Maka 7 - BAṈARA KO VAIRU AMA LEVELEVEO

Jiu amu ko taite poso ko nianiiekato

¹ Ni kake Parese madu ni vo Mosese ko Bazu kekai nianiiekatani, seke kuevini Jerusalema azo, ta ke aramuvake vo Jisu.

² Ni seta ke meake kake voko disaipeli madu ta ke vuatake puliako pusaeko seko ṉase tabutabuo kale, sole pui ke lulueka Parese madu kekai nianiiekatako kalo.

³ Ako Parese madu ni kiadamu se Jiu mu ta ke lulueka koa nianiiekato sole seke koema seko taite poso kasi azo, ko eri kikovema, “Puliako vuato ta me busaekou meko ṉase tabutabuo kale,” kikovema.

⁴ Ni ko quli ke kovo ama kekai tatabaraekiniani ko lomaloma melai ke pusaekou saita inio ke kuovou. Ni seta mata ke lulueka matu kubo bazu ko eri kikolako, uria pusaeko ko kapa, raro, ni teamuteamu poso kikovema.

⁵ So sole se Parese madu ni vo Mosese ko Bazu ko nianiiekato ko maba madu ta ke kuimaevake vo Jisu, ni eri kikelake, “Noi sole inio ṉoko disaipeli madu ta pui ke lulueka koa nianiiekato eṉeko taite poso ke katiṉelema eṉe inio pui ke tabutabua seko ṉase pusaeko kale saita inio ke vuata?” kikelake.

⁶ Nio vo Jisu ta o mati tiorikake ni eri ma kiolake se, “Meta meqai lipalipaitani mela ko sidopu, ako ko quli vo Baṉara ovai bazuekema vo poropita Aisea kasi tu o rikieko mekale avo ta matu tuvevo, ko eri kikovema, ‘Nia maba poso ta ke rauraela aṉa seko pesio kale, melai seta pui ke roquela aṉa,

⁷ ni seko ilusilo aṉa ta utube ama, ako seta kebe mati nianiiekika seko maba poso ke ṉavi ke erekako bazu sole, melai pui aṉa aba katimema bazu,’ kikolani.

⁸ Ni meta me vaeka vo Baṉara ko bazubazu ni me zorika sole maba ko nianiiekato,” kiolake vo Jisu.

⁹ Ni vota mata eri ma kiolake, “Meta meqai matu nianiiani mela besieko vo Baṉara ko Bazu tu me lulueko me ṉaviko taite poso ko bazu.

¹⁰ Melai vo Mosese ko Bazu ta eri nio kikovevo, ‘Ṉota taka paṉaovi ṉoko mama ni niania,’ ni ‘Vo o ruqe kaseko ala voko mama ni niania ta o vouvou,’ nio kikovevo.

¹¹ Melai ko me meqai nianiiekatako ta eri, kala ta kama quli sala vo o roveako kai tauveko voko mama ni niania, melai vota eri kiovou, ‘Kota Kobani!’ kiovou (koko kio ni kalo ta ‘Kota leveleveo a ika tu a qativou vo Baṉara’)

¹² inio meta me zarieva tu pui o tauveko voko mama ni niania.

¹³ So sole meko mati nianiiekiko se maba poso me ṉaviko vikuvikula bazu kale inio meta me bazoka vo Baṉara ko Bazu. Ni ikoana mata matu kubo quli komi jari ama ko meme erekako,” kiolake.

Ko quli vo maba kaqa ko ivako Baṉara ko vilu kasa

¹⁴ Ni vo Jisu ta o nokaemake mata sea vaki tu ke kilo vokasi ni eri ma kiolake, “Meta didielomo aṉa ni kai nianiimo ko eri.

¹⁵ Pui sailao vo maba o kuako ikio kaqa ko iva vo Baṉara ko vilu kasa, melai ko pesio koko saqorako voko suto kale azo ikio kaqa ko iva vo maba Baṉara ko vilu kasa,” kiolake.

¹⁷ Ni vo Jisu ta o vaemake sea vaki ni ota amaqeake pade kale, ni sai nio voko disaipeli madu ta ke pasevake vo tu o mati nianiiekiko koa podepodeti, kikelake.

¹⁸ Ni Jisu ta eri kiolake sekasi, “Me melai niuniala mebeta eva se jari kio? Pui sailao vo maba o kuako ikio kaqa ko iva vo Baṉara ko vilu kasa,

¹⁹ ako vo maba o kuako quli ta pui ko ola voko bulo kale sole, melai voko siapa kale inio ni mata kota ko saqora.” (Jisu ko so kio ta kiadama sailao ti uri ko kiada tu me quovou anime.)

²⁰ Ni vota obeta olake nianiiekato ni eri kiolake, “Ko quli vo maba o rukuekako voko suto kale ikio kaqa ko ivako vo maba Baṉara ko vilu kasa.

²¹ Ako vo maba ko bulo kale azo inio ko saqora voko ruqe ama vatolo, ni ko ikio ko odieva vo tu o pauvezato, ni o kuilo, ni o vouvato,

²² ni o zavemato, ni o pazapazailo ni o ereko mata koa ruqeruqe ama quli, lipalipato, olavo, konoilo, sekeseketato, aikailo, ni sarube puto.

²³ Ni komia kiadama ruqeruqe ama quli ta ko kuevako vo maba ko bulo kale azo, ni ko ikio kaqa ko iva vo maba Baṉara ko vilu kasa.”

Pui Jiu ama rekoreko ko oqu

²⁴ Nio vo Jisu ta o vaekake koa zae ni ota olake Taea matu peuru ko ketaketama peuru poso kale. Ni vota ota amaqeake pade kale ni pui okai zariake tu maba poso ta kevai nianiio ta vota sai, melai vota pui o roveake mutailo.

^25-26 Ni ka pado saizama rekoreko ta pui Jiu ama, Ponisia ko alilema Siria rana. Ni koko meqora ta ziolo kota kai onobatako, ni koa reko ta kota va viqake Jisu ko bazu, ni taukavole kota ko olake vokasi ni ko iqeiqeake voko kiti raki kasi. Ni kota ko pasevake vo Jisu tu vota ota ka ṉamuko koko meqora kokai onobatako ziolo.

²⁷ Nio vo Jisu ta o kati tiorikake ko, ni Jiu amu ta meqora o mati podetikake, ni eri kiolake, “Kuleto animeta me niaemo se meqora poso saita. Ako pui ko male tu animeta me qovou meqora poso ko sailao ni me risaekou siele poso kasi tu ko kuovou,” kiolake.

²⁸ Nio kota eri kikolake, “Tuvevo Lekasa, melai ko siele poso ta ko kua se meqora poso ko sailao ko vuruvuru koko piako tevolo topi azo,” kikolake.

²⁹ Nio vo Jisu ta o kati tiorikake ko ni eri kiolake kokasi, “Ṉota soa opato ṉoda eva, sole vaite ṉo bade kasi, ni ṉota ṉo qelou ṉoko meqora ta lula ko vaekala koa ziolo,” kiolake.

³⁰ Nio koa rekoreko ta kota vaitake koko pade kasi ni ko keake koko meqora ta kobeta tekuke kobo topi; ni matu tuvevo, koa ziolo ta lula ko vaeka ko.

Jisu ko urikivo kala qiqili ala maba

³¹ Ni Jisu ni voko disaipeli madu ta ke vaekake Taea ma peuru poso ni keta olake Saidoni kude ni keta lebaoke ni ke alokatake Tonipeuru, saita inio ke baroake Qalili toupa kale.

³² Ni kake maba poso ta ke vati olake kala maba qiqili ala ni pui o roveani pesio Jisu kasi, ni seta ke pasevake vo tu ovai iviko voko ṉase.

³³ So sole vo Jisu ta o vati edoliake nea maba sekasi azo, ni ota va kamakake voko taliṉa, ni okai supatake o ṉase ni ota va kamakake voko lenio.

³⁴ Ni Jisu ta o tadatake aukale vasi, ni ota voniu kozatake, ni eri kiolake voa maba kasi, “Epata.” Ako koko kio ni kalo Jiu pesio kale ta, “Pa, kive!”

³⁵ Ni koa omadeuma taku kale inio voa maba ta ota viqaviqazatake ni ota uria pesiake.

³⁶ Nio Jisu ta matuvole o pasemake se tu seta pui kekai bazutou voko urikivo voa maba; melai kiada keru Jisu ta omai bazueka kiadama maba tu pui ke bazubazutou, melai seta kebe vai bazubazuta inio mati vo Jisu.

³⁷ Ni so keru sea maba poso keta va viqa keru Jisu ko bazu, seta keta matu vuzeike, ni eri kikelake, “Noni ala maba inio vo nei, ako kiadama quli ti vota o rovea uria ereko, se pui ke viqaviqazatani ni pui ke pesiani melai vota o urikima,” kikelake.