Kelokelozato 5 - BAṈARA KO VAIRU AMA LEVELEVEO

Polopolozi ama buka ni Sipi Meqora

¹ Ni aṉata a qeake kama pado polopolozi ama buka vo papupapu topi o papuani ko palo ṉase topi ni kota omuqa rana riki sama kio ke vinaekema sikeura vinavina kekai vinaekake kale.

² Ni aṉata mata a veake kala pado piza kala mateana, vo matuma kora kale o kaseke keru ko eri kio, “Lala inio o malezika tu vota ota ka rupasiko polopolozi buka ko vinavina tu o redaniko?”

³ Melai puliala kala pado ta inovoana aukale ma miduku kale ma se voumu ke piriziakoi vo o roveovo ala taka rupasiko koa polopolozi ama buka tu ota ka tiromiko koko poro kale ama riki.

⁴ Ni aṉata ada matu ziake ako puliala ta ke veake vo o male ala tu o rupasiko koa polopolozi ama buka ni o tiromiko koko poro kale ama riki sole.

⁵ Sai nio kala pado sea lekasa poso azo ta eri kiolake aṉa kasi, “Pui zialo, ako keatini! Vo Jiuda toutou kale ala Laione, vo Devita vo matula vikuvikula kale ala ta lula ota koqotata, nio vo inio o roveovo ala taka rupasiko koa sikeura vinavina ko polopolozi buka kekai vinaekema tu o redaniko ko,” kiolake.

⁶ Nio aṉata a veake kala pado Sipi Meqora vo obeta lojoani papupapu ko tiania nio ko ariku saevoma biaṉa poso ni sea lekasa poso ta ke qoloevake vati lojolo vo. Voa Sipi Meqora ta lula ota vouvaini jaria velo ala inio. Vota sikeura sotasota kala ni sikeura vilu ala, ko ikio vo Baṉara ko sikeura auvana vo o soroekema pado ama peuru ma peuru kale.

⁷ Voa Sipi Meqora ta o olake ni opa tava koake ko polopolozi ama buka vo o papuani papupapu topi ko palo rana ṉase topi azo.

⁸ Vo o koake koa buka ti koa ariku saevoma biaṉa poso ni sea karabete ariku lekasa poso ta ke loqunake voa Sipi Meqora ko kuleto. Seta kekai okotake noqoeko ko mike, ni ko qolo lolulolu poso ko uria tui kama bube ko sukatikake, koko kio ni kalo ta vo Baṉara ko maba madu ko vararaito ikio ko.

⁹ Nio sai nio seta kevai keraovake kala pado vairu ala kera eri kiolani: “Ṉo inio ṉo male tu kovo koa polopolozi ama buka ni taka rupasiko koko vinavina tu redaniko. Ako ṉota lula ṉoda vouvai sole, nio ṉoko voukale ama siqasiqa elo kale ṉota lula ṉo databaraeme se maba poso Baṉara kaqe kiadama toutou poso kale azo, se aza pesiomu, kiadama qoqono kale amu ni se azaaza tupu amu kasi azo.

¹⁰ Ṉota lula vo Aikovakova Baṉara omai lekasa puani siama madu ṉo ime se tu seta keva nabuluputo vo animevo Baṉara ni seta kekai lekasa puovou ko peuru ma peuru.”

¹¹ Ni mata a lilitakea lala inio ada ma dimanake se kubo vuro milioni mateana madu! Seta ke lojoake koa papupapu, ni koa ariku saevoma biaṉa poso ni lekasa poso ko levoano

¹² nio seta kevai keraovake kala pado kera seko matuma kora kale, vo eri kiolani: “Vo ke vouvaeveni Sipi Meqora nio o male tu mevai rauraeko voko pizato, ni batiro, ni raura kama nianiio ni naizato, ni aikato, ni ṉaṉaidara, tu ilusivomo!”

¹³ Ni aṉata ada ka viqake koko kora kiadama saevoma quli vo Baṉara o erekema quli aukale ama, ni miduku kale ama, ni se voumu ke piriziakoi ko evako quli, ni ivere kale ama quli, koa kiadama saevoma quli peuru ma peuru ko evako. Sea kiadamu ta ke keraovake ni eri kikelake, “Vo okai papuani koa papupapu, ni voa Sipi Meqora ta meqai rauraeka qo aikato, ni ṉaṉaidara ni pizato latau ṉaniu ni ka ṉaniu!” kikelake.

¹⁴ Ni koa ariku saevoma biaṉa ta ke opatake ni eri kikelake, “Emeni!” kikelake. Ni sea lekasa poso ta ke loqunake ni ke ilusivake vo Baṉara ni vo Sipi Meqora.