Maka 10 - BAṈARA KO VAIRU AMA LEVELEVEO

Vaekinio ko bazu

¹ Ni Jisu ta o vaekake koa zae, ni ota olake Jiudia rana ni ota pakeake Jodani sukuru kale. Ni sai nio matu kubo maba ta mata kevai padoivake, ni vota o nianiiekimake se, kiada keru obeta kavani.

² Ni kake Parese madu ta ke olake Jisu kasi tu ke madoevo vo tu keta va kelo kama sarueko kikelake. Ni seta eri kikelake, “Animeko Bazu kale vo Mosese o katimelema ta zarizari ama tu kala ta o vaekou voko reko ma pui?” kikelake.

³ Ni Jisu ta oma opatake ni eri kiolake, “Loma quli Bazu ikio vo Mosese o katimelema me?”

⁴ Ni seta ke vati tiorikake ni eri kikelake, “Mosese ta o zarieke tu kala ta o katikou voko reko vaekinio ko pepa ti obe soroekou inio koa reko,” kikelake.

⁵ Nio Jisu ta eri ma kiolake, “Vo Mosese ta o zariemele me tu meta me vaemou meko reko poso ako meko bulo ta zokele sole ni pui meqa zaria vo Baṉara ko nianiiekato.

⁶ Melai ko Tabu ama Riki kikovevo ta eri nio koko tanitanila keru, so keru Baṉara o ereke keru ko maba ta pui so kopa kaema ikio, melai ‘lasive ala ni reko ama inio o ereke,’ tu nioqata omadeu qo elo.

⁷ ‘Sokale avo inio vo maba ta o vaekou voko mama ni niania ni omadeu o kati elou voko reko,

⁸ ni nioqata omadeu qo elou.’ Sole nioqata pui omuqa melai omadeu.

⁹ So sole nioqa vo Baṉara omadeu o ikeni nioqa ta pui ko male tu maba ta o pitasiko,” kiolake vo Jisu.

¹⁰ Ni seke baroa keru pade kasi inio se disaipeli madu ta kevai kuimaekake vo Jisu koa nianiiekato ko kio ni kalo.

¹¹ Nio vota eri kiolake sekasi, “Kala ta o butuekou voko reko ni o raekou edoloma reko, ta vota ota zavemata inio voko reko ko butueko kale.

¹² Ni so jari nio koa reko ta ko butuevou kovo lasive ni ko tova rorotou ta kota zavemata inio koko butuevo kale kovo lasive,” kiolake.

Jisu ko mauru imo se meqora poso

¹³ Ni kake maba poso ta ke mati olake seko silo ama meqora poso Jisu kasi tu vota oma iviko voko ṉase, melai se disaipeli madu ta ke riqaemake se.

¹⁴ Ni so keru vo Jisu o kati inota keru ko quli vota omai korakoraivake ni eri kiolake voko disaipeli madu kasi, “Meta pui kaitimo se meqora poso tu ke kilo aṉa kasi, ako se maba poso nia sasa rusu jari ke kalo amu nio ke ṉeamukou vo Baṉara ko lekasa puo kale ama mauruto sole.

¹⁵ Meta kerukeruekomo komi! Se meqora poso pui kubo kerukeru kale ke koani ko puaro jaria kovo me elou vo Baṉara ko lekasa puo pado inio me roveovou amaqeo voko lekasa puo kale tu kai zomanole voko mauruto.”

¹⁶ Ni vota opa odiemake se meqora poso ni omai ivikake o ṉase ni mauru o imake.

Batiro ama maba poso ni Baṉara ko lekasa puo

¹⁷ Ni vo Jisu obe talio kiola keru, nio kala batiro ala maba ta o kuevake vokasi, ni o iqeiqeake voko tanama kale ni eri kiolake, “Uri ala tanala ṉa! Loma uri ama iruruputo a erekou nio a qovou ko noqola kama saevo?” kiolake.

¹⁸ Ni Jisu ta o vati tiorikake ni eri kiolake, “Noi sole inio uri ala la kiṉola? Puliala ta uri ala melai Baṉara o kiada inio uri ala.

¹⁹ Melai ṉoko kuimanao ko opato ta eri nio. Ṉota ṉobe kai nianiia ko ikio ko bazubazu ko eri kikolako, ‘Ṉota pui ṉo vouvatou, ṉota pui ṉo zavematou, ṉota pui ṉo quilou, ṉota pui ṉovai kuirikou kala lipalipa kama quli, ṉota pui ṉo ubeubezatou, ni ṉota ṉoda ka paṉaovou ṉoko mama ni niania,’ kikolako.”

²⁰ Ni voa maba ta o vati tiorikake ni eri kiolake, “Tanala, so keru aṉako siloa lala keru azo ti aṉata a zorikako ikio koa kiadama bazubazu,” kiolake.

²¹ Ni Jisu ta o toiritoirivake voa maba ni o roquevake vo ni eri kiolake, “Mata omadeu quli kio ṉota ṉo erekou. Ola tu pa kai tatabaraovi kiadama ṉoko lomaloma, ni ṉota ṉo qatimou koko takula se ozaoza kamu, inio ṉota batiro saṉa ṉo elou Baṉara kasi, saita inio ṉo luluelou aṉa,” kiolake.

²² Melai voa maba ta matu batiro ala sole vota matu duki ota evake so keru ota va viqa keru voko pesio. Nio o vaevake vo Jisu.

²³ Ni Jisu ta oma lilitake voko disaipeli madu ni eri kiolake sekasi, “Matu tapata tu se batiro ama maba poso ta kekai amaqeo vo Baṉara ko lekasa puo.”

²⁴ Ni sea disaipeli madu ta keta matu vuzeike so keru ke viqa keru koa pesio, melai Jisu ta obeta olake pesio ni mata eri kiolake, “A lolo poso, matu tapata ikio tu kai amaqeo vo Baṉara ko lekasa puo.

²⁵ Koko tapata tu vo batiro ala maba ta o amaqeo Baṉara ko lekasa puo kale ta kokai paloasa koko tapata tu kala kameli ta o amaqeo nila ko purapura kale.”

²⁶ Ni so keru se disaipeli madu ke viqa keru komi quli seta keta matu vuzeike, ni eri kikelake ke ṉavio kude, “Sole lala inio vo o roveovo ala pakio?” kikelake.

²⁷ Nio vo Jisu ta o toiritoirimake se ni eri ma kiolake, “Maba ta pui opa pakiovou o ṉavi melai Baṉara inio o pakievou vo, ako Baṉara o kiada inio o roveani sole ereko kiadama quli,” kiolake.

²⁸ Ni Pita ta o kuimaevake vo Jisu ni eri kiolake, “Ta noi nio eṉe? Ako eṉeta lula ṉe vaeke eṉeko kiadama quli tu ṉe lulueṉo ṉo,” kiolake.

²⁹ Nio Jisu ta eri kiolake sekasi, “Aṉata a bazuemela me, ni kala ta o vaekou voko pade ni voko tamania poso ni vovo mama ni voko niania ni voko meqora poso ni voko miduku tu o luluelo aṉa, ni aṉako Uri ama Bazu ko lulueko kale avo,

³⁰ ta vo Baṉara inio ova besiekou ko komia peuru ma peuru kale, ni vota o ṉeamukou omadeu paizana vole ko pade, ni voko tamania, ni voko niania, ni voko meqora poso, ni miduku. Melai naqunaquto ikio mata obe toraekou. Ni koko kilo ama taku kale voa maba ta o kovou ko noqola kama saevo.

³¹ Melai matu kubo madu raura kamu erisana ta mainio zara kepa elou ko kilo ama taku kale, ni se zara kamu inio mainio raura kepa elou koa taku kale,” kiolake vo Jisu.

Zouke ama taku Jisu kai bazuto voko vou

³² Ni Jisu ni voko disaipeli madu ta kebeta taliake Jerusalema ko zuatikako keve tona. Ni Jisu ta ota ma kuletake se ni seta keta vuzeike, ni sea maba poso tova ke lulupatani ta keta ṉake. Ni Jisu ta mata o odiemake sea toni omuqa disaipeli ni o mati edoliake ni omai bazuekake ko quli koko ereilo ama quli vokasi.

³³ Ni vota eri kiolake, “Meta didielomo aṉa, animeta meda kaila inio Jerusalema, ni sai nio seta ke vaelou aṉa maba a eveni lala raura kama siama madu ni vo Mosese ko Bazu kekai nianiiekatani maba poso ko ṉase topi, tu seta ke titizikou tu aṉata a vou. Ni seta mata ke lati ziovou aṉa se pui Jiu amu kasi,

³⁴ tu seta kelai balebaleitou ni ke sisiparuelou ni ke vouvaelou korosi topi. Melai zouke ala ṉaniu kale inio mata ada tova saevou,” kiolake vo Jisu.

Jemisi ni Jone ko zario

³⁵ Ni Jemisi ni Jone, vo Zebeti ko meqora kidi, ta qo olake Jisu kasi ni eri kiqolake, “Tanala, eqea tamania ta qekai zaria tu ṉota ṉo qela erekou kama quli,” kiqolake.

³⁶ Ni Jisu ta o kati tiorikake ni eri kiolake, “Loma quli kio qeta qekai zaria tu aṉata a qela erekou?”

³⁷ Nio nioqata qo vati tiorikake ni eri kiqolake, “Eqeta qekai zaria papu ṉo sase, so keru ṉoṉo bapuvou keru ṉoko ṉaṉaidara kama lekasa puo ko papupapu topi, kala ta ṉoko palo rana ni kala ta ṉoko made rana,” kiqolake.

³⁸ Ni Jisu ta eri ka kiolake nioqa tamania, “Qeta pui qekai nianiia ko quli qeqe pasekako quli. Ma qeta inaina kaqela inio tu qe tolailou aṉa sate kio? Ni qeta inaina kaqela tu bapitaiso qe elou aṉa kelai bapitaiso pueko ama bapitaiso kale kio?” kiolake. Nio voko so kio ta vota o kasekake voko tolailo ni vou.

³⁹ “Zio, eqeta inaina kaqela tu qe tolailo ni bapitaiso qe elou ṉo sase,” kiqolake.

⁴⁰ Nio Jisu ta o kati tiorikake nioqa ni eri kiolake, “Tuvevo qeta qeta roveovou aṉa jaria tolailo ni bapitaiso elo, melai aṉata puliama pizato tu a zarieqelo qe tu qe papuvou aṉako palo ni made rana. Ako koa zae ta vo Baṉara inio o katimou se oma inainaekani,” kiolake.

⁴¹ Nio koko tova so keru sea toni disaipeli ke viqa keru ko quli, seta kekai matu korakoraivake Jemisi ni Jone.

⁴² Nio Jisu ta o nokaemake sea kiadamu o ṉavi kasi ni vota eri ma kiolake, “Meta memai nianiia komia peuru ma peuru kale ama aikovakova poso, seta kemai raurarauraiva seko maba madu, ni sea lekasa poso melai ke zuruzuruema seko maba poso tu ke lulueko seko vatolo kikolani.

⁴³ Melai meta pui so me qalou me ṉavio kude, ako vo oka zariovo ala raura elo mekasi azo ta kiada mela vo nabulu o elou nio vota raura o elou.

⁴⁴ Ni kala me azo ta oka zariovou kuleto elo ta kiada mela vo mabaku o elou nio kuleto o elou sole.

⁴⁵ Omadeuvo jari aṉa maba a eveni lala ta pui aba kuevi tu maba poso ta kela iruruputo melai aṉata a quevi tu aṉa inio nabulu ama elo maba poso, ni aṉata ama vouvou tu a bakiemou se,” kiolake vo Jisu.

Jisu ko urikivo kala leqa kala maba o ṉi ta Batimiasi

⁴⁶ Ni seta kekai baroake Jeriko peuru. Ni Jisu ni voko disaipeli madu ni matuma vaki ke vaeka keru sai, inio seta ke veake leqa kala maba o ṉi ta Batimiasi obeta papuake keve ko ketaketa. Voko ṉi ko kio ni kalo ta “Timiasi vo meqora”.

⁴⁷ Ni so keru vo ota va viqa keru vo Nazareti ala Jisu obeta alokatani kio vota o taniekake upaupato ni eri kiolake, “Noa Devita ko vikuvikula kalea laṉa, ṉota roquela aṉa!” kiolake.

⁴⁸ Ni matu kubo maba poso ta ke riqaevake tu o moizailo kikelake. Melai so keru inio o naizatikake nokao ni eri kiolake, “Devita ko vikuvikula kalea laṉa, ṉota roquela aṉa!” kiolake.

⁴⁹ Nio vo Jisu ta o dokolake ni eri kiolake, “Nokaevomo vo.” So sole seta ke nokaevake voa leqa kala maba ni eri kikelake, “Zolei tu zolai ako vota o nokaeṉa sole,” kikelake.

⁵⁰ Nio vota o ivikake voko sabosabo ni taukavole o lojoake ti obeta olake inio Jisu kasi.

⁵¹ Nio Jisu ta o kuimaevake ni eri kiolake, “Loma ikio ṉoqa zaria tu aṉata aṉa ereko ṉo?” Nio vota o vati tiorikake ni eri kiolake, “Lekasa, aṉata aqa zaria keazato,” kiolake.

⁵² Nio Jisu ta o vati tiorikake ni eri kiolake, “Ola. Noko vai oqu vo Baṉara ta ko urikiṉa ṉo sole,” kiolake. Nio maba koa taku kale inio vota o roveake kelokelozato, ni o luluevake vo Jisu.