Kolosi 4 - BAṈARA KO VAIRU AMA LEVELEVEO

¹ Ni me lekasa poso mela, meta sidopu emo ni ijatinia mati vailo emo meko mabaku poso, ako me melai meta kala Lekasa samela aukale sole.

Saevo ko bazu

² Pui lalamato vararaito vo Baṉara kasi meko zakaremu ama kerukeru kale, ni meta kativomo meko uriavo vo Baṉara.

³ Ni vararaitomo tu vo Baṉara ta o tauveqelo eqe, tu vota o katiqelo eqe uri ama bazubazuto ko taku tu eqeta qekai bazubazuto vo Karisito lulavo mutamuta kale ko evema. Koa bazu kai bazubazuto kale inio aṉata abeta eva erisaṉa pirito pade kale.

⁴ Lati vararaitomo aṉa tu Baṉara ta o tauvelo aṉa tu a uria zakaremu pueko koa bazu, ako kota ko male tu aṉata soa uria zakaremu pueko a elo sole.

⁵ Meta nianiio emo meko iruruputo kale se pui ke tuvevo putani maba poso kasi, tu meko taku ta pui ko ṉamuilo meko kaseko keru ko Uri ama Bazu.

⁶ Meko pesio poso ta bule ama ni korokoroti ama ko elo, ni meta paqumukomo katimo se maba madu meko korotoma opato.

Paula ko uluto sama pesio

⁷ Vo Tikikasi, animevo lotu tamania kale ala, vo eqe qe roquevani kala pado kerula kala eqe kale ala nabulu vo Lekasa ko iruruputo kale, vo inio o melai bazuekou kiadama quli aṉa a erekako.

⁸ Sokale avo inio aṉata a joroeva vo mekasi, tu vota o melai bazuekou eṉeko elo, tu koa bazu ta ko zuvarikou meko bulo poso.

⁹ Aṉata a joroeva vo Onesimasi vo sase, vo eqe qe roquevani kerula kala eqeko tamania kale ala. Vota kala pado mekale ala. Nioqa inio qo melai bazuekou me kiadama quli koko ereivako koi.

¹⁰ Arisitakasi ta obeta eva aṉa sase koi pirito pade kale. Vota o soroeka voko roquano mekasi, ni so jari vo Maka, Banabasi vo sasa tamania kale ala melai o soroeka voko roquano. Aṉata lula a mela soroeke leta kale vo Maka ko bazu mekasi, tu vota o barou tea meko peuru kale, meta me uria baroekivou vo.

¹¹ Ni Josua, kama pado voko ṉi ta Jasitasi kevai nokaekani, vo melai o soroeka voko roquano mekasi. Nia zouke Arisitakasi, ni Maka, ni Josua, ke kiada inio seke liliziani Jiu amu seke iruruputani aṉa sase Baṉara ko lekasa puo kale avo, ni seta lula ke matu tauvelani aṉa.

¹² Epaparasi melai o mela soroeka voko roquano. Vota mata kala pado mekale ala ni vota kala pado Jisu Karisito ova nabuluputani. Vo inio o melati vararaitani me kiada keru voko bulo kale ama kora kale, o paseva vo Baṉara tu vota o pataitimelo ni o muqarimelo me, ni o melati vararaita me tu meta pui didoda me elou, melai me uria zorikou vo Baṉara ko vatolo.

¹³ A vilu kale aṉata ada va kea voko matu tapata kai toraeko ko iruruputo tu o tauvemelo me Kolosi amu mela ni o tauvemo se Leodisia peuru kale amu ni Hairapolisi peuru kale amu.

¹⁴ Ni vo Luke eqe qe roquevani dokita ni Demasi ta qo soroeka ko roquano mekasi.

¹⁵ Meta baroekikomo aṉako roquano se Leodisia ma lotu qoqono kasi, ni ko Nimipa kasi, ni koa lotu qoqono kasi, ko padoivako koko pade kasi.

¹⁶ Me baikou viqo komia leta ko tiromiako mea lotu qoqono kasi, ta me joroekou Leodisia peuru kale ke evani lotu qoqono kasi tu kota ko tiromio sekasi. Ni ka pado leta ko lula aṉa a rikiekema se Leodisia ma lotu qoqono kasi, ta me Kolosi amu mela melai me diromikou ko.

¹⁷ Ni bazuevomo vo Akipasi, tu vota o tovoziko ereko koa iruruputo Jisu lula ova pitoekema vo tu vota o ereko.

¹⁸ A ṉaviko ṉase kale aṉa Paula lala inio a rikieka aṉako roquano mekasi. Meta kerukeruelomo aṉata pirito pade kale abeta eva. Vo Baṉara ko roquano ta ko elou me tona. A baika.