Kelokelozato 21 - BAṈARA KO VAIRU AMA LEVELEVEO

Vairu ama au ni vairu ama miduku

¹ Sai nio aṉata a qeake ko vairu ama au ni vairu ama miduku. Kuleto ama au ni kuleto ama miduku ta kota parakake, ni ivere ta puliama kota evake.

² Ni aṉata mata a qeake koa Tabu ama Peuru Baṉara ko, ko vairu ama Jerusalema ko saqorako aukale azo Baṉara kasi azo, ko lula ko inainaivako, omadeuvo kama sinaqu rusu ko lula ko uria saboivako tu ko zio raevole kovo lasive kikolako jari.

³ Ni aṉata a viqake kama pado matuma kora ko kuevako koa matuma lekasa ko papupapu kasi azo, eri kikolako, “Erisaṉa azo vo Baṉara ta maba poso kasi ota elou! Vota o elou se sase ni seta voko maba madu ke elou. O ṉavi Baṉara ta se sase o elou, ni vota sevo Baṉara o elou.

⁴ Vota ota ma zautekou kiadama seko deumu seko vilu kale ama. Puliama vou ta kopa elou, ni puliama upotuqu, ni zialo ni tola kopa elou. Ako lulama quli ta lula kota paraka sole,” kikolako.

⁵ Ni vo o papuani lekasa ko papupapu topi ta eri kiolake, “Erisaṉa aṉata vairu a ika kiadama quli!” Ni vota mata eri kiolake aṉa kasi, “Ṉota rikieka komia pesio poso ako kota tuvevo ama ni kerula kama sole.”

⁶ Ni vota eri lati kiolake, “Kiadama quli ti kota paita muli! Aṉata kiadama quli ko tanitanila ni koko paitopaito lala. Aṉa inio a daniekani lala ni a baikani lala koa kiadama. Seke rokauvani ta a qatimou ko ju tabara pide ama, ko noqola kama saevo ko katimako orori kale azo ama ju.

⁷ Seke koqotaeko amu ko ruqe ta aṉata sevo Baṉara a elou ni seta aṉako meqora poso ke elou.

⁸ Melai se pui ke palaitani, ni seke vaekani seko tuvevo puto, ni seke erekani kuvaruvaru ama kalo, ni seke vouvatani, ni seke pauvekani ko ruqe ama iruruputo, ni seke kakokakotani ni ke ilusikani ko beku poso, ni kiadama se lipalipa kamu ta ke risaemou koa matuma nai sama uza ko urusana ko tiania, ko ikio ko omuqama vou.”

Vairu ama Jerusalema

⁹ Ni kala pado sea sikeura mateana poso se sikeura teamuteamu sikeura tovatovama ave kokai sukatako samu kale ala mateana ta o kuevake aṉa kasi ni eri kiolake, “Kua tu aṉa kaseko ko sinaqu rusu, vo Sipi Meqora ko reko,” kiolake.

¹⁰ Nio vo Tabu ala Auvana ta olai sukatake aṉa, ni aṉako uloito jari ama kelokelozato kale inio vo mateana ta o lati peatake kala matu okate ala sopu ko toubana kale. Sai nio vota ola kasekake ko vairu ama Jerusalema, Baṉara ko Tabu ama Peuru, ko kobe saqorako aukale azo vo Baṉara kasi azo.

¹¹ Koa matu peuru ta ko simanamana putake vo Baṉara ko ṉaṉaidara kale. Kota omadeuvo ko mudamudatako lado jari, jasipa lado jari, ni bulebule ama qelasi jaria keloma lado jaria kapikapitoma.

¹² Kota matu okate ama lado idi sama, ni toni omuqa veutu ama, ni koa toni omuqa veutu tona ta toni omuqa mateana ko kati vailako. Nio koa veutu poso tona ta ko rikiziovi Izireli ama toni omuqa toutou poso ko ṉi.

¹³ Koko ariku ranama levoano kale ta zoukezouke veutu sama: zouke ta ṉaniu ko peatakoi vasia rana, zouke ta palo rana vasia rana, zouke ta made rana vasia rana, ni zouke ta ṉaniu ko sulupakoi vasia rana.

¹⁴ Voa matu peuru ko idi ta ko erei toni omuqa lado vola ko matu lado kale, vo Sipi Meqora ko toni omuqa apositolo madu ko ṉi kokai rikiziovima.

¹⁵ Ni voa mateana vo o lati pesiovini aṉa ta qolo daṉa podetato ko sala, tu okai podetiko koa matu peuru, koko veutu poso, ni koko idi.

¹⁶ Koa matu peuru ta matu uria ijatinia kio kama koko repaso ni koko rosi. Vo mateana ta o podetikake koa matu peuru voko podetato ko daṉa kale: ni koko rosi ta 12,000 kilomita kama, ni koko repaso ni koko okate melai koa omadeuvo sama.

¹⁷ Ni vo mateana ta mata ota ka podetikake koko idi, ni kota 144 vakerana koko okate. Vota okai podetatake kiada keru ama podepodeti kale.

¹⁸ Ni koko idi ta jasipa lado ko mudamudatako kale kota ka ereike, ni koa peuru ta ko ereivake maba tuvevo ama qolo kale, bulebule ama qelasi jaria kapikapitoma qolo.

¹⁹ Koa matu peuru ko idi ko lado vola ko matu lado poso ta ko kapikapitako lado ko kiada kama. Kuleto ama vola ta jasipa lado, omuqala ta sapaea lado, zouke ala ta aqate lado, ariku ala ta emerali lado,

²⁰ sike ala ta onikisi lado, varimujala ta kaneliani lado, sikeurala ta kuatozi, siotolu ala ta berilo, siakavala ta topazi, toni ala ta kalasidoni, toni omadeula ta tukuesi, toni omuqala ta amatisiti.

²¹ Ni koa toni omuqa veutu ta bavi kile ko toruru kale ko ereima. Ni koa matu peuru ko keve ta qolo ko kiada kama, bulebule ama qelasi jaria kapikapitoma.

²² Ni aṉata pui a qeake kama pado Jelepade koa matu peuru kale, ako vo Kiadama Pizato sala Baṉara ni vo Sipi Meqora ta qo ṉavi Jelepade qota evake sole.

²³ Ni koa matu peuru ta pui kokai zaria ko ṉaniu ni kaboso ta kokai talolo, ako vo Baṉara ko ṉaṉaidara ta kokai taloake ko, ni vo Sipi Meqora ta koko juke ota ka evake sole.

²⁴ Peuru ma peuru kale ama qoqono poso ta ke taliovou koko zakaremu kale, ni se peuru ma peuru kale ama aikovakova poso ta ke kati amaqeovou seko batiro koa matu peuru kale.

²⁵ Koa matu peuru ko veutu poso ta veukaveuka ko elou koa rosia ṉaniu; kota pui kopa tibuliovou, ako saita puliama ipu ko evakoi sole.

²⁶ Ni kiadama peuru ma peuru kale ama qoqono poso ko jiku ni batiro ta ke kati ziovou koa matu peuru kale.

²⁷ Melai puliama kuna kama quli ta kopa amaqeovou koa matu peuru kale, ni puliala vo o erekani ko qurato sama quli ni vo o lipalipatani. Se lula kota ma rikiziovini seko ṉi poso vo Sipi Meqora ko noqola kama saevo samu ko ṉi ko buka topi ko kiada inio ke amaqeovou koa matu peuru kale.