Kelokelozato 2 - BAṈARA KO VAIRU AMA LEVELEVEO

Epesasi lotu qoqono kasi ama bazu

¹ “Ṉota eria rikito eve sai Epesasi ama lotu qoqono ko mateana kasi: Eri nio koa bazu koko kuevako vokasi azo vo koa sikeura suti voko palo ṉase topi sala ni o taliani koa sikeura qolo papupapu juke ko ko tiania:

² aṉata aqai nianiia ko meme erekako quli ni meko matuma iruruputo ni meko inobea kai pataito ko naqunaquto. Aṉata a baqumuka ta meta pui memai zoleiva se ruqe ama maba madu. Meko madoemo se ke ṉavi ke apositolo puivani kale meta lula memai potoa se ta seta lipalipa kamu.

³ Meta me bizaka lojoa, ni lula ko tolaemela ko tapata poso aṉako ṉikale avo, melai meta pui koqo me eva.

⁴ Melai ko aṉa pui ko zolelako quli mekasi ama ta eri nio: meta pui me roquela aṉa erisaṉa omadeuvo kulekuleto me roquele aṉa jari.

⁵ Kerukeruekomo meko roquelo koko okate sai me lula me biavekoi kazo! Liliziomo koa meko sarueko kale azo, ni meta kamo kuleto me qaevo jari. Ako meta pui me liliziovou meko sarueko kale azo inio aṉata a melai kilou nio me tamela kovole meko juke ko papupapu sai koko zaekale azo.

⁶ Melai ikoana mekasi ko quli koko zolelako quli, ako meta meqai kideipa se Nikolasi ke luluevani ke erekako quli, omadeuvo aṉa melai aqai kideipa jari.

⁷ “Uri tu meta paqumukomo meme viqako quli vo Tabu ala Auvana kiolani sikeura lotu qoqono poso kasi! Seke koqotaeko amu ko ruqe inio aṉata a qatimou ko zariekato tu ke kuo koa ore noqola kama saevo ko puarikako ko epa koko qotupako vo Baṉara ko aukale ama kiaro kale.

Samena lotu qoqono kasi ama bazu

⁸ “Ni ṉota eria rikito eve sai Samena ama lotu qoqono ko mateana kasi: Eri nio koa bazu koko kuevako vo kiadama quli ko tanitanila ni koko paitopaito sala kasi azo, vo o vovini ni mata o tova saeveni voukale azo.

⁹ Aṉata aqai nianiia meko tapata poso; aṉata a melai nianiia ta meta ozaoza kamela, melai meko noqola kama batiro ta maba matuma! Aṉata aqai nianiia seko zarazaraemelo se ‘Eṉe inio ko Jiu amu ṉela’ kikelani, melai seta pui so, ako seta vo Setani ko qoqono kale amu inio sole.

¹⁰ Meta pui taka ṉalo koa tapata poso koko kilo ama mekasi. Ako keatini! Vo Setani ta o kilou madoemelole me ni kake mela meta ke vaemelou pirito pade kale, ni koa meko tapata poso ta toni ṉaniu kale inio kobeta ziovou. Melai meta lai oqumo aṉa, ti kobeta barou seko vouvaemelo melai, nio aṉata a qatimelou me koa noqola kama saevo, omadeuvo seke kuleani voziekinio kale ta ke koa seko tarapae jari.

¹¹ “Uri tu meta paqumukomo meme viqako quli vo Tabu ala Auvana kiolani sikeura lotu qoqono kasi! Seke koqotaeko amu ko ruqe ta pui kopa tolaemou ko omuqama pado vou.

Peqamami lotu qoqono kasi ama bazu

¹² “Ni ṉota eria rikito eve sai Peqamami ama lotu qoqono vo mateana kasi: Eri nio koa bazu koko kuevako vokasi azo vo omuqa rana ivoivo ama benisi sala.

¹³ Aṉata aqai nianiia sai meme evakoi ta vo Setani o lekasa puakoi. Meta kerula kamela, ni meta pui meba vaeke meko lai oqu aṉa; so keru vo Anitipasi ke vouvaeve keru melai pui meba vaeke meko oqu. Vota kerula bazuto olai eveni aṉa, nio ke vouvaevake mekasi sai vo Setani o evakoi.

¹⁴ Melai kama poso quli ta ikoana mekasi ko aṉa pui ko zolelako quli. Eri nio; kake ta inisiana me sase seke luluekani vo Beilami ko nianiiekato, vo o vati zaubari-keni vo Beilaki se Izireli amu ko zolizoliemo tu seta ke sarueko seko kuo kale ko sailao beku poso kasi lula kekai siqatake, ni seko pauveko kale ruqe ama iruruputo.

¹⁵ So jari inisiana kake maba poso se kebeta evani meko valuvalu seke luluekani vo Nikolasi ko nianiiekato.

¹⁶ So sole meta liliziomo meko sarueko kale azo erisaṉa! Pui me liliziovou, nio aṉata a qilou inio aba mati pazokiniou seke saruekani aṉako suto kale ama benisi kale.

¹⁷ “Uri tu meta paqumukomo meme viqako vo Tabu ala Auvana kiolani sikeura lotu qoqono kasi! Seke koqotaeko amu ko ruqe ta a qatimou kama koko mutaima mana. Ni aṉata amai okotimou katimo sea kiadamu ko tapo ama lado, ko vairu ama ṉi kokai rikiziovima, ko puliala kala pado maba okai nianiiako melai vo o koani ko o kiada pado inio okai nianiia.

Taiataira lotu qoqono kasi ama bazu

¹⁸ “Ṉota eria rikito eve sai Taiataira ma lotu qoqono ko mateana kasi: Eri nio koa bazu koko kuevako vo Baṉara vo Meqora kasi azo, vo o vilu ta uza ko urusana jaria urusoma vilu sala, ni o kiti ta matu bulebule ama barasi jaria kapikapito ama sala.

¹⁹ Aṉata aqai nianiia ko meme erekako quli, ni meko roquano, ni meko piza kama oqu, ni meko nabuluputo, ni meko inobea kai pataito ko naqunaquto. Aṉata a melai nianiia me ta ko kuleto me erekema quli ta meqai paloasa koko ereko erisaṉa.

²⁰ Melai ko aṉa pui ko zolelako quli mekasi ama ta eri nio: meta me zarieka koa rekoreko Jezebeli, ko kokai kuiziako ko ṉavi ta ko ikio vo Baṉara ko poropita kikolako. Koko nianiiekato kale kota ko saruema odiemo aṉako maba poso ni seta ke pauveka ko ruqe ama iruruputo poso ni ke kua ko sailao ko lula beku poso ke katikako.

²¹ Aṉata lula a qatika ko taku tu kota ko lilizio koko ruqe kale azo, melai kota pui koka zaria lilizio koko pauvezato ko iruruputo kale azo.

²² So sole aṉata a verepikou nio a dekuekou ko kobo topi ni ke zavemukani ko ta matuma tolailo a qatimou. Seta pui ke liliziovou koa ruqe koko erekako kasi azo nio aṉata taukavole so a imou.

²³ Ni aṉata a ruvurimou se seke luluekani koa reko ko kalo. So inio kiadama lotu qoqono ta kelai nianiiovou ko aṉa inio aqai nianiiani lala se maba poso ko kerukeru ni zario poso ni aṉata a qatimelou me koko vaitotola ma koko reketekete omaomadeu kale kude ko me lula me erekako quli kale avo.

²⁴ Melai mea kiada mela Taiataira peuru kale me evani mela me pui nio me luluekani mela koa ruqe ama nianiiekato, ni me pui nio me lezumukani mela kake maba poso ke kasekako vo Setani ko mutamuta kama nianiiekato ka kikelako. Aṉata eri kiala mekasi, aṉata pui aba melai soroekou mata kama quli tu meta me ereko,

²⁵ melai meta pizaka noqoeko emo ko me lula me noqoekema quli ti kobeta barou aṉako kilo.

^26-28 Seke koqotaeko amu ko ruqe, ni se pui ke lalamato amu ereko ko quli aṉa aqa zariako ti kobeta barolou koko paitopaito kale inio aṉata a qatimou koa omadeuma pizato ko aṉa lula a qoema a Mama kasi azo jari ama, ko eri ama: aṉata a qatimou ko pizato tu seta kade ama lekasa poso kemai elo se pui ke zoripatani peuru ma peuru kale ama toutou poso aeani daṉa sate tu seta ke mujarikou koa toutou poso miduku raro poso ko mujario jari. Ni mata aṉata a qatimou se vo raneodola.

²⁹ “Uri tu meta paqumukomo meme viqako quli vo Tabu ala Auvana kiolani sikeura lotu qoqono poso kasi!