. Ni animeta mebe tareva animevo Pakio, animevo Lekasa Jisu Karisito vo o kilo ala aukale azo.

²¹ Ni vota o besiekou animeko lekuleku ama tupu, ni vota o ṉaviko ṉaṉaidara kama tupu jari o imelou anime. Vota o erekou ko quli voko pizato kale, koa pizato vo okai lekasa puako kiadama quli kale.