Luke 10 - BAṈARA KO VAIRU AMA LEVELEVEO

Jisu ko soroemo sikeura toni omuqa madu

¹ Koko tova inio vo Lekasa Jisu ta o pitoemake mata sikeura toni omuqa maba poso ni o soroemake omuomuqa kidi voko kuleto kiadama peuru ni zae poso kale ko mainio o ṉavi opa kai ziovo ama tova ka kiolake.

² Ni vota eri kiolake sekasi, “Matu kubo madu ta ke inainaova tu ke tuvevo puelo aṉa, melai pui kubo madu se kepa tauvemo amu. Omadeuvo matu kubo sailao ta ikoana kiaro kale jari, melai pui kubo madu inio seke padotani sai. So sole vararaitomo vo epa ko Lekasa kasi, tu vota o soroemo voko iruruputo ko maba poso tu ke kajoriko voko epa.

³ Olamo! Aṉata a joroemela me omadeuvo kama inobe ama silosilo ama sipi ko meqora poso jari kama piru siele ko valuvalu.

⁴ Ni meta pui me borikou kama seleni ni pasepaseto ko vesa ni kama buti. Ni pui me dokolou tu vati pesio kala maba keve tona.

⁵ Ni koa pade me meqai amaqeovo ama kale, ta eri kimevou kuleto, ‘Bule ta ko elou komia pade kale,’ kimevou.

⁶ Nio koa pade kale o evani kala vo o bulemuani o elou ta meko bule sama pesio ta kovai loilou, melai pui soala o elou ta kota ko melai vaitou me ṉavi.

⁷ Meta me elou sai koa pade kale ni me quovou ni me nozuekou ko quli seke katimelo ama quli, ako vo iruruputo ko maba ta o tabariovou sole. Melai meta pui pade azo pade me elou.

⁸ Ni kiada keru meme amaqeovou keru kala peuru kale ni saizamu ta ke baroekimelou me, meta me quovou se maba poso ke vaeko ama quli meko tanama kale,

⁹ ni meta me urikimou se vere amu koa peuru kale amu, ni meta eri kimevou saizamu kasi, ‘Vo Baṉara ko lekasa puo ta meko sipole’ kio.

¹⁰ Melai so keru meme amaqeovou keru kala peuru kale ta sai pui ke baroekimeloa koi me, ta me jaqorou koa peuru ko keve poso kale ni eri kimevou,

¹¹ ‘Ko pari meko zavaṉa kale ama koko ramatako eṉeko kiti kale eṉeta ṉe bapazika eṉeko kiti topi azo, tu meqai nianiiovou vo Baṉara ko korakorailo mekasi ama. Melai meta pui ukaka me ikou komi quli, vo Baṉara ko lekasa puo ta lula meko sipole kota evala!’ kimevou.

¹² Aṉata a bazuemela me, koa matuma ṉaniu titizato ko kale ta vo Baṉara ta o matu koqotaekou koa peuru kokai paloasou Sodomo peuru kale amu ke kovo ama koqotato!” kiolake.

Pui ko tuvevo putako peuru poso

¹³ “Matuma tapata kio ko melai barolou mea Korazini peuru kale amu mela! Ni mata me Betiseida mu mela ko melai barolou! Ako koa aqasiele ama iruruputo koko ereima mekasi ta ko erei pui Jiu amu kasi Taea ni Saidoni peuru kale tea, koa omuqa peuru kale ama maba poso ta lulavo inio keta papu ni ke kiako ko baeke sabosabo ni kekai raibizio ko pari ke tupu topi, tu kasa ke iko seko sarueko kale azo ama lilizio.

¹⁴ Melai titizato ko ṉaniu kale vo Baṉara ta o koqotaemelou me matuvole kokai paloasou ko Taea ni Saidoni peuru kale ke evani pui Jiu amu ke kovo ama koqotato, se pui ke keani koa aqasiele ama iruruputo ko meme qeako jari ama.

¹⁵ Ni me Keponeami peuru kale amu mela ta raura kamela ta be kimela kio, melai meta me risailou helid kale!” kiolake.

¹⁶ Nio Jisu ta mata eri kiolake voko disaipeli poso kasi, “Vo o didiemelo ala me, ta o didiela aṉa, ni vo o melai kideipo ala me ta olai kideipa aṉa, ni vo olai kideipo ala aṉa ta ovai kideipa vo o soroeleni aṉa,” kiolake.

Sea sikeura toni omuqa ko vaito

¹⁷ Ni vo Jisu o soroeme keru ko tova inio sea sikeura toni omuqa maba ta ke vaitake matuma zoleilo sate, ni seta eri kikelake, “Lekasa, se ziolo poso melai ke zoriṉela eṉe so keru eṉe ṉe riqaema keru ṉoko ṉikale!” kikelake.

¹⁸ Nio Jisu ta o mati tiorikake se ni eri kiolake, “Aṉata ada va keve vo Setani ko pialo kapi jari aukale azo.

¹⁹ Viqomo! Aṉata lula a qatimela ko pizato tu meta meda roveovou lojo dole poso topi ni sikupetala poso topi ni me rovea koqotaeko kiadama Setani ko pizato, sole pulia quli ta tapata kopa imelou me.

²⁰ Melai meta pui kai zoleilo ko ziolo ko zorimelo me, melai meta zoleimo ako meko ṉi poso ta lula kota rikiziovi aukale tu meta Baṉara ko qoqono kalea mela sole,” kiolake.

Jisu o zolei keru

²¹ Ni koa taku kale Jisu ta ota matu zoleike vo Tabu ala Auvana kale, ni eri kiolake, “Mama, au ni miduku ko Lekasa ṉa! Aṉata a qaseka aṉako uriavo ṉokasi, ako ṉota lula kasa ṉoma ika se lezumato pide amu kasi ko quli ṉo ṉoda ma mutakako se nianiiomu ni seke lezumatani. Tuvevo Mama, ko ikio ṉoko zario tu kota so ko kalo ni ṉota ṉoqai zoleiva sole.

²² “Aṉavo Mama ta lula o katile aṉa kiadama nianiio ni pizato. Puliala ta olai nianiia aṉa vovo Meqora lala inio kio, melai aṉavo Mama o kiada inio olai nianiia aṉa, ni puliala ta ovai nianiia aṉavo Mama melai aṉa vovo Meqora lala inio avai nianiia vo ni sea poso aṉa vovo Meqora lala a bitoemani tu kasa a ivo vo,” kiolake.

²³ Nio vo Jisu ta o vabaliake voko disaipeli madu kasi ni eri kiolake sekasi moizavole, “Meta meqai qulepa kelo ko quli meme qeako quli vairutu!

²⁴ Ako aṉata a bazuemela me, ko quli kubo poropita madu ni se aikovakova poso kekai zariovima kelo ikio meta me qea, melai seta pui kepa roveovi kelo, ni se kekai zariovima viqo ikio meta me viqa, melai seta pui kepa roveovi viqo,” kiolake.

Uri ala Sameriala maba ko podepodeti

²⁵ Ni kala maba Mosese ko Bazu okai nianiiekatani ta o kuevake ni o madoevake sipativo vo Jisu. So sole vota eri kiolake vo Jisu kasi, “Tanala, Nianiiekato ko maba ṉa! Loma quli a erekou nio aṉata a qovou ko noqola kama saevo?” kiolake.

²⁶ Ni vo Jisu ta o vati tiorikake vo ni eri kiolake vokasi, “Noi nio ko Tabu ama Riki kikolani? Ni loma ikio ṉoṉo diromikako sai?” kiolake.

²⁷ Nio voa maba ta o tiorizatake ni eri nio kikolani kiolake, “ ‘Meta roquevomo vo Baṉara mevo Lekasa pado ama meko bulo kale, ni pado ama meko vatolo kale ni pado ama meko pizato kale, ni pado ama meko kerukeru kale,’ ni ‘Meta roquemomo edolomu omadeuvo me ṉavi me roquivani jari,’ nio kikolani,” kiolake.

²⁸ “Ṉo kiṉolani ta sidopu ni korokoroti, tu ṉota ereka ko ni ṉota ṉo jaevou,” kiolake vo Jisu voa maba kasi.

²⁹ Melai voa Mosese ko Bazu okai nianiiekatani maba ta oka zariake kasa iko voko sidopu kiolake, so sole vota mata o kuimaevake vo Jisu ni eri kiolake, “Melai lave inio sea edolomu se aṉa a roquemo amu?” kiolake.

³⁰ Nio Jisu ta o vati tiorikake vo ni eri kiolake vokasi, “Omadeu taku kale kala maba ta obeta saqorake Jerusalema azo Jeriko. Ni vo obeta talia keru inio se kuilokuilo amu ta kevai kasakeake vo keve tona, ni keta va zaṉekake voko suma ni lomaloma, ni ke pazovake vo, ni ke vaevake vo, ota vouva kikelake sole.

³¹ Ni kala siama vo o taliovini koa keve tona ta o veake vo ni vota ota va titiriputake vo ni ota saqorake keve koa rana.

³² Ni koa omadeuvo jari nio kala Livai toutou kale ala ta obeta kuevake, ni o baroake sai ni o veake voa maba, vo melai ota va titiriputake ni ota olake keve koa rana.

³³ Melai kala Sameriala maba ta obeta taliake sai kude ni o baroake ni o veake vo ni vota o matu roquevake vo.

³⁴ Ni vota o olake voa maba kasi ni ota vai raibikake ko oela meresini ni vaini ko ju voko tabi topi, ni ota va lupikake ko. Ni vo Sameriala maba ta o zazuevake voa tabi ala maba voko biaṉa topi ni o vati olake mamazo ko pade kasi, sai vo o vati vailekoi vo.

³⁵ Ni koko raneo kale inio vota o kativake kama seleni koa pade o kati vailani tu vota o vati vailo voa tabi ala sai, ni koa seleni ta kubo ipu ni ṉaniu ko elo koa pade kale ko malezikako, ni vota eri kiolake koa pade o kati vailani kasi, ‘So keru aṉa a vaitou keru koi kude, aṉata aṉa besiekou ṉo ṉovai ṉamuko avo vo tiniavo,’ kiolake.” Ni vo Jisu ta obeta olake pesio ni o kuimaevake voa maba, ni eri kiolake,

³⁶ “Sole sea zouke azo ta lala inio vo o roqueveni voa maba se kuilokuilo amu ke toraeveni ta be kiṉola?”

³⁷ Ni voa Mosese ko Bazu okai nianiiekatani maba ta eri kiolake, “Voa maba vo o tauveveni vo, vo inio vo o roqueveni,” kiolake. Ni Jisu ta o opatake, ni eri kiolake, “So sole ṉota ola, ni pa ereka so jari,” va kiolake.

Jisu ko soipiko Mata ni Mere

³⁸ Nio Jisu ni voko disaipeli madu ko talio kale, vota okai baroake kama pado peuru sai kama pado rekoreko Mata ṉi sama ko baroekivekoi vo koko pade kasi.

³⁹ Ni kota visi sama Mere ṉi sama, koko papima vo Lekasa Jisu ko kiti kasi ni koko didiekema voko nianiiekato.

⁴⁰ Ni Mata ta kubo koko riteraite, so sole kota kota, bomuike ni kota kovai kuevake vo Jisu ni eri kikolake, “Lekasa, kota uri kio ṉokasi tu aṉako visi ta kolai vaeko aṉa kiadama iruruputo tu aṉata a ereko a qiada kio? Bazueka ko tu ko kilo tu kopa tauvelo aṉa!” kikolake.

⁴¹ Nio vo Lekasa Jisu ta o kati tiorikake ko ni eri kiolake, “Mata, Mata! Ṉota tiṉoliṉoli ṉoqai eva matu kubo quli,

⁴² melai omadeu quli ta kobe qulepa. Mere ta lula ko pitoekala koa uri ama quli, ni pui kopa taka rapeziovou kokasi azo kiala,” kiolake.