Jone 16 - BAṈARA KO VAIRU AMA LEVELEVEO

¹ “Kiadama soama quli ta lula a melai bazueka me tu meta pui me epezikou meko lai oqu aṉa.

² Ako seta ke butuemelou me seko ilusato ko pade poso kale azo, ni ko ikio koa taku so keru mata se maba poso ke vouvaemelou keru me, ni seko kerukeru ta seko vouvaemelo me kale inio seta keva nabuluputa vo Baṉara kikevou.

³ Se maba madu ta ke melai erekou ko quli ako seta pui kevai nianiiani aṉavo Mama ni aṉa sole.

⁴ Melai aṉata erisaṉa a melai bazueka me ko quli seke melai ereko ama quli, tu so keru ko ereilou keru soama quli, meta me qerukeruekou ko aṉata lula a bazuemele me kio,” kiolake vo Jisu. Nio Jisu ta obeta olake mati pesio voko disaipeli madu, ni eri mati kiolake, “Kuleto aṉata pui aba melai bazueke me ko quli poso, ako aṉata abeta eva me sase miduku kale sole.

Tabu ala Auvana ko iruruputo

⁵ Melai erisaṉa aṉata ada ziovou vo o soroeleni aṉa kasi, melai puliala me azo ta olai kuimaeka koa zae sai aṉa a zio ka kialakoi.

⁶ Ni so inio aṉako melai bazueko komi quli ta duki kota mela ika meko bulo poso.

⁷ Melai tuvevo avole aṉata a bazuemela me, kota matu qulepo ama quli meko, tu aṉata a ziovou, ako aṉata pui a vaemelou me ni pui a ziovou tea, voa Tauvezato, vo Tabu ala Auvana ta pui opa kilou mekasi. Melai aṉata a ziovou inio aṉata a joroevou vo mekasi.

⁸ Ni so keru vo o kilou keru inio vota kasa omai ikou se peuru ma peuru kale amu ta seta keta saruiva, seko kerukerueko kale ko seta puliama sarueko samu, ni seko kerukerueko kale ko seta Baṉara ko sidopu samu, ni seko kerukerueko kale ko seta pui kepa kovou ko titizato.

⁹ Seta ke saruiva kerukerueko ko seta puliama sarueko samu kio, ako seta pui kelai oqua aṉa sole.

¹⁰ Ni seta ke saruiva kerukerueko ko se inio vo Baṉara ko sidopu samu kio, ako aṉa inio a ziovoa lala a Mama kasi ni pui mata meba leloa lala sole.

¹¹ Ni seta ke saruiva kerukerueko ko seta pui kepa kovou ko titizato kio, ako komia ruqe ama peuru ma peuru kale amu vo lekasa, vo Setani, ta lula ota titizia sole.

¹² “Matu kubo quli ta ikoana tu aṉata a melai bazueko me, melai meta pui nio me rovea viqo ni ṉeamuko ko, ako kota matu tapata mekasi sole.

¹³ Melai so keru vo Tabu ala Auvana o kilou keru, vo kasa o ikani vo Baṉara ko tuveano, vota kasa o mela ikou me koa kiadama tuveano. Vota pui opa pesiovou o ṉaviko vatolo kale, melai vota okai pesiovou ko quli o viqako quli Baṉara kasi, ni vota o melai bazuekou me koko kilo ama quli.

¹⁴ Ni vota o ṉaṉaidara puelou aṉa, ako vota o borikou koa tuveano aṉa a qasekako, ni o kasekou ko mekasi.

¹⁵ Tuvevo avole, kiadama tuveano a Mama ko ta aṉako. Sokale avo inio aṉata so kiala ta koa tuveano aṉa a qaseko ama ikio vo Tabu ala Auvana ta o borikou ni o melai vakakukou me.”

Upotuqu ko tova ta mata zoleilo

¹⁶ Ni Jisu ta mata eri kiolake sekasi, “Puliako tu keu meta pui meba lelou aṉa ni mata puliako tu keu meta mata me lelou aṉa,” kiolake.

¹⁷ Nio kake voko disaipeli madu ta keta kuimaekiniake ke ṉavio kude ni eri kikelake, “Loma ikio koa pesio ko kio ni kalo? Ko vo o kasekako anime kasi ko puliako tu keu animeta pui meba velou vo, ni mata puliako tu keu animeta mata me velou vo kio, ni vota mata o kaseka ko, ‘Aṉata ada ziovou a Mama kasi,’ kiola.

¹⁸ Loma ikio koa ‘puliako tu keu’ ko kio ni kalo? Animeta pui me vakakuka ko vo o kasekako quli,” kikelake.

¹⁹ Ni Jisu ta omai nianiiake ta seta keka zariake kuimaevo vo, so sole vota eri ma kiolake se, “Lula aṉata so kialala, ‘Puliako tu keu meta pui meba lelou aṉa, ni puliako tu keu meta mata me lelou aṉa.’ Ko ikio ko me me ṉavio kude meqai kuimaekiniake, kio?

²⁰ Tuvevo avole aṉata a bazuemela me, puliako tu keu meta me zialou ni kumasa me elou, melai komia ruqe ama peuru ma peuru kale ama maba poso ta pui kepa zialou, seta keta zoleilou. Zio, meta upotuqu me elou, melai tova ta meko upotuqu ta zoleilo ko besiekou.

²¹ Ako so keru kama pado reko ko vijara keru ta kota upotuqu kota eva, ako koko tola sama taku ta kota baroa sole, melai salua ko alilo ko tova inio kota ukaka ko ika koa tola, ako kota kokai zoleiva salua ko alilo sole.

²² So jari inio ko me, meta mainio upotuqu meda elou, melai aṉata tova a qilou ni aba mela lelou mata, ni meko bulo poso ta kokai sukatou ko zoleilo, koa zoleilo puliala opa tamela kovo ama me.

²³ Ni koa ṉaniu ko barolou keru inio meta pui meba lai kuimaekou aṉa kama quli ako meta zakaremua paqumato me elou sole. “Tuvevo avole aṉata a bazuemela me, aṉavo Mama ta o katimelou me kiadama quli meme baseko ama vokasi aṉako ṉikale.

²⁴ Kobeta baroa erisaṉa ta meta pui nio mevai paseka aṉavo Mama kama quli aṉako ṉikale. Meta pasekomo inio meta me qovou ni meko zoleilo ta ko melai avoziovou,” ma kiolake vo Jisu.

Jisu ko koqo iko komia ruqe ama peuru ma peuru ko pizato

²⁵ Nio Jisu ta obeta olake mati pesio voko disaipeli poso, ni eri kiolake, “Aṉata a besia podepodeti pesio kale tu a melai bazueko me komi quli poso. Melai ko taku ta kota kilou so keru aṉa pui aba pesiovou keru podepodeti pesio poso kale melai tutumazi avole aṉata a melai bazuevou aṉavo Mama.

²⁶ Koa taku kale inio meta mevai pasetou aṉavo Mama aṉako ṉikale. Aṉata pui eri kiala aṉata a melati pasetou vokasi kio,

²⁷ melai o ṉavi a Mama ta o roquemela me, ako meta me roquela sole aṉa ni meta me duvevo pueka sole ko tuvevo ikio aṉata a quevini lala vo Baṉara kasi azo kio.

²⁸ Aṉata a quevi aṉavo Mama kasi azo, ni a quevi koi komia peuru ma peuru kale, nio erisaṉa ta sipole inio a vaekou ko peuru ma peuru ni ada vaitou a Mama kasi,” kiolake.

²⁹ Nio voko disaipeli poso ta eri kikelake vokasi, “Keatini, erisaṉa ṉota ṉo besia tutumazi avole, ni ṉota pui ṉo besia podepodeti pesio kale.

³⁰ Erisaṉa eṉeta ṉe baqumuka ta ṉota ṉoqai nianiia kiadama quli, ṉota lula ṉoqai nianiia maba poso ke kerukeruekako kuimanao poso puliako se ṉai kuimaeko kama quli sole. Kokale eṉeta ṉe duvevo pueka ta ṉota ṉo quevini ṉa vo Baṉara kasi azo kio,” kikelake.

³¹ Ni Jisu ta o mati tiorikake se, ni eri kiolake, “Koe, erisaṉa meta me duvevo pueka kio?

³² Melai a bazuemela me ko eri: taku ta kobeta kueva, ni kota matu sipole erisaṉa, so keru mea kiada mela aza birebire me elou keru ni me joqoilou keru me ṉaviṉavi ko peuru kale, ni aṉata ojolou ada elou a qiada pado. Melai pui maba ojolou aba elou, ako a Mama ta o eva aṉa sase sole.

³³ Aṉata so kiala mekasi tu meta me qovou ko bule meko saevo omadeu kati elo kale aṉako saevo. Komia ruqe ama peuru ma peuru kale ama maba poso ta ke katimelou me ko duki ni riṉoteṉote. Melai meta parani putomo! Ako aṉata lula koqo a ika komia ruqe ama peuru ma peuru ko pizato sole!” ma kiolake vo Jisu.