Kelokelozato 18 - BAṈARA KO VAIRU AMA LEVELEVEO

Babiloni peuru ko niaqario

¹ Ni koko tova inio aṉata a veake mata kala pado mateana vo obeta saqorani aukale azo. Vota matu piza kala ni voko ṉaṉaidara ko zakaremu ta kokai taloake ko pado ama peuru ma peuru.

² Ni vota o upaupatake matuvole ni eri kiolake, “Matu peuru Babiloni ta lula kota niaqaria! Erisaṉa ta kota lula se ziolo madu se kuvaruvaru amu seko melo kale ko zae kota evala ni kiadama koko akazako biaṉabiaṉa poso maba madu pui ke kuako ko ere kota evala.

³ Ako koa peuru kale amu ta matu ruqe ama pauvezato ke erekani ni kemai pakeka koa omadeuma kalo peuru ma peuru kale ama qoqono poso, omadeuvo kala maba ta o kativa edolola maba ko vaini ko ju tu matu doilili o ivo vo. Se peuru ma peuru kale ama aikovakova poso ta lula ke mati ereka ko ruqe ama iruruputo koa peuru kale amu, ni se tatabarao ko maba madu peuru ma peuru kale amu ta batiro kekai evake Babiloni peuru kale amu ko viluloqu tamai elole seko kiadama quli,” kiolake.

⁴ Ni mata aṉata a viqake kama pado kora ko kuevako aukale azo, eri kikolako, “Kuemo, saqoromo, aṉako maba poso mela, saqoromo Babiloni kasi azo! Meta pui kai zomano ereko koko sarueko poso; tu meta pui kai zomano koko kovo kale koko koqotato ko ave poso!

⁵ Ako koko sarueko poso ta au ko okate jaria zou kubokubo, ni Baṉara ta ota ka kerukerueka koko ruqe ama kalo poso sole.

⁶ Kai vaitoekomo ko lula koko erekako ruqe mekasi, omuqavole katikomo koko vaitotola ko lula koko erekako quli kale avo. Baṉara ta o katikou koa matu peuru voko korakorailo sama koqotato, ko kokai matu paloaso ama koa naqunaquto ko se lula ke katimelema me, omadeuvo kala maba ta o kativa edolola maba ko vaini ko ju tu matu doilili o ivo vo.

⁷ Katikomo ko matuma tapata ni upotuqu tu ko besieko koa raurailo ni olavo ko kalo ko ṉaviko erekako kale. Ako kota ko raurarauraiva ko ṉavi, ni eri kikola, Aṉata matu sinaqu a bapuani lala aṉako lekasa puo ko papupapu topi! Aṉata pui nabokoa lala, aṉata pui aba buniubuniuovou!

⁸ Sokale avo inio koko ave poso ta omadeu pado ṉaniu kale ta kokai barolou ko, ko vere, ni buniubuniuo, ni nioṉe, ni kota ko siqailou uza kale, ako vo Baṉara, vo o titizikani ko, ta piza kala sole,” kikolako.

⁹ Se peuru ma peuru kale ama aikovakova poso seke mati erekeni ko ruqe ama iruruputo koa peuru kale amu ta keka zialou koa matu peuru so keru se keta ka kelou keru koko kolu koko siqailou keru.

¹⁰ Seta ke lojolou vaṉa, ako seta keta ka ṉalou koko tola sole, ni eri kikevou, “Kei! Matu tapata! Matu olaquavo kota eva komia matuma ni piza kama matu peuru Babiloni! Kapi tiniavo ṉota ṉo qoa ko koqotato!” kikevou.

¹¹ Se peuru ma peuru kale ama tatabarao ko maba poso ta keka zialou ni keka buniubuniuovou koa matu peuru, ako puliala ta opa tama tatabaraekou seko lomaloma sole.

¹² Puliala ta opa tama tatabaraekou seko qolo ni siliva, ko kapikapitako lado poso ni bavi kile ko toruru poso. Ni puliala ta opa tama tatabaraekou seko tapo suma, ni soqu domu ama suma ni silika suma ni diri suma. Ni puliala ta opa tama tatabaraekou kiadavo ama papani poso, ko matu uria tui ama, ni azaazavo ama takula poso elopaniti ko taka kale ke erekako, ni matu tatabara kama papani, ni boronisi, ni aeani, ni mabolo.

¹³ Ni puliala ta opa tama tatabaraekou ko lumu uria tui ama, ni bube, ni moa, ni paraqinisenisi, vaini ko ju ni olive oela, ni palava ni vuiti. Ni puliala ta opa tama tatabaraekou ko bulumakau ni sipi, ni hose ni totiaqolo, ni mabaku poso.

¹⁴ Nio se tatabarao ko maba poso ta eri kikevou koa jou kama reko jari ama peuru kale amu kasi, “Kiadama uri ama quli ko me viluloqu meqai evema ta lula kota parakala, ni kiadama meko batiro ni meko ṉaṉaidara ta mata pui meba tova kelou!”

¹⁵ Se tatabarao ko maba poso, se batiro kekai eveni koa peuru kale amu ko tabariko seko zurana poso, ta ke lojolou vaṉa, ako seta keta ka ṉalou koa peuru kale amu ke toraekako tola sole. Ni seta ke zialou ni ke buniubuniuovou,

¹⁶ ni eri kikevou, “Kei! Matu tapata! Matu olaquavo keta eva koa matu peuru kale ama maba poso! Se kekai saboivani ko tapo suma, ni soqu domu ama suma ni diri suma, ni se kekai zaloniani ko qolo zaloni, ni ko mudamudatako lado poso, ni bavi kile ko toruru poso!

¹⁷ Melai matu puju ama taku kale inio kota kota ma paraka koa kiadama batiro!” kikevou. Kiadama vaka ko keapiteni madu ni sai ke zazuani maba poso, ni se vaka kale ke iruruputani maba madu ni sea kiadamu seke saevani ko ivere kale ama iruruputo kale, ta vaṉa ke lojolou,

¹⁸ ni keta zialou so keru ke kelou keru ko kolu koko siqailou keru, ni seta eri kikevou, “Puliama kama pado matu peuru ikio komia matu peuru jari ama!” kikevou.

¹⁹ Seta ke raibikou ko pari ni vuruvuru seko lezu poso topi seko upotuqu kale, ni seta ke zialou ni ke buniubuniuovou, ni eri kikevou, “Kei! Matu tapata! Matu olaquavo keta eva koa matu peuru kale ama maba poso! Se batiro ke imeni sea kiadamu vaka poso samu koko taliako kolo poso kale! Melai matu puju ama taku kale inio kota kota ma paraka kiadama quli seke teamukako!” kikevou.

²⁰ Mea kiada mela aukale me evani mela, meta ka zoleimo koa peuru ko biresuilo ni niumailo! Ni Baṉara ko maba poso mela, ni apositolo poso mela ni poropita poso mela, meta zoleimo! Ako vo Baṉara ta lula o titizima koa peuru kale amu ko quli seke melai erekema me kale avo sole!

²¹ Ni kala piza kala mateana ta o niaquekake kama pado lado, uruduputo ko matu lado tinia pado ama, ni o risaekake ivere kale, ni eri kiolake, “Eria pizaka ṉamuilo inio ko elo avo ko matu peuru Babiloni koko ruvuro kale, ni kota maba pui ko tova keazailou.

²² Mike ko kelato, ni kerao ko maba poso, ni se kevu ke kelaekani, ni kuvili ke kelaekani, ta maba pui mata tova viqo kepa elou se maba poso koa kelato poso sai! Puliala kala pado iruruputo ko maba ni kala tatabarao ko maba ta mata opa keazailou, ni puliama uruduputo ko lado ko kelato ta kopa elou koa matu peuru kale!

²³ Ni puliama kama pado taku kale inio kama pado juke ko zakaremu puto ta kopa keazailou kokale; puliama kora vo lasive ala ni reko ama vairua rorotoa nioqa ta kopa elou kokale. Koko tatabarao ko maba poso ta matu piza kamu peuru ma peuru kale, ni seko kakokakoto iruruputo kale inio koa peuru kale amu ta ko lipaeme kiadama peuru ma peuru kale ama qoqono poso,” kiolake vo piza kala mateana.

²⁴ Babiloni ta ko koe ko koqotato ako dara se poropita madu ni se Baṉara ko maba poso ko ta ko keazai koa matu peuru kale sole; tuvevo, koa dara ta sea kiadamu se miduku kale lula ke vouvaini ko ikio.