Kelokelozato 7 - BAṈARA KO VAIRU AMA LEVELEVEO

Sea 144,000 vo Baṉara ko nabulu poso

¹ Ni koko tova inio aṉata a qeake ariku mateana kobeta lojoako koa ariku suba komia peuru ma peuru ko kale, seke kati noqozaitani ko ariku ururu tu kota pui ko buirieko ko peuru ma peuru ni rokasana ni ore.

² Ni aṉata mata a veake kala pado mateana ṉaniu ko peatakoi vasi azo obeta kuevani vo saevola Baṉara ko kejo sate. Vota oma velavelaoke sea ariku mateana madu matuma kora kale vo Baṉara o katimeni ko pizato tu seta ke niumaeko ko peuru ma peuru ni rokasana.

³ Nio voa mateana ta eri kiolake, “Pui niumaeko ko peuru ma peuru ni rokasana ni ore poso ti kobeta barou eṉe ṉemai mamola puekou keru ko kejo seko kape poso topi vo animevo Baṉara ko nabulu poso,” kiolake.

⁴ Ni aṉata ada ma viqake seko ataataiti se Baṉara ko kejo ke kape poso topi samu ta seta 144,000 madu inio. Seta koa toni omuqa Izireli toutou kale amu inio,

^5-8 toni omuqa vuro madu omaomadeu toutou kale azo komia toni omuqa toutou kale azo: Jiuda, Rubeni, Qadi, Asera, Napitalai, Manase, Simeoni, Livai, Isika, Zebuloni, Josepa ni Benijimane toutou poso.

Matuma vaki aukale ama

⁹ Koko tova inio a lilitakea lala ta matu ti matuma vaki a qeake; puliala opa roveovo amu ataemo sea kiadama maba poso! Seke kuevini kiadama toutou poso kale azo, se aza pesiomu, kiadama qoqono kale amu ni se azaaza tupu amu kasi azo, seta ke lojoake koa papupapu ni voa Sipi Meqora ko kuleto, ni seta rosia sabosabo tapo ama samu ni ke kamakake ko dauko poso tu ke puratiko seko zoleilo.

¹⁰ Ni seta ke velavelaoke matuma kora kale, ni eri kikelake, “Pakio ta ko kueva animevo Baṉara kasi azo, vo o papuani voko lekasa puo ko papupapu topi, ni vo Sipi Meqora kasi azo,” kikelake.

¹¹ Ni kiadama mateana poso ta ke lojoake koa papupapu ko levoano, ni sea lekasa poso, ni koa ariku biaṉa saevoma ko levoano. Saita inio seta kekai loqunake koa papupapu ko kuleto ni ke ilusivake vo Baṉara,

¹² nio eri kikelake, “Emeni! Mevai rauraeko animevo Baṉara voko ṉaṉaidara, ni raura kama nianiio, ni aikato, ni pizato, ni naizato. Me qativou animeko uriavo latau ṉaniu ni ka ṉaniu! Emeni!”

¹³ Kala sea lekasa poso azo ta o kuimaelake aṉa, ni eri kiolake, “Ṉota ṉobe mai nianiia lave inio sea maba poso se kekai saboivani ko tapo ama rosia sabosabo, ni lai kazo ke kuevani nio, kio?” kiolake.

¹⁴ “Tanala, aṉata pui amai nianiia,” va kialake. Nio vota eri kiolake aṉa kasi, “Ni nio sea maba madu se lula ke pakiziani koa matu tapata kama niumaniumato ko poro kale azo. Seta lula vairu ke ika seko rosia sabosabo poso ni seta lula tapo ke ika vo Sipi Meqora ko vou ko dara kale.

¹⁵ So inio seta ke lojoa vo Baṉara ko papupapu ko kuleto ni seta voko siama madu se keva nabuluputani vo ipu ni ṉaniu voko Jelepade kale. Vo o papuani koa papupapu topi ta o mati elou ni o mati vailou se.

¹⁶ Seta pui mata kepa luapou ni kepa rokauvou, vo ṉaniu ko vualavuala ta pui kopa tolaemou se,

¹⁷ ako voa Sipi Meqora, vo obeta papuani tianiama papupapu topi, ta sevo vailo ko maba oma elou, ni vota o odiemou se noqola kama saevo ko katimako ju sama orori kasi. Ni vo Baṉara ta ota ma zautekou seko vilu kale ama deumu.”