Luke 13 - BAṈARA KO VAIRU AMA LEVELEVEO

Liliziomo meko sarueko poso kale azo tu pui me vouvou

¹ Ni koa taku keru inio kake maba poso ta kevai bazuekake vo Jisu vo Paelati ko vouvaemo kake Qalili ama maba poso kio, so keru seke kativa keru vo Baṉara seko siqasiqa.

² Ni Jisu ta eri ma kiolake se, “Meta meqai kuirika ta sea Qalili ama maba poso ta soa vouvaemo o eve vo Paelati tu kasa ko iko vo Baṉara ko titizato ta seta matuma sarueko samu kokai paloasako kiadamu ko sarueko poso ta be kimela, kio?

³ Maba pui! Melai aṉata a bazuemela me ta meta pui me liliziovou meko sarueko poso kale azo ta mea kiada mela meda vouvou se jaria vou.

⁴ Noi nio sea toni siotolu maba seke vovini Sailome okatea pade komai piave keru? Meta memai kuirika ta seta palopaloasi ruqe amu se Jerusalema ke evani kasi azo, kio?

⁵ Maba pui! Aṉata a bazuemela me ta pui me liliziovou meko sarueko poso kale azo ta mea kiada mela ta se jaria vou meda elou,” kiolake.

Koe kala piqi ore ko podepodeti

⁶ Nio Jisu ta omai bazuevake se nea podepodeti, ni eri kiolake, “Inevoana kala pado maba vo o papakeni kama pado piqi ore voko vaini kiaro kale. Ni kiadama sabere poso vota o olake vailikole koa piqi ore ko epa melai puliama ka pado ota ka keake.

⁷ So sole vota eri kiolake vovo papato ko maba kasi, ‘Keatini, zouke sabere aṉata a que taka kovole komia piqi ore ko epa melai puliama ka pado ada ka kea. Sole uri tu ṉota roeka! Pui uri tu kota utu niumaekole kobeta ziovou ko miduku sole.’

⁸ Melai vovo iruruputo ko maba ta eri kiolake, ‘Lekasa, vaeka tu kota mata kobeta elou omadeu sabere ko kuevako, ni aṉata a delikou koko levoano ni a qati boutatou kama niami koko raki kale.

⁹ Nio koa ore ta ko epamatou ko kuevako sabere kale, ta matu uri kota elou, melai kota pui ko epamatou, ta aṉata aṉa roveovou roeko ko,’ ” kiolake.

Jisu ko urikiko ko loke ama reko Sabati ṉaniu kale

¹⁰ Ni kama pado Sabati ṉaniu kale inio Jisu ta o nianiiekatake kama pado ilusato ko pade kale.

¹¹ Ni ikoana sai kama pado rekoreko ko ziolo kokai onobatema ni ko verepikema toni siotolu sabere, kota loke kota eve ni pui kopa rovema sidopua lojo.

¹² Nio so keru Jisu o kea keru ko, vota o nokaekake ko ni eri kiolake, “Noiza, ṉota ṉoda rupasia ṉoko vere kale azo!” kiolake.

¹³ Ni vota okai ivikake ko voko omuqa ṉase, ni koa taku kale kota kota sidopua lojoake ni ko ilusivake vo Baṉara.

¹⁴ Nio koa Jiu amu ko ilusato ko pade ko vilua pikopiko ta ota korakoraivake ako Jisu ta ota urikatake Sabati ṉaniu kale sole, so sole voko matuma kora sate vota eri kiolake sea maba poso kasi, “Varimuja ṉaniu ta ikoana ko anime meqai iruruputo ama, so sole uri tu kilo koa ṉaniu poso kale tu uriko, melai pui Sabati ṉaniu kale!” kiolake.

¹⁵ Nio vo Lekasa Jisu ta eri kiolake, “Mea lipalipa kamela! Mea kiada mela melai me rupasikani mela meko bulumakau ma doqi ko titi koko pade kasi sai koko titiziakoi kazo ni me qati olani mela jukasi tu ko nozutou Sabati ṉaniu kale.

¹⁶ Komia rekoreko ta kama pado reko vo Ebarahami ko vikuvikula kale ama ikio, vo Setani o piriekema jari toni siotolu sabere; ta noni, kota pui kopa rupasiovou Sabati ṉaniu kale, kio?” kiolake.

¹⁷ Nio voko opato soama ta ko quratimake voko kana poso, ni se maba poso ta ko zolemake kiadama vo o erekema aqasiele ama quli.

Masitadi ore ko rui podepodeti iko

¹⁸ Ni Jisu ta eri kiolake, “Vo Baṉara ko lekasa puo ta eria podetiko inio a elou podepodeti kale.

¹⁹ Kota omadeuvo eri jari nio. Kala maba ta o borika ko masitadi ore ko sisu ni vota o papaka voko kiaro kale. Koa papapapa ta ko qotupa ni kota ore ko eva ni ko akazako biaṉabiaṉa poso ta ko ereka koko ere poso koa ore ko kata poso topi,” kiolake vo Jisu.

Isiti podepodeti iko

²⁰ Ni Jisu ta mata eri kiolake sekasi, “Mata loma quli kio a qati podetikou vo Baṉara ko lekasa puo?

²¹ Kota omadeuvo eri jari nio. Kama pado rekoreko ta ko koa kama isiti ni ko kati valuvalueka matuma baeke palava ti kobeta koiva inio koa pado ama volevole,” kiolake.

Riro ama veutu

²² Ni Jisu ta o olake matuma peuru poso kale ni sasa zavana poso kale ni o bazubazuemake se maba poso voko talio kale ko Jerusalema peuru kale.

²³ Ni voko talio kale inio kala maba se azo ta o kuimaevake vo ni eri kiolake, “Lekasa, kama poso maba madu pala inio ke pakiovo amu?” kiolake. Nio Jisu ta o mati tiorikake se ni eri kiolake,

²⁴ “Meta matu madoekomo tu kai amaqeomo ko riro ama veutu, koko odiemelo ama me noqola kama saevo kale, ako kubo maba madu ta tuvevo ke madoekou tu amaqeo sai, melai seta pui kepa roveovou.

²⁵ Ako vo pade sala maba ta o tibulikou koa pade ko veutu nio meta me lojou pade kupekupe ni meta me dubitubiekou ko tibulu ni eri kimevou, ‘Lekasa, ṉela veuka ko veutu,’ kimevou, melai vota eri mela kiovou me, ‘Aṉata pui a melai nianiia me ni pui aqai nianiia sai meme quevakoi kazo!’

²⁶ Nio meta eri kimevou, ‘Eṉeta ṉe vuate ni ṉe nozute ṉo sase, ni ṉota ṉo nianiiekate eṉeko peuru kale!’

²⁷ Melai vota mata eri kiovou, ‘Aṉata pui a melai nianiia me ni pui aqai nianiia sai meme quevakoi kazo. Olamo aṉa kasi azo, mea ruqe ama maba poso mela!’ kiovou.

²⁸ Nonia zialo ni roinaroinaeko inio me elo avo meko taka so keru meme velou keru vo Ebarahami, Aisake ni Jekopi, ni kiadama poropita madu vo Baṉara ko lekasa puo kale, so keru meme ṉamuilou keru!

²⁹ Ako maba poso ta ke kilou ṉaniu ko peatakoi vasi azo ni ko sulupakoi vasi azo, ni made rana vasi azo ni palo rana vasi azo, komia peuru ma peuru kale azo seta ke kilou ni ke papuvou vo Baṉara ko lekasa puo kale ama ṉojola kale.

³⁰ Sole keatini, matu kubo madu raura kamu erisaṉa ta mainio zara kepa elou ko kilo ama taku kale, ni se zara kamu inio mainio raura kepa elou koa taku kale,” kiolake.

Jisu ko roquemo se Jerusalema peuru kale amu

³¹ Ni koa taku kale inio kake Parese madu ta kevai kuevake vo Jisu ni eri kikelake vokasi, “Ṉota saqore koi kazo ni ola edoloma zaekale, ako vo Herodi ta oka zaria vouvaeṉo ṉo sole,” kikelake.

³² Nio Jisu ta o mati tiorikake se ni eri kiolake, “Olamo tu pa bazuevomo voa ubeubezato ko maba, ‘Aṉata abeta ziovou reriko ko ziolo poso ni abeta urikatou puju ama taku kale, ti kobeta barolou koa taku aṉa a dovozikou keru aṉako iruruputo,’ kimevou.

³³ Ako mata puju ama taku kale aṉata abeta ziovou talio Jerusalema, pui uri tu kala poropita ta o vouvou edolokoi ako Jerusalema peuru kale inio ke vouvaemakoi muli sole!

³⁴ “Me Jerusalema mela! Meta me daima ni me vouvaemani mela se poropita madu se vo Baṉara o soroemani mekasi! Latau taku inio aṉata a mela zaria padoemelo me tu a melati vailo, omadeuvo ko kokorako ta ko padoeka koko meqora poso koko zabu vima jari, melai meta meda lupaova!

³⁵ Sole meko peuru ta ivulu kota elou, ni Baṉara ta o vaekou meko Jelepade? Ni meta pui mata meba lelou aṉa, ti kobeta barolou koa taku so keru me eri kimevou keru, ‘Vo Baṉara ta mauru o ivou vo, vo o kuevani voko ṉikale,’ ” kiolake.