Kolosi 3 - BAṈARA KO VAIRU AMA LEVELEVEO

¹ Meta lula me jaeva Karisito sase voko voukale azo ama mata saevo kale, so sole meta viluloqu kai emo ko aukale ama quli, sai vo Karisito o papuakoi voko lekasa puo ko papupapu topi Baṉara ko palo rana vasia rana.

² Meta kerukeruekomo koa keve aukale ama kiada keru. Ni meta epezomo kerukerueko pala koa keve poso komia peuru ma peuru kale ama.

³ Ako meta lula meda vovini jaria mela inio, melai meko auvana poso ta ko saeva Karisito sase vo Baṉara o mela tukiekako saevo kale.

⁴ Vo Karisito inio mevo tuvevo ala saevo, ni so keru vo o puratou keru inio me melai me zomanou kovo voko ṉaṉaidara vo sase.

Tana kama ni vaini ama saevo

⁵ Vaekomo ereko ko ruqe ama quli komia miduku kale ama, zave ni rusurusuavo, ni takuto, ni olavo, ni pazapazailo, ni ruqe ama viluloqu, ni kiadailo, ako kiadailo ta kama pado keve beku ko ilusiko ko sole.

⁶ Soama quli kale inio vo Baṉara ko koqotato sama korakorailo ta ko kilou sea maba poso kasi se pui ke zorivani vo.

⁷ Lulavo meta soa saevo me eve koa kalo poso kale, ni kota mabaku ko imele me.

⁸ Melai erisaṉa meta pui memai korakorailou, ni pui me niumaemou edoloma maba poso. Puliama maulumauluto ni kovasa puto ta ko rukuilo meko suto kale.

⁹ Meta pui lipalipaekinio me ṉavio kude, ako meta lula me vaeka meko lulama saevo ni kalo sole,

¹⁰ ni meta lula vairu meda eva erisaṉa. Baṉara ta o ereke ni vairu o ike komia saevo me tona, ni vota pui o lalamata vairu imelo me o ṉavi jari, tu meta mevai uria nianiiovou vo.

¹¹ So sole vo Jisu Karisito omadeu saevo me vati evani mela kale ta puliama koko edolovo se pui Jiu amu pui movemove amu ni se Jiu amu lula movemove amu, ni se edolokoi kazo amu, ni se piru ama siqoa maba poso, ni se mabaku poso, ni se pui mabaku poso. Animea kiada mela ta omadeu me eva Karisito kale vo raura kala.

¹² Me inio vo Baṉara ko mabamu mela, vo lula o pitoemeleni mela ni o roquemelani mela tu meta o ṉaviko me elo. So sole meta roquekiniomo meko tauvekinio kale, ni isuatomo, ni zarazaraimo, ni baisekiniomo, ni inobe emo.

¹³ Meta tauvekiniomo, ni odouvikiniomo me ṉavio kude so keru kala me azo o ketuketuevou keru kala edolola. Meta odouvikiniomo me ṉavio kude omadeuvo vo Lekasa Jisu ta lula o melati odouvikinie me jari.

¹⁴ Kiadama koa uri ama kalo poso ta kai iruruputomo roquano kale, ko omadeu tubo ko iko ama koa kiadama, tu pulia quli ta ko niumaekou meko omadeu elo.

¹⁵ Koa bule vo Karisito o puarikako anime kasi ta ko aveavemelou me kiadama quli meme erekako quli kale, ako vo Baṉara ta lula o pitoemele me tu meta omadeu qoqono me elou bule ama kerukeru kale. Ni meta kativomo vo Baṉara meko uriavo kiada keru.

¹⁶ Meta kerukeruekomo vo Jisu Karisito ko raura kama bazu meko bulo poso kale matuvole kiada keru. Meta nianiiekikiniomo ni bazubazuekiniomo me ṉavio kude ko raura kama nianiio kale. Ilusivomo vo Baṉara azaazama tabu ama kera kale, ni kai keraomo koa kera poso vo Baṉara ko auvana ko katimelako me, meko bulo kale ama ilusivo kale vo Baṉara.

¹⁷ Kiadama quli meme erekako ni me qasekako quli meta erekomo vo Lekasa Jisu Karisito ko ṉikale kude, so keru meme rauraeva keru vo Baṉara vo animevo Mama vo Jisu kale kude.

Lotu saidi ko omadeu elo

¹⁸ Me tanama reko poso mela meta zorimomo meko tanama lasive poso, ko ikio koa koidi me Karisito me luluevani mela me ereko ama.

¹⁹ Ni me tanama lasive poso mela, meta roquemomo meko omaomadeu reko poso, ni meta pui mai karaṉo se.

²⁰ Ni me meqora poso mela, meta zorimomo meko mama ni niania poso kiada keru, ako ko ikio vo Baṉara ko zolevako quli sole.

²¹ Ni me mama poso mela, meta pui karaṉo kale korotimo meko meqora poso, tu seta pui duki ke elou.

²² Ni me mabaku poso mela, meta zorimomo meko miduku kale ama lekasa poso kiadama quli kale, erekomo ko, pui so keru seke melati vaila keru me pala, omadeuvo sea maba poso se kekai zariani tu seko lekasa poso ta ke melo jari, tu seta ke rauraemo. Melai meta erekomo koa koidi meko pado ama bulo sate kiada keru, ako meta me rauraeva mevo Lekasa Jisu sole.

²³ Meta erekomo kiadama iruruputo seke melai soruekako meko pado ama bulo sate, ako me inio ko me vo Lekasa Jisu meva iruruputani mela sole.

²⁴ Vo Lekasa Jisu Karisito ta reketekete saṉa o imelou me. So inio meta me qovou koa vikuvikula vo oma inainaekako voko maba madu. Ako Karisito inio vo tuvevo ala Lekasa vo me meva nabuluputani.

²⁵ Se ruqe ke erekani ta keta ka kovou seke erekako quli ko vaitotola, ako vo Baṉara ta o titizimou kiadama maba poso koa omadeu podepodeti sama titizato kale sole.