Luke 8 - BAṈARA KO VAIRU AMA LEVELEVEO

Jisu ke lulueveni rekoreko

¹ Ni kama taku poso ko tova inio Jisu ta o lipilipitake matuma ni silo ama peuru poso kale, ni okai bazubazutake ko Uri ama Bazu vo Baṉara ko lekasa puo ko. Ni sea toni omuqa disaipeli ta ke olake vo sate,

² ni so jari kake rekoreko melai, se vo o urikimeni ziolo mai onobato kale azo ni vere poso kale azo, Mere, Maqidalama kekai nokaekema, ko sikeura ziolo kota ka akoima kokasi azo,

³ ni Joana, Kuza ko reko Herodi vo raura kala nabulu, ni Susana, ni mata kubo rekoreko, se kemai tauvekeni Jisu ni voko disaipeli madu seko lomaloma ni seleni.

Sisu o risarisaekani maba ko podepodeti

⁴ Ni se maba poso ta kevai kuevake vo Jisu matu kubo peuru kale azo, nio koa matuma padopadoilo kale inio Jisu ta o kasekake komia podepodeti, ni eri kiolake,

⁵ “Omadeu taku inio vo sisu o risarisaekani maba ta ota olake ni o risarisaekake ko vuiti ko sisu voko kiaro kale. Ni so keru vo o risarisaeka keru koa rui kiaro kale, kama ta ko piake keve tona, ni se maba madu ta kekai lojolojoitake, ni ko okale ama biaṉabiaṉa ta ko kuevake ni ko kuake koa sisu.

⁶ Ni kama ta ko piake buturuakoi, ni so keru koko qotupa keru, kota kota kajaoke ako ko miduku ta matu tabatabari sole.

⁷ Ni kama rui ta ko piake rikosasana ko qotupakoi, ni ko rikosasana ta omadeu qotupo ko kati evake ni ko lupikake ni ko vouvaekake ko.

⁸ Melai kama rui ta ko piake uri ama miduku kale, ni kota ko uria qotupake ni ko velokake ni ko erekake paiza paizana koko epa ko rurururu kale ama rui,” kiolake. Ni Jisu ta o paikake voko pesio ni eri kiolake, “Meta paqumukomo ko quli meme viqako quli,” kiolake.

Podepodeti sama pesio ko kio ni kalo

⁹ Ni voko disaipeli madu ta kevai kuimaekake vo Jisu koa podepodeti sama pesio ko kasekako quli,

¹⁰ ni vota o mati tiorikake, ni eri kiolake, “Baṉara ta kasa o mela ika me voko lekasa puo ko mutamuta kama nianiio, melai sea maba poso ta ke viqou podepodeti sama pesio kale ni seta ke toiritoirizatou melai pulia quli kepa kelou, ni seta ke viqou melai pui kepa patapataekou.”

Jisu ko rupasiko vo rui o risarisaekani maba ko podepodeti

¹¹ Ni vo Jisu ta obeta olake pesio ni eri kiolake, “Komi kio koa podepodeti pesio ko kio ni kalo. Koa rui ta vo Baṉara ko bazu.

¹² Ni koa rui koko piako keve tona ta ko mamola puema seke viqani koa bazu, melai vo Setani ta o kueva ni vota ota ma koa koa bazu seko bulo kale azo tu seta pui ke tuvevo puto tu ke pakio.

¹³ Ni koa rui koko piako buturuakoi ta se inio seke viqani ko bazu ni zoleilole ke koani ko. Melai kota pui ko matu saqora seko kerukeru kale, sole pui tu ko keuva. Seta ke tuvevo pueka puju ama taku, melai so keru ko zolizolito ko kueva keru, seta ke vaeka seko oqu.

¹⁴ Ni koa rui koko piako rikosasana ko qotupakoi ta ko mamola puema seke viqani, melai seko riteraite kai elo ko batiro ni komia peuru ma peuru ko utu zoleilo ta ko piriema se ni seta pui ke epamata.

¹⁵ Ni koa rui koko piako uri ama miduku kale ta ko mamola puema sea poso seke viqani ko bazu ni ke uria tukiekani ko seko uri ama zoripato sama bulo kale, ni seta ke pataita seko oqu kale ti seta ke epamata,” kiolake.

Mola sau ke kati opoekako juke

¹⁶ Ni Jisu ta obeta olake bazubazuto ni eri kiolake, “Puliala inio o pakeka ko juke ni mola sau o kati opoeka ma o vaeka kobo sapera ko vima. Melai vota o papueka ko juke ko papupapu topi, tu se maba poso ta ke kelo ko zakaremu seko amaqeo keru.

¹⁷ “So jari nio ko quli ko meme qamikako quli ta kasa ko elou ubutiania, ni ko quli koko mutaivako quli ta kasa ko elou.

¹⁸ “So sole meta kati vailomo ko meme viqako quli, ako vo lula o koani koa nianiio ta vo Baṉara ta o kativou mata kama, melai vo puliama sala ta vo Baṉara ta ota va parakikou koa silo pala nianiio ka kiolake kobe evako vo tona,” kiolake.

Jisu ko niania ni voko visi poso

¹⁹ Ni Jisu ko niania ni voko visi poso ta ke kuevake vokasi, melai seta pui ke roveake vai barolo vo, ako matuma vaki sole.

²⁰ Nio kala ta eri kiolake Jisu kasi, “Noko niania ni ṉo visi poso ta kebeta lojoa kupekupe ni seta keṉa zaria ṉelo ṉo,” kiolake.

²¹ Nio Jisu ta eri kiolake sea kiadamu kasi, “Aṉako niania ni aṉako visi poso ta seke viqani nio vo Baṉara ko bazu ni ke zorikani ko inio,” kiolake.

Jisu ko buleko ko kailokailo

²² Ni kala pado ṉaniu kale inio Jisu ta o zazuke kala pado koaka topi o disaipeli madu sase ni eri kiolake sekasi, “Ariamo tu meda pakeo komia toupa ko kama pake.” So sole seta keta tadaoke.

²³ Nio se kebeta talia keru koa Qalili toupa kale, inio Jisu ta ota maroṉake. Ni matuma varo ta kapiavole kota baroake ni ko ururu ta ko buiriekikake koa toupa ko ju, ni koa toupa ko ju ta ko tanitake sukata koaka ko poro kale, so sole seta matu tapata keta evake.

²⁴ So sole se disaipeli madu ta kepa toirativake vo Jisu sai vo obeta maroṉakoi ni eri kikelake seko zaivota sama pesio kale, “Lekasa, Lekasa! Eṉeta ṉeda vouva!” kikelake. Nio Jisu ta o toiratake ni vota o riqaekake ko ururu ni matuma varo ololobagea sama, ni kota kota jamaoke ni matuma manilo kota evake.

²⁵ Ni vota eri ma kiolake sea disaipeli madu, “Noi nio meta puliama oqu samela?” ma kiolake. Ni seta keta vuzeike ni keta ṉake, nio eri kikelake ke ṉavio kude, “Lala inio nea maba? Ako ururu ni ololobagea melai o riqaekani ni ko zorivani!” kikelake.

Jisu ko urikivo vo ziolo kovai onobatani maba

²⁶ Nio Jisu ni voko disaipeli madu ta kebeta olake pakeo Qalili peuru kasi azo ni ke vikuake Qerasa peuru kale toupa ko kama pake.

²⁷ Ni seko vareriko keru inio Jisu ta o vaekake ko koaka, ni vota o vati toraekiniake kala maba koa peuru kale ala vo ziolo kovai onobatani. Rosi ama taku vota solemauru o evake, ni pui o evake pade kasi, melai vota o evake voko elo kale niami keaka poso kale.

²⁸ Ni so keru vo o veve keru vo Jisu inio vota ota upaupatake, ni ota patopatoike voko kiti raki kale, ni vota ovai zaivotake voko matuma kora kale, ni eri kiolake, “Jisu voa matu Raura kala Baṉara vo Meqora ṉa! Noi nio ṉo ilou kinola inio aṉa? A baseṉa tu ṉota pui tolaelo aṉa!”

²⁹ Vota so kiolake ako Jisu ta lula o riqaekake koa ziolo tu kota ko saqoro vokale azo sole. Kubo taku koa ziolo ta ko rajarajaeva, ni maba poso ta keta va pirieka voko ṉase ni kiti seini kale, melai vota o paqoeka koa seini ni o mujarika ko aeani voko kiti kale ama, ni koa ziolo ta ko vati olake vo lealea kama zaekale.

³⁰ So sole vo Jisu ta o kuimaevake vo ni eri kiolake, “Lala inio ṉoko ṉi?” Ni vota o opatake ni ova kasekake o ṉi, “Aṉata Vaki lala inio,” kiolake. Vota so kiolake ako kubo ziolo ta vo tona sole.

³¹ Nio sea ziolo poso ta ke pasevake vo Jisu tu vota pui lula o soroemo se seko koqotailo ko zaekale rosia saqoroma soqili kale.

³² Ni koa zae ko sipole ta ikoana kama pado matuma bolo rovaṉa kobeta niuqelako kala sopu ka rana vasi. Ni sea ziolo poso ta ke pasevake vo Jisu tu vota o soroemo se tu kepa amaqeo koa bolo poso tona, ni vota o zariemake se.

³³ Nio seta ke saqorake voa maba tona azo ni ke amaqeake koa bolo poso tona. Nio koa pado ama bolo rovaṉa ta kota matu rerikiniake tabale ni kota jourake Qalili toupa kale ni kota kujoike muli.

³⁴ Ni sea maba poso seke kati vailani koa bolo poso ta ke keake ko tona ko ereivako quli, so sole keta soqoike ni ke aerikake ko bazu koa kiadama peuru poso kale, matuma peuru poso kale ni silo ama zavana poso kale.

³⁵ Nio saizama maba poso ta ke olake kelole koko ereilama quli, ni so keru seke baroa keru sai Jisu kasi, seta ke veake voa maba vo ziolo lula kota va akoivani ta obeta papuake Jisu ko kiti kasi, uria saboilola ni voko kerukeru ta lula uri kovai evani. Ni sea kiadamu ta keta matu ṉake.

³⁶ Ni seke keveni Jisu ko urikivo voa maba ziolo poso kovai onobateni, ta kekai bazubazutake ko sea maba poso kasi.

³⁷ Nio kiadama maba poso koa Qerasa zaekale ke evani ta ke pasevake vo Jisu tu vota o vaemo se, ako sea kiadamu saizamu ta keta ṉake sole. So sole vota ota zazuke kala koaka topi tu o vaemo se.

³⁸ Ni voa maba ko ziolo poso kebe vaevani ta ovai titiake vo Jisu, ni eri kiolake, “Zariela tu a lulueṉo,” kiolake. Melai vo Jisu ta o soroevake vo, ni eri kiolake vokasi,

³⁹ “Vaite ṉo beuru kale ni pa kai bazubazute vo Baṉara o erekalama quli ṉokasi,” kiolake. So sole voa maba ta ota vaitake ni okai bazubazutake kiadama maba poso kasi ko quli Jisu o erekema vokasi.

Jaerasi ko meqora ni kama rekoreko Jisu ko sabosabo kota va tibaekema

⁴⁰ Ni Jisu ta ota vaitake koa Qalili toupa ko kama pake, ni matuma vaki ta ko baroekivake vo, ako seta lula ke tareva vo sole.

⁴¹ Ni kala maba Jaerasi va kikelani ta o kuevake. Vota saizama ilusato ko pade ko kuleto amu kale ala. Ni vota o iqeiqeake Jisu ko kiti raki kasi ni vota ova titiake vo tu vota o zio voko pade kasi,

⁴² ako voko pado meqora, ko toni omuqa sabere ama, ta kota vou kikolake sole. So sole seta ke luluevake vo. Ni Jisu obeta ola keru sai, nio matuma vaki ta ko zaitivake vo.

⁴³ Ni koa padopadoilo ko tiania ta ikoana kama pado rekoreko malea vere ko koako toni omuqa sabere. Kota lula ko ṉamuka kiadama koko seleni se urikato ko maba poso kasi, melai puliala ta o roveake urikiko ko.

⁴⁴ Ni kota ko kuevake sea maba poso ko valuvalu Jisu ko kado vasia rana kude ni kota va tibaekake voko sabosabo ko paka, ni koko dara ko rereo ta omadeu epezo kota evake.

⁴⁵ Nio Jisu ta o kuimanaoke ni eri kiolake, “Lala inio o tibaela aṉa?” kiolake. Nio kiadamu ta keta kamiziake, ni Pita inio eri kiolake, “Lekasa, maba poso ta ṉoko levoano ni matuma vaki ta ko zaitiṉa ṉo,” kiolake.

⁴⁶ Melai Jisu ta eri kiolake, “Kala ta o tibaelala aṉa, ako aṉata aqai nianiia ta aṉako pizato ta ko urikivala kala maba,” kiolake.

⁴⁷ Ni koa rekoreko ta ko paqumukake ta kota pui ko roveake daipailo, so sole kota ko kuevake dederole ni ko iqeiqeake Jisu ko kiti kasi. Ni sea kiadamu ko tanama kale, inio kota ko bazuevake vo koko tibaevo vo ko raki ni koko omadeu urikio.

⁴⁸ Nio Jisu ta eri kiolake kokasi, “Meqora, ṉoko vai oqu vo Baṉara ta ko urikiṉa ṉo, sole ola ni pui ṉo ṉalou,” kiolake.

⁴⁹ Ni so keru vo Jisu so be kati kiola keru ko inio kala bazu sala maba ta o kuevake Jaerasi ko pade kasi azo, ni vota o bazuevake vo Jaerasi ni eri kiolake, “Noko meqora ta lula kota voula, sole ṉota pui utu riteraite ivo vo Tanala!” kiolake.

⁵⁰ Melai Jisu ta o viqake ni eri kiolake Jaerasi kasi, “Pui ṉalo, melai kai kerui aṉako pizato, nio kota ko urikou,” kiolake.

⁵¹ Ni so keru Jisu o baroa keru Jaerasi ko pade kasi, vota pui o zariemake se maba poso tu seta ke amaqeo vo sate pade ko poro kale. Melai Pita, Jone ni Jemisi ni koa meqora ko niania ni mama kidi inio o zariemake tu ke amaqeo vo sate.

⁵² Ni kiadama maba saizamu ta keta ziake ni upotuqu keta evake koa meqora kale avo. Sai nio Jisu ta eri kiolake, “Pui zialo, koa meqora ta pui ko vouva, melai kota kota maroṉa pala inio!” kiolake.

⁵³ Nio sea kiadamu ta kevai niureake vo, ako ke paqumukake ta kota lula kota voulama sole.

⁵⁴ Melai Jisu ta ota ka noqoekake koko ṉase ni o nokaekake ko ni eri kiolake, “Ṉoiza, zolai!” kiolake.

⁵⁵ Ni koko saevo ta koka vaitake, ni kota ko zolaike taukavole, ni Jisu ta o bazuekake koko niania ni mama tu nioqata qo niaeko ko sailao.

⁵⁶ Ni koko niania ni mama ta qota polosake, melai Jisu ta o bazuekake nioqa tu nioqata pui qokai bazuto kala kasi koko ereilama quli kiolake.