Matiu 17 - BAṈARA KO VAIRU AMA LEVELEVEO

Jisu ko velo ko besizio

¹ Ni varimuja ṉaniu ko tova inio Jisu ta o pitoemake Pita ni nioqa tamania Jemisi ni vovo visi Jone ni o mati kailake okate ala sopu kale ni seta sai ke kiada pado.

² Ni sai kebeta eva keru inio Jisu ko velo ta kota besiziake, voko loilo ta kota simanamanatake ṉaniu jari ni voko sabosabo melai tapo simanato kota evake, ṉaniu ko zakaremu jari.

³ Nio sea zouke ta ke keake Mosese ni Ilaija qomai puratake ni qo vati pesipesitake vo Jisu.

⁴ Nio Pita ta eri kiolake Jisu kasi, “Lekasa, matu uri nio eṉeta koi ṉo sate. Ṉoqa zariovou tu aṉata a ereko koi zouke kokukoku, kala ta ṉovo, kala ta Mosese vo, kala pado ta Ilaija vo.”

⁵ Nio so keru vo Pita obeta pesipesita keru, inio ko simanamana kama lei ta ko boulumake se ni seta ke viqake Baṉara ko kora koa leikale, ni eri kikolake, “Nei nio vo a ṉavivo Meqora, vo a matu roquevani. Vo inio vo aṉa ava matu zoleivani, tu tava viqomo vo ni luluekomo vo kiolani,” kikolake.

⁶ So keru se disaipeli madu ke viqa keru Baṉara ko kora, seta keta matu ṉake, ni keta loqunake miduku kale.

⁷ Nio Jisu ta o olake sekasi ni o tibaemake se ni eri ma kiolake, “Meta zolaimo ni pui ṉalo.”

⁸ Nio seta ke aunarikake seko lezu ni seta ke veake vo Jisu o kiada pado obeta lojoake sai.

⁹ Nio seke saqora keru sopu kale azo, nio Jisu ta o bazuemake sea zouke disaipeli madu ni eri kiolake sekasi, “Mata puliala mevai bazuekou koa kelokelozato meme qeako ti kobeta barolou aṉa maba a eveni lala ko mata saevo voukale azo.”

¹⁰ Nio sea zouke disaipeli ta ke kuimaevake vo Jisu, ni eri kikelake, “Noi sole inio vo Mosese ko Bazu kekai nianiiekatani ta eri kikela, ‘Vo Ilaija inio kuleto o kilou puliako vo Baṉara o soroevo ala Pakio kilo,’ kikela?” kikelake,

¹¹ Nio vo Jisu ta o mati tiorikake, ni eri kiolake sekasi, “Tuvevo vo Ilaija inio o kilou kuleto tu o korokorotikou kiadama quli.

¹² Melai aṉata eri kiala mekasi, vo Ilaija ta lula ota kuevi melai maba poso ta pui kepa nianiieve, melai ke vati lulueke ke ṉaviko vatolo. Nio so jari pado inio ke ilou aṉa maba a eveni lala,” kiolake vo Jisu.

¹³ Nio so keru pado inio sea zouke disaipeli madu ta kekai nianiiake ta vo Jone Bapitaiso inio Jisu omai bazubazuevani.

Jisu ko urikivo ziolo kova onobatani rusu

¹⁴ Nio so keru Jisu ni voko disaipeli madu ke baroa keru sea vaki kasi, kala maba ta o olake Jisu kasi ni ota iqeiqeake voko tanama kale ni eri kiolake,

¹⁵ “Lekasa, ṉota la roqueva aṉavo meqora! Vota pireṉe vere sala ni koa vere ta paqoaqa mati ko iva vo. Ni kubo taku kota ko piva uza kale ni jukale.

¹⁶ Aṉata a vati olani nio ṉoko disaipeli madu kasi melai seta pui ke rovea urikivo vo,” kiolake.

¹⁷ Nio Jisu ta eri kiolake, “Mea maba poso komia taku kalea mela ta puliama oqu samela ni sarusarua mela. Noi tinia tu keu nio aṉata a elou mekasi? Aṉata aqai aquria meko bulo ko zokele sole! Vati kuemo voa rusu aṉa kasi!”

¹⁸ Nio Jisu ta o rerikake koa ziolo vo pireṉe vere ko ivako voa rusu topi azo, ni maba koa omadeuma taku kale inio voa rusu ta ota urikake.

¹⁹ Koko tova inio se disaipeli madu ta ke olake Jisu kasi ke kiadakoi, ni eri kikelake, “Noi sole inio eṉeta pui ṉe rovea reriko ko ziolo?” kikelake.

²⁰ Nio Jisu ta eri ma kiolake se, “Meko oqu ta matu silo inio pui me rovea. Melai tuvevo ama quli aṉata a melai bazuekou, meko oqu ko matu ta pui kokai paloasou koa matu mina kama masitadi ore ko rui, melai meta meda roveovou eri kio koa sopu kasi, ‘Vatute ni papi edolokoi!’ kimevou ni kota so kota kalou. So sole pulia quli ta tapata kopa elou mekasi.”

Jisu ko mata kai pesio voko vou

²² Ni koko tova se disaipeli madu ta ke padoivake ka pado zaekale Qalili, sai nio Jisu ta eri kiolake sekasi, “Aṉa maba a eveni lala ta ke vaelou se ruqe ama maba poso ko ṉase topi,

²³ tu seta ke vouvaelou, melai zouke ama ṉaniu kale aṉata mata a jaevou,” kiolake. Nio se disaipeli madu ta matu duki keta evake voko so kio kale.

Jisu ko tabariko ko Jelepade ko takisi

²⁴ So keru Jisu ni voko disaipeli madu ke baroa keru Keponeami matu peuru kale, se maba poso Jelepade ko takisi ke koani ta ke olake Pita kasi ni eri kikelake, “Mevo nianiiekato vo maba ta o tabarikani nio ko Jelepade ko takisi, kio?” kikelake.

²⁵ Nio vo Pita ta eri kiolake, “Zio vota o tabarikani nio,” kiolake. Nio so keru Pita o baroa keru pade kasi, Jisu inio kuleto o kuimaevake vo Pita ni eri kiolake, “Nonia kerukeruto ta ṉobe eva ṉo Saimone? Lala inio o tabariko ala koa takisi komia peuru ma peuru ama lekasa poso kasi, ke ṉaviko mabamu ma edolomu?” kiolake.

²⁶ Pita ta o vati tiorikake ni eri kiolake, “Se edolomu inio,” kiolake. So sole vo Jisu ta mata eri kiolake, “Ṉoda tuveana. Sole se edolomu pala inio ke tabarikou, melai se koa ṉisa peuru kale amu ta pui.

²⁷ So jari nio aniqeta Baṉara ko ṉisa peuru kalea qela sole pui qe male tu tabariko voko Jelepade ko takisi. Melai uri tu aniqeta qe tabarikou, pui uri tu qe korakoraemo sole se. Tu ṉota ola koa toupa kale ni ṉo risaekou ṉoko tali ni vo kuleto ṉo vovo ala niuniu ta ṉoda va akarikou voko suto ni ṉo qovou ko takula ko maleziko ama aniqeko tabariko ko Jelepade ko takisi,” kiolake vo Jisu.