Matiu 2 - BAṈARA KO VAIRU AMA LEVELEVEO

Seke kuevini ṉaniu ko peatakoi vasi azo

¹ Vo Jisu ta o alilake Betelihema peuru kale Jiudia rana, koa taku vo Herodi aikovakova obeta eva keru sai. Nio puliako tu keu kake maba poso ke lezumatani ko suti poso ko kavani ta ke kuevake ṉaniu ko peatakoi vasi azo Jerusalema peuru kale.

² Nio seta eri kikelake, “Lai nio voa meqora se Jiu amu vo aikovakova o elo ala o alilakoi? Ako eneta lula ṉe qeve voko alilo ko mamola puekako suti ṉaniu ko peatakoi vasia rana, nio eṉeta ṉe queva tu ilusivole vo,” kikelake.

³ So keru vo Aikovakova Herodi o viqa keru ko quli ta matu tiṉoliṉoli ota evake ni sea kiadamu se Jerusalema peuru kale ke eveni.

⁴ So sole vota o padoemake kiadamu se raura kama siama madu ni vo Mosese ko Bazu ko nianiiekato ko maba madu, nio o kuimaemake se: “Lai nio voa Pakio vo Baṉara o pitoeveni o aliloa koi?”

⁵ Nio seta ke opatake ni eri kikelake, “Sai Betelihema peuru kale Jiudia rana, ako vo Baṉara kiovevo poropita Maika ko riki kale, ko eri ka kiovema,

⁶ ‘Me Betelihema peuru kalea mela, Jiudia rana mu mela, meko peuru ta maba qulepo ama koa kuleto ama Jiudia peuru poso kale azo, ako mekasi azo inio o puratou kala lekasa, vo kuleto oma elo ala aṉako qoqono se Izireli amu.’ ”

⁷ Sole vo Herodi ta o nokaemake seke kuevini ṉaniu ko peatakoi vasi azo nio o mati pesipesitake moizavole nio okai uria nianiiake sekasi koa taku voa suti kuleto o purate keru.

⁸ Sai kazo inio vota o soroemake se Betelihema peuru kale eri kio sama bazu sate: “Olamo tu pa uria vailivomo voa meqora, nio me velou vo, ta me vaitou nio meba bazuelou nio aṉa melai a ziovou tu aba ilusivou vo,” kiolake.

^9-10 Seke viqe keru vo Aikovakova Herodi ko pesio ko tova inio seta keta taliake, nio seko talio kale inio seta ke veake voa omadeula suti vo ke veveni ṉaniu ko peatakoi vasia rana. So keru seke vati inota keru voa suti inio keta paloasa ke zoleilo. Nio voa suti ta ota vatutake seko kuleto vasi nio ota dokolake koa pade ko topi vasi sai voa meqora o evakoi.

¹¹ Nio seta ke amaqeake koa pade ko poro kale ni so keru seke vea keru voa meqora voko niania Mere sase nio seta ke iqeiqeake ni ke ilusivake vo. Nio seta ke rupasikake seko vesa ni ke saqorikake seko katizato poso nio ke kativake vo. Koa katizato poso ta qolo, ni uria tui kama pari, ore ko nui kale ke erekako, ko paraqinisenisi ka kikelako, ni tabarioma ore ko nui, uria tui kama, ko moa ka kikelako.

¹² Nio seta keta vaitake ke peuru kale edoloma keve kude ako vo Baṉara ta o kaqarimake se uloi kale tu pui ke vaito Herodi kasi sole.

Josepa ni Mere vati soqoilo vo Jisu Ijipi peuru kale

¹³ Lula se keta vaita saita inio kala pado vo Baṉara vo mateana ta o puratake Josepa kasi voko uloi kale ni eri kiolake, “Vo Herodi ta mainio opa vailivou voa meqora tu o vouvaevou vo. So sole toirate tu vati soqoi voa meqora ni voko niania Ijipi peuru kale, nio sai mebeta elou saita, ti kobeta barou so keru aṉa vaitomo mela kiavou keru koi Izireli.”

¹⁴ So sole Josepa ta o toiratake, nio koa ipu inio o vati olake voa meqora ni voko niania Ijipi peuru kale,

¹⁵ sai kebeta eva keru inio Herodi ta ota vouvake. Kota so ko kae tu vo Baṉara o vati soruekema pesio vo poropita Hosea tu o kaseko ta tuvevo ko elo, ko eri ka kiovema, “Aṉata lula a nokaeve aṉavo Meqora tu vota o saqoro Ijipi peuru kale azo,” kikovema.

Silosilo ama meqora poso ko vouvaemo

¹⁶ So keru vo Herodi o paqumuke keru se ṉaniu ko peatakoi vasi azo ke kuevini ko lipaevo vo, vota ota matu iqaike. So sole vota o soroemake se solodia madu tu ke vouvaemo kiadama lasive meqora poso, se omuqa sabere amu kasi azo ti koko zara kamu, sai Betelihema peuru kale amu ni koko ketaketa amu. Vota o erekake koa kalo, ko suti ko purato ko taku ko lulueko kale ko okai nianiima sekasi azo seke kuevini ṉaniu ko peatakoi vasi azo.

¹⁷ Sokale inio vo poropita Jeremaea kiovevo ta tuvevo ko eve, ko eri ka kiovema,

¹⁸ “Kama pado kora ta ko velavelaova Rama peuru kale, matuma ziarore ko omolomolo sama kora. Reseli ko vikuvikula kale amu ta kema ziarorea seko meqora poso ni pui ke patuka, ako seko meqora poso ta lula keta vouva sole,” ka kiovema.

Josepa ni Mere vati vaito vo Jisu Ijipi peuru kale azo

¹⁹ Ni vo Herodi ko vou ko tova inio kala pado vo Baṉara vo mateana ta ova puratake vo Josepa voko uloi kale, so keru vo obeta loiva keru Ijipi peuru kale.

²⁰ Nio vota eri kiolake vokasi, “Toirate tu vati vaite nea meqora ni voko niania Izireli peuru kale. Ako se keva zariani vouvaevo nea meqora ta lula keta vouva sole,” kiolake.

²¹ So sole vo Josepa ni voa meqora ni voko niania ta ke zolaike ni ke vaitake mata Izireli.

²² Melai Josepa ta ota ṉake tu vota o vaito Jiudia rana ako vota o viqake ta Akeleasi nio lula o besieva vovo mama Herodi, ta vo inio saizala aikovakova. Melai vo Baṉara ta o bazuevake vo voko uloi kale vo o kalo avo, so sole vota ota olake Qalili rana.

²³ Nio vota Nazareti peuru kale o evake, tu vo Baṉara kiovevo se poropita madu kale kude ta tuvevo ko elo, ko eri kikovema, “Voa Pakio ta Nazareti ala o elou,” kikovema.