Matiu 14 - BAṈARA KO VAIRU AMA LEVELEVEO

Jone Bapitaiso ko vouvaevo

¹ Koa taku kale inio vo Herodi Anitipasi Qalili ranala lekasa ta o viqake vo Jisu ko bazu.

² Nio vota o bazuemake voko matumatuma maba poso ni eri kiolake sekasi, “Nei ta vo Jone Bapitaiso inio ota tova saeva voukale azo so inio vota pizato sala ni o ereka aqasiele ama iruruputo,” kiolake.

³ Vo Herodi ta soa pesio ota evake ako lula buti nio vota o soruemevo voko solodia madu ni ke noqoeve vo Jone, ni ke pirieve vo seini kale ni ke vaeve vo pirito pade kale. Vota o erekake ko quli ko Herodiasi ko zario kale avo, vo o raekema, melai kota vovo kaka Pilipi ko reko ikio.

⁴ Eri sole inio o ereke ko quli: Vo Jone Bapitaiso ta pui o lalamatake bazuevo vo Herodi ni eri kiolake, “Kota pui korokoroti ikio ṉota ṉoda va raeka ṉovo kaka ko reko,” kiolake.

⁵ Ni kokale avo inio vo Herodi ta oka zariake tu vouvaevo, melai vota ota ma ṉake se Jiu amu, ako seta ke tuvevo puevake sole, ta vo Jone ta kala vo Baṉara vo poropita.

⁶ Nio vo Herodi ko alilo ṉaniu keru, ko Herodiasi ko meqora ta ko pekaoke Herodi ni sea vaki ko ubutiania, ni vo Herodi ta ota matu zoleike.

⁷ Ni vota leveleveo o erekake kokasi ni eri kiolake, “Aṉata maulu a bika, tu aṉata a qatiṉou ṉo kiadama quli ṉoṉo baseko ama,” kiolake.

⁸ Ni kota ko luluekake koko niania ko vatolo, so sole koa taku kale inio kota ko pasekake vo Jone Bapitaiso ko lezu tu vota o katiko ko peleta kale. Ako so inio kota kokai nianiiovou voko vou kikelake.

⁹ Ni so keru vo lekasa o viqa keru koko zario, vota matu duki ota evake melai vota lula piza kama leveleveo o ereke kokasi sea maba poso o taipazimeni ko tanama kale, so sole vota o soruemake voko solodia madu tu seta ke ereko koko zario.

¹⁰ Nio vota o soroemake se tu kepa lezuevo vo Jone pirito pade kale.

¹¹ Ni seta ke kati olake koa lezu peleta kale ni ke katikake koa sinaqu rusu ni kota ko kati olake koko niania kasi.

¹² Nio vo Jone ko disaipeli madu ta ke koake voko tupu ni ke mutakake, sai kazo inio seta ke olake ni kepa bazuevake vo Jisu.

Jisu ko niaemo sike vuro maba

¹³ So keru vo Jisu o viqa keru vo Jone ko vou ko bazu vota o vaekake koa zae vaka kale ni ota olake ojolou kama zaekale o kiada pado.

¹⁴ So keru se maba poso ke viqa keru voko bazu, seta ke vaekake seko peuru poso ni ke luluevake vo ketaino kale. Sole vo Jisu ta o saqorake vaka topi azo, ni vota o meake sea matuma vaki, ni vota o matu roquemake se, ni vota o urikimake se vere amu.

¹⁵ Nio koko raisiraisi voko disaipeli madu ta kevai kuevake vo Jisu ni eri kikelake vokasi, “Erisaṉa ta matu raisiraisi ni koi ta ojolou kama zaekale, tu ṉota soroema nia maba poso ke peuru poso kale tu ke ṉavi kepa tatabarao ko sailao,” kikelake.

¹⁶ Melai vo Jisu ta o mati tiorikake se ni eri kiolake sekasi, “Seta pui kepa vaitou, melai me inio me niaemou sea maba poso,” kiolake vo Jisu.

¹⁷ Ni se disaipeli madu ta ke vati tiorikake ni eri kikelake vokasi, “Eṉeta sike silo ama bereti ni omuqa niuniu ko kiada ikio komi,” kikelake.

¹⁸ Ni vo Jisu ta eri kiolake sekasi, “Kati kuemo koa sike bereti ni koa omuqa niuniu aṉa kasi,” kiolake.

¹⁹ Ni vota o bazuemake sea maba poso tu seta ke papu muli seulele topi, ni vota o koake koa sike bereti ni omuqa niuniu ni vota o tadatake aukale ni o kati vararaitake ni uriavo o kasekake Baṉara kasi. Nio vota o palamukake koa bereti poso ni o katimake se disaipeli madu, ni se disaipeli madu ta ke katimake se maba poso.

²⁰ Ni sea kiadamu ta ke vuatake ni keta atapake muli. Ni koko tova se disaipeli madu ta kekai sukatikake toni omuqa suakao koko palakiako sailao.

²¹ Ni sea kiadamu lasive poso ta sike vuro madu, melai pui kepa ataeme se rekoreko ni meqora poso se sate ke vuateni.

Jisu ko talio Qalili toupa ko ju topi

²² Jisu ta o paikake niaemo sea vaki sai kazo inio vota o bazuemake voko disaipeli madu tu ke zazu vaka topi tu kebeta pakeo Qalili toupa koa pake, so maqa inio vota o vaitoemou sea maba poso.

²³ Nio sea maba poso ta keta vaitake muli, koko tova inio vota ota kailake o kiada pado sopu kale vararaitole ti raisiraisi kope vai baroake sai.

²⁴ Ni vaka ta lula ota siluata koa toupa kale joupajoupaekole boguzu kale ako kapea ururu sole.

²⁵ Ni vaqaza obe peata keru inio Jisu ta ota taliake toupa ko ju topi, ni ota olake o disaipeli madu kasi.

²⁶ Ni so keru seke vea keru seta keta matu ṉake ni ṉalole nio seta eri kikelake, “Kota ziolo ikio!” kikelake.

²⁷ Melai Jisu ta o pesiake sekasi ni eri kiolake, “Meta pui ṉalo; aṉata Jisu lala inio,” kiolake.

²⁸ Nio vo Pita ta eri kiolake vokasi, “Lekasa, tuvevo ṉo ṉo elou, ta odiela aṉa tu a dalio ivere topi tu a qilo ṉokasi.”

²⁹ Ni vo Jisu ta o vati tiorikake ni eri kiolake vokasi, “Kua koi.” Nio vo Pita ta ota saqorake koa vaka topi azo ni ota taliake ivere topi tu o toraevo vo Jisu.

³⁰ Melai vota o keake matuma ururu nio vota ota ṉake ni ota tanitake duluilo ivere kale. Ni vota ova zaivotake vo Jisu ni eri kiolake, “Kei! Lekasa, ṉota tauvela aṉa!” kiolake.

³¹ Ni vo Jisu ta ova rauqazake ni o zolaevake ni eri va kiolake, “Noi tinia matu silo ikio ṉoko oqu! Ṉota pui ṉo duvevo puta kio?” kiolake.

³² Ni so keru nioqa qo zazua keru vaka topi, ko ururu ta kota jamaoke.

³³ Ni sea disaipeli madu koa vaka topi ke eveni ta ke ilusivake vo Jisu ni seta eri kikelake, “Tuvevo ṉota vo Baṉara vo meqora ṉa tisoiko!” kikelake.

Jisu ko urikimo se vere amu Qenesareti peuru kale

³⁴ Nio seta lula keta pakea Qalili toupa ko koa pake ṉaniu o sulupakoi vasia rana Qenesareti.

³⁵ Ni saizama maba poso ta kevai nianiiani vo Jisu so sole seta ke taliekake ko bazu koa kiadama maba poso kasi koa zae poso kale amu kasi, ni seta ke mati olake se vere amu Jisu kasi.

³⁶ Nio sea vere ama maba poso ta kevai zaivotake tu seta ke tibaeko vo Jisu ko sabosabo, ni sea kiadamu seke tibaekeni ta keta urikake muli.