Luke 24 - BAṈARA KO VAIRU AMA LEVELEVEO

Jisu ko mata saevo voukale azo (Matiu 28:1-10; Maka 16:1-8; Jone 20:1-10)

¹ Ni lekito Sade vikale nio se rekoreko ta ke olake keaka kasi, se lula kepa inainaekema uria tui kama lumu ni bube sate.

² Ni seta ke keake ko lado koa keaka ko veutu tonama ta lula kota bekoliovi,

³ so sole seta ke amaqeake koa keaka ko poro kale, melai seta pui ke keake vo Lekasa Jisu ko tupu sai.

⁴ Ni so keru se sai niuniala lojo kebe kai eva keru ko, ota podoloa koi inio omuqa maba mudamuda sabosaboa nioqa ta qo lojoake seko papara.

⁵ Ni sea rekoreko ta keta matu ṉake ni keta loqunake miduku kale, ni omuqa kidi lasivea nioqa ta eri kiqolake sekasi, “Noi sole inio meta me vailiva seke vouvani kasi vo o saevani?

⁶ Vota puliala koi, vota lula mata ota saevala sole. Kerukeruekomo vo kiovevo mekasi so keru vo Qalili o eve keru, ko eri,

⁷ ‘Aṉa maba a eveni lala ta ke vaelou se ruqe ama maba madu ko ṉase topi, ni seta ke vouvaelou aṉa korosi topi, ni zouke ala ṉaniu kale ta a jaevou,’ ka kiovema,” kiqolake.

⁸ Ni sea rekoreko ta ke kerukeruekake koa pesio poso,

⁹ nio seta keta vaitake koa keaka kasi azo, ni seta kekai bazutake kiadama ko quli poso sea toni omadeu disaipeli madu kasi ni kiadamu se sase ke evani kasi.

¹⁰ Sea rekoreko ta Mere Maqidala peuru kale ama, ni Joana, ni Mere Jemisi ko niania, se ni mata kama rekoreko poso seke luluemeni inio kekai bazuteni ko quli se apositolo madu kasi.

¹¹ Melai se apositolo madu ko kerukeru kale ta sea rekoreko kikelani ta utu bazu ikio kikelake, so sole seta pui ke tuvevo puemake se.

¹² Melai Pita ta o zolaike ni o rereake keaka kasi, ni vota o poqupoquike tu o kelo koa keaka ko poro, ni o keake koa tapo suma sudesude ni kota pulia quli sama. Ni vota ota vaitake pade kasi ako vota aqasiele okai evake koko ereivako quli sole.

Emeasi peuru kale ama talio

¹³ Ni koa omadeuma ṉaniu kale inio Jisu qo lulueveni nioqa ta qota olake kala pado peuru kale Emeasi va kikelakoi, sikeura maelo koko vaṉa Jerusalema azo,

¹⁴ ni qope kai pesipesitake qo ṉavio kude koa kiadama quli koko ereima.

¹⁵ Nio so keru nioqa qope kai pesipesita keru ko, o ṉavi Jisu ta o olake nioqako sipole ni o kati tebarake talio nioqa.

¹⁶ Ni nioqata qo veake vo, melai nioqata pui qo nianiievake vo.

¹⁷ Ni Jisu ta eri kiolake nioqa kasi, “Loma quli kio qe qekai pesipesitake qe ṉavio kude, qeko talio kale?” kiolake. Nio nioqata qo dokolake talio, nioqako upotuqu ama loilo sate.

¹⁸ Nio kala pado nioqʼazo Kiliopasi va kikelani ta eri kiolake vokasi, “Esa ṉoṉo qiada inio sea kiadamu azo seke soipikani Jerusalema komia taku kale ṉo pui ṉoqai nianiiani ṉa koko ereilama quli koa poso ṉaniu ko paloasako kale,” kiolake.

¹⁹ Nio Jisu ta o kati tiorikake nioqa ni eri kiolake, “Loma quli kio ko ereilama?” kiolake. Nio nioqata qo vati tiorikake vo ni eri kiqolake, “Vo Nazareti ala Jisu kasi ko ereilama quli. Voa maba ta kala poropita ni voko piza kama rukuruku kale ni voko aqasiele ama iruruputo kale ta kasa ko eve ta vota Baṉara o roveani kerukeruevo ni kiadama maba poso melai kevai zoleivani.

²⁰ Melai animeko raura kama siama madu ni tanatanamu ta ke vaevala se Romu ama Qavuna madu ko pizato kale tu o vou, ni vota lula ke patoevala korosi topi.

²¹ Ni eṉe lula ṉe duvevo puevani ṉela ta vo inio Izirelia mela o rupasimelo ala va kiṉelani nio! Melai koa kiadama quli ko ereila saita, ta vairutu inio zouke ama ṉaniu.

²² Ni kake eṉe kale amu rekoreko poso ta ke vuzeṉelala eṉe, ako seta ke olala lekito keaka niami kasi,

²³ melai seta pui kepa tava keala voko tupu sai. Ni seke vaitala keru seta kekai bazutala seko kelo omuqa mateana komai bazuekalama ta vota lula mata ota saevala kio.

²⁴ Ni kake eṉe kale amu ta ke olala koa keaka kasi ni ke keala se rekoreko ke kealama jari ama quli, melai seta pui kepa veala vo,” kiqolake.

²⁵ Nio Jisu ta eri kiolake nioqa kasi, “Qea sarubea qela, matu niuniala inio qeta eva, nio pui qe tuvevo pueka kiadama quli se poropita madu kikevevo seko riki kale!

²⁶ Noi nio pui qe paqumuka kota ko malezika tu vo Baṉara o pitoevani Pakio ta tapata o toraeka ni o vouva saita inio vota okai amaqeovou voko ṉaṉaidara?”

²⁷ Nio Jisu ta oka zakaremu puekake nioqa Tabu ama Riki kikovevo vokale avo, Mosese o rikiekema buka poso kasi azo ti kiadama poropita madu ko riki poso kasi.

²⁸ Ni so keru se sipole ke ika keru koa peuru nioqa qokai zio kiqolake, nio Jisu ko talio ta omadeuvo vota ota alokatou jari,

²⁹ melai nioqata qo kaitivake vo ni eri kiqolake, “Eqe kasi eve, ako matu sipole kota ipukou ni kutumana kota elou sole,” kiqolake. So sole vota okai vaitake nioqa ni o evake nioqa sate.

³⁰ Nio vota o papuake nioqa sate, ni o koake ko bereti ni mauru o ikake, ni o palamukake ni o katikake nioqa.

³¹ Ni Baṉara ta o toiratikake nioqako vilu ni qo nianiievake vo, melai vota ota parakake nioqa qope veakoi kazo.

³² Nio nioqata eri kiqolake qo ṉavio kude, “Tuvevo, aniqeko bulo ta matu vualavuala kota evala so keru vo o qelati pesila keru aniqe keve tona ni o qelai zakaremu puekala keru ko Tabu ama Riki kikolani,” kiqolake.

³³ Nio maba koa taku kale inio nioqata qo zolaike ni qo vaitake Jerusalema, sai nio nioqata qo meake sea toni omadeu disaipeli ke padoivani ni mata kake maba poso seke zomaneni elo se sate,

³⁴ sai eria pesipesito kebeta evakoi, “Vo Lekasa ta maba tuvevo avole ota tova saevala mata! Vota o puratala Saimone kasi!”

³⁵ Nio nioqata qo zakaremu puekake sekasi koko ereima keve tona ni nioqako nianiieve vo Lekasa so keru vo o palamuke keru ko bereti.

Jisu ko purato voko disaipeli madu kasi

³⁶ Ni so keru nioqa qope mai bazueka keru ko quli poso, inio o ṉavi Jisu ta obeta lojoake seko tiania ni eri kiolake sekasi, “Bule me tona,” kiolake.

³⁷ Melai seta keta matu ṉake, ziolo inio ke vea kikelake sole.

³⁸ Nio vota eri kiolake sekasi, “Noi sole inio meda ṉava? Ni noi sole inio meta niuniala meda eva?

³⁹ Kemo aṉako omuqa ṉase ni omuqa kiti, ni lemo aṉa, ta aṉa inio ko aṉa. Noqoelomo aṉa, ni meta melai nianiiovou, ako ko ziolo ta puliama marabau ni piza sama, omadeuvo meme leani aṉa jari.”

⁴⁰ So kiolake ni vota oma kasekake voko omuqa ṉase ni kiti.

⁴¹ Melai seta pui ke roveake tuvevo puto, seko mai sukato kale ko zoleilo ni vuzeilo, so sole vota o kuimaemake se, “Meta kama sailao samela koi, kio?”

⁴² Nio seta ke kativake ko kejuma niuniu kena,

⁴³ ni ota ma koake ni o kuake seko vilu kasa.

⁴⁴ Ni vota eri kiolake sekasi, “Komi kio aṉa lula a melai bazuekema quli me so keru aṉa a melati eve keru me. Koa kiadama quli koko rikiziovima aṉa kolai ereivako Mosese ko Bazu kale, ni se poropita madu ko riki kale ni Devita ko kera kale ama ta tuvevo kota elou,” kiolake.

⁴⁵ Nio vota oma veukake seko kerukeru tu seta ke paqumuke Tabu ama Riki poso kikolani,

⁴⁶ ni vota eri kiolake sekasi, “Kota lula ko rikiziovi ko eri, vo Baṉara o soroevani Pakio ta o tolailou ni o vouvailou ni zouke ama ṉaniu kale vota mata o tova saevou voukale azo,

⁴⁷ ni voko ṉikale inio lilizio ni sarueko ko akoezato ko bazu ta ko kaseilou, Jerusalema ko tanitou ti kobeta barou kiadama peuru ma peuru kale ama qoqono poso kasi.

⁴⁸ Me inio me ziovou nio meqai bazutoa, mela komi quli meme qeako quli se maba madu kasi.

⁴⁹ Ni aṉa inio a melai soroevou vo Tabu ala Auvana, vo aṉavo Mama o mela inainaeveni me. Melai meta me daruanou Jerusalema peuru kale ti kobe melai barolou koa pizato aukale azo ko kilo ama me tona,” ma kiolake.

Jisu ko koilo aukale

⁵⁰ Ni koko tova inio vota o mati saqorake se koa Jerusalema peuru kale azo ni seta ke baroake Betani, sai nio vota o zolaekake voko omuqa ṉase ni vota mauru o imake se.

⁵¹ Ni so keru vo mauru obe ima keru inio vota ota vaekaziake sekasi azo ni vo Baṉara ta o koivievake vo aukale.

⁵² Nio seta ke ilusivake vo ni keta vaitake Jerusalema matuma zoleilo sate.

⁵³ Ni seta ke olake mati Jelepade kale ni seta rauraevake vo Baṉara sai.