Pilipai 2 - BAṈARA KO VAIRU AMA LEVELEVEO

Karisito ta o zarazarai sai kazo inio mata vota o raurai

¹ Meta meda pizata ako meta omadeu saevo me evani mela vo Karisito sate sole, ni meta meda patuka ako vota o roquemela sole. Ni meta me bairumua vo Tabu ala Auvana sate, ni meta me qerukeruekinia ni me roquekinia me ṉavio kude voko pizato kale.

² So sole meta matu zolelomo aṉa meko omadeu kerukeru, omadeu roquekinio, ni meko omadeu vatolo ni zuato kale.

³ Ni meta pui me erekou kama quli muino ni aikailo kale, melai meta zarazaraimo ni tama paṉaomo se edolomu saita inio me ṉavi.

⁴ Ni meta pui me qerukeruekou me ṉaviko uri pala, melai meta kerukeruekomo mata edolomu ko uri.

⁵ Ni meko saevo kale meta kerukerutomo ni kamo vo Jisu Karisito o kaevo jari.

⁶ Ako vo Jisu Karisito ta Baṉara jari kiadama quli kale. Melai voko Baṉara jari elo ta pui opa kai kaite tu o vaeko.

⁷ So inio vota o vaekake voko peuru Baṉara sate ama, ni vota pulia quli jari ota evake o ṉavi. Ni ota alilake maba jari ni nabulu ota evake.

⁸ Ni vota o zarazaraivake voko maba elo kale ni okai taliake zoripato ko keve ti kobe vati baroake voko vou, koa vou korosi topi ama.

⁹ Sokale avo inio vo Baṉara ta o matu rauraevake vo, raura kama zaekale kiadama zae azo, ni vota o kativake ko raura kama ṉi kiadama ṉi azo.

¹⁰ Ni so inio vo Jisu ko ṉi ko rauraeko kale inio kiadama aukale ama mateana madu ni miduku kale amu ni miduku ko omele amu ta keva iqeiqeovou,

¹¹ ni eri kikevou, “Jisu Karisito ta animevo Lekasa inio,” kikevou. Ni so inio kiadamu ta ke rauraevou vo Mama Baṉara.

Vo Baṉara o mela zariani jari me qalo

¹² A baerebaere poso, meta kiada keru zoripato ko maba poso mela, ni meta me zorive vo Baṉara so keru aṉa me sate a eve keru. Ni matuma quli erisaṉa ta so jaria zoripato ta meta mebeta elou aṉa puliala abe elou mekasi melai. So sole meta beta olamo tava panao vo Baṉara ni beta olamo taka ṉalo ko sarueko, tu erekomo koko malezikako me Baṉara lula o pakiemelani mela.

¹³ Ako vo Baṉara ta obeta iruruputa mekasi tu zarizari o imelo me tu meta me zorikou voko vatolo.

¹⁴ Ni meta me erekou kiadama quli ṉuruṉuruo pide ni aivekinio pide,

¹⁵ so inio meta kuiripato pidea mela ni bulebulea mela vo Baṉara ko korokoroti ama meqora poso mela meda elou meko saevo kale se kaido ama maba madu ni boutare samu ko valuvalu. So inio seko tiania meta talolomo suti jari.

¹⁶ Ni meta mai bazuekomo ko tuvevo ama saevo ko bazu. Ni meta me erekou ko inio aṉata ada matu zoleilou so keru vo Karisito o vaitou keru ako aṉako matuma iruruputo mekasi a erekema ta pui utu ama ko eva sole.

¹⁷ Ni meko tuvevo puevo vo Baṉara ta meko siqasiqa jari ko meme qativako vo Baṉara. Ni aṉata esa a vouvou ni aṉako vou ta mata kama pado katizato vo Baṉara kasi ko elou meko tuvevo puto ko siqasiqa ko topi tiniavo. So kobe kalou ma pui melai aṉata kolai sukatou ko zoleilo me sate.

¹⁸ Ni me melai matu zoleimo aṉa sate.

Timoti ni Epaparoditasi

¹⁹ Ni vo Lekasa Jisu ko vatolo ko elou ta, mainio aba soroevou vo Timoti mekasi, ni aṉata ada matu zoleilou tu a melai nianiiovou me voko bazu kale.

²⁰ Ni aṉata puliala a vea Timoti jari ala maba, vo tuvevo avole o kerukeruekani meko uri.

²¹ Ako kake maba poso ta ke ṉaviko zario pala ikio ke kerukerueka sole melai pui ke kerukerueka vo Jisu Karisito oka zariani.

²² Melai meta mevai nianiia vo Timoti vota aṉa sate o iruruputeni, ni eqeta eqea saidi jari qekai bazubazuteni qela ko Uri ama Bazu.

²³ So inio a bokaovou ta aṉata a joroevou vo Timoti mekasi so keru aqai nianiiovou keru ko quli ko ereilo ama aṉa kasi.

²⁴ Ni aṉata tuvevo a ika ta animevo Lekasa ta o tauvelou aṉa tu aṉata a qilou matu sipole mekasi.

²⁵ Vo Epaparoditasi ta aṉavo visi Karisito kale. Vota o iruruputani ni o nabuluputani aṉa sase tu eqeta qeva pazokinio vo Karisito. Ni aṉata avai zariovi nio meta me joroeve tauvelole aṉa sole aṉata mata a vaitoeva mekasi.

²⁶ Ako vota oka matu zaria tu o mela lelo sole mea kiada mela. Ni vota tiṉoliṉoli ota eva ako meta me viqe ta vota ota verepe sole.

²⁷ Ni matu tuvevo vota ota verepe ni sipole ota vovi. Melai vo Baṉara ta o tauveve vo ni o tauvele aṉa, tu aṉata pui matu duki a elo.

²⁸ So inio aṉata ava matu zaria tu a vaitoevo me ṉavi kasi tu meta me velou ni me zoleilou ni aṉako duki ta saratata ko elou.

²⁹ Ni meta me baroekivou vo zoleilo kale ako vota mevo tamania kale ala sole animevo Lekasa kale, ni meda ma paṉaovou soama maba poso vo jari amu,

³⁰ ako vota sipole oka vouva sole vo Karisito ko iruruputo. Ni vota o toraekake koa tapata tu o tauvelo aṉa so keru me pui meba roveovi keru tauvelo aṉa.