Kolosi 2 - BAṈARA KO VAIRU AMA LEVELEVEO

¹ Aṉata aqa zaria bazuemelo me aṉako mela matu koidipo me, ni se Leodisia mu, ni kiadamu se pui ke toraelani aṉa.

² Sokale avo inio aṉata so a qava tu meko bulo poso ta ko zuvariovou, ni meta omadeu me elou roquano kale, tu meta me uria paqumukou ko meme duvevo puekako quli. So inio meta mevai nianiiovou vo Baṉara ko mutamuta kale ama kerukeru kale o eveni, vo erisaṉa Baṉara kasa o ivani, vo inio vo Jisu Karisito.

³ Vo o kiada inio o roveani melai nianiiekiko vo Baṉara ko mutamuta kama nianiio.

⁴ Aṉata a melai bazue komi tu meta pui zarievo kala tu vota o saruemelo me voko ubeubezato sama pesio kale.

⁵ Ako aṉata pui a evani lala mekasi, melai aṉako kerukeru ta me tona, ni aṉata ada zoleiva so keru aṉa a viqa keru meko omadeu vatolo elo, ni pizaka lojo Karisito vai oqu kale.

Pado ama saevo, Karisito o puarikako

⁶ Meta lula mevai nianiiovi vo Lekasa Jisu Karisito, so sole meta sidopua elo emo vo omadeu vati elo kale.

⁷ Meta rakimatomo ni vinaekomo meko saevo vo tona, ni pizatomo meko oqu kale, ko lula me viqema nianiiekato jari. Ni meta kativomo vo Baṉara meko uriavo kiadama quli kale.

⁸ Balauvomo, tu puliala maba ta o melai nianiiekikou kama utube ama quli, maba ko quli pala, ni pui o lipaemelou me ni pui o saruemelou me, ako koa nianiiekato ta maba poso kasi azo ko vikuako, vikuvikula bazu kasi azo koko bikoirikako vo Baṉara ko bazu, ni ko kuevako peuru ma peuru kale ama azaazama ziolo poso kasi azo, kota pui Karisito kasi azo.

⁹ Ako koa pado ama ni noqola kama ni okotoma Baṉara ko saevo ni kalo ta ko eva ni ko saeva Karisito tona, voko maba elo kale.

¹⁰ Kokale inio ko pado ama saevo ta ko katiziovi mekasi vokale kude. Vota raura kala kiadama piza kama auvana poso kasi azo.

¹¹ Meko omadeu vati elo kale vo ta meta lula me qoa meko auvana kale ama mamola. Karisito inio lula soa mamola puemelo o eva voko rupasimelo kale me sarueko ko pizato kale azo. Koa mamola ta omadeuvo se Jiu amu ke erekako moveilo ko mamola jari, ko seke erekako seko tupu kale ama, melai koa mamola meko ta pui maba o erekako melai Karisito o erekako ikio.

¹² So keru me bapitaiso me eve keru, meta me mutaziovi jari vo Karisito sase, vo ke mutave keru kea kale voko vou ko tova, ni meko bapitaiso puilo kale meta lula mata me jaeve jari vo Karisito sase, meko kai oqu vo Baṉara ko piza kama iruruputo kale, vo o saeviveni vo Karisito voukale azo.

¹³ Lulavo meta pui saevo mela auvana kale, ako so keru meta sarueko poso samela sole, ni meta pui Baṉara ko toutou Izireli kale amu mela, Baṉara ko Bazu pidea mela koko katiziovima Mosese kale kude. Melai erisaṉa vo Baṉara ta o saevimela me Karisito sase, Baṉara ta lula ota mela akoeka kiadama animeko sarueko poso.

¹⁴ Lulavo animeta kuiripato samela, ako animeta me bikoirike Baṉara ko bazu poso sole ko anime kuiripato saṉa ko imelema. Melai vota ota mela maba saqaeke koa sarueko poso vo Karisito kai patoilo ni voukale korosi topi.

¹⁵ Koa korosi topi Karisito ta o koqotaekake kiadama ziolo poso ko pizato. Vota uria zakaremu oma ikake se maba poso vo inio vo raura kala, vo o koqotaekani ko ziolo poso.

¹⁶ So sole meta pui zariemo kake tu seta kuiripato saṉa ke imelo me, me ko melai bazueko kale ko “pui kuo kama sailao” ma “pui nozueko ko ju,” ma meko “tabu iko kama ṉaniu poso,” ma meko “tabu iko kaboso kokai puratako ṉaniu poso, ma sabati ṉaniu.”

¹⁷ Soama tabu poso ta koko kilo ama quli ko suirikako, melai Karisito inio koko tuveano.

¹⁸ Meta pui zariemo tu kake maba poso ta kuiripato saṉa ke imelo me seko rauraraurailo sama pesio kale. Seta ke mela zaria me tu meta me lulueko seko kelokelozato, ko kokai bazutako ko mateana poso ko ilusiko. Se inio se zarazarailo ko maba madu, kikelani, melai seta keta aikaiva seko utube ama kerukeru kale.

¹⁹ Melai seta keta pitasia Karisito kasi azo, vo o mati vailani se voko lotu qoqono kale amu, omadeuvo ko lezu ko kati vaila jari ko tupu. Karisito ta o kati vaila voko lotu qoqono ni o pizatika ko tu kota ko pizato omadeuvo ko tupu ta sailao kale ko uria pizata ni ko rapuka jari. So inio vo Baṉara ko zario.

Vou ni saevo Karisito sase

²⁰ Ako meta lula omadeu me eve Karisito sase, voko voukale, so sole meta lula me vouva vo sase jari. Sokale avo inio meta lula ruparupasia mela ko azaazama auvana poso kasi azo. Nio noi sole inio meta komia peuru ma peuru kale ama maba poso ke kavani jari mebeta kava? Soama kalo ta pui ko malezika mea lotu maba poso mela kasi. Noi sole inio meta me lulueka se maba poso ke melai bazuekako tabu poso,

²¹ koko kasekako “meta pui me qamakou soama quli,” ma “pui me quovou soama quli,” ma “pui me dibaekou soama quli?” Soama tabu poso ta pui ko male tu lulueko.

²² Ako soama tabu poso ta ko niumaema se maba poso so keru se kekai iruruputa keru. Koa tabu poso ta maba poso pala ke kasekako tu kekai nianiiekato.

²³ Tuvevo, soama bazu poso ko kelo ta nianiio sama jaria kelo koko zuruzuruto sama ilusiko kale ko mateana poso, ni koko lipalipa kama zarazarailo kale, ni koko tolaeko ko tupu kale, melai tuvevo avole koa bazu poso ta pui ko malezika, tu kota ko dokolivo vo maba tupu ko zario ko ereko kale azo, ako kota puliama pizato sama sole.