Jemisi 5 - BAṈARA KO VAIRU AMA LEVELEVEO

Balauvato batiro ama lotu maba poso kasi

¹ Erisaṉa meta viqomo, me batiro ama maba poso mela, ni didielomo aṉa! Meta zialomo ni ziaroreputomo ako ko tapata ta ko kilou mekasi sole!

² Meko batiro poso ta kota niumailou, ni meko suma poso ta kota moatakou.

³ Meko qolo ni siliva ta kota kazuatou, ni koa kazukazuati ikio kuiripato saṉa ko imelo ama me, ni ko siqaeko ama meko tupu poso uza jari, ako meta me badoeka kubo batiro komia tovatovama taku kale sole.

⁴ Meta pui me dabarima seke iruruputani maba poso meko kiaro kale. Viqomo seko ṉuruṉuruo! Seke padoekani ko epa poso meko kiaro kale ko zialo ta lula o viqa vo Piza kala Baṉara.

⁵ Meko saevo kale komia miduku kale ama ta uri ama elo ni kubo utube zoleilo. Meta omadeuvo sipi jari lula meda posuposu-kaita meko vouvailo ko ṉaniu kaqe.

⁶ Meta lula kuiripato saṉa me ima ni me vouvaema se sidopu ama maba poso, se pui ke besitani.

Inobe ni vararaito ko kalo

⁷ A lolo poso mela, meta inobea taruano emo, ti kobeta barolou vo Lekasa Jisu ko vaito ko taku keru. Keatini, vo papato ko maba ta o uria tareka ko uri ama epa miduku ko, ni vota o uria tareka ko nioro ni ṉaniu tu ko muqariko ko sailao.

⁸ Meta omadeuvo soa inobea taruano emo. Meta pizatikomo meko bulo kale ama keru, ako vo Lekasa Jisu ko kilo ko ṉaniu ta sipole sole.

⁹ A lolo poso mela, meta pui ṉuruṉuruekinio me ṉavio kude, so inio vo Baṉara ta pui o titizimelou me. Vo Titizato ko Maba ta sipole, vota obeta inainaova tu kasa o elo.

¹⁰ A lolo poso mela, meta kerukeruemomo se poropita madu seke pesiovini Baṉara ko ṉikale, ni luluekomo seko inobea taruano seko tapata taku keru.

¹¹ Animeta memai nokaekou zolezole amu sea maba poso ako seta pizaka lojo ke eveni sole. Meta lula me viqe vo Jobi ko inobea taruano ni meta meqai nianiia vo Baṉara o puarikema quli vokasi kiadama tapata poso ko tova, voko pizaka lojo elo kale. Ako vo Baṉara ta kovai sukatani ko baiseo ni tauvezato sama roquano sole.

¹² Matuma quli a melai bazuekou ta komi kio, a lolo poso mela, meta pui me erekou ko kejo so keru meme qasekou keru meko tuveano. Pui kejo kai ereko ko au ni miduku ni mata kama lomaloma. Melai meta “Zio” pala kiomo ni “Pui” pala kiomo meko tuveano kaseko kale, ako meta tuveano ko maba poso mela sole. So inio meta pui me qovou vo Baṉara ko titizato.

¹³ Esa kala me azo ta obeta eva tapata kale, vota o vararaitou. Esa kala ta zolezole ala, vota okai keraovou ko ilusato ko kera poso.

¹⁴ Esa kala ta vere ala me azo, vota o nokaemou se lotu tanamu, tu ke zio tu ke vati vararaito vo ni kevai loqaeko ko oela meresini vo Lekasa Jisu ko ṉikale.

¹⁵ Koa vararaito, ko ereivako oqu sase, ta ko urikivou vo vere ala maba; vo Lekasa Jisu ta o pakievou ni o urikivou vo, ni ota va akoekou koa sarueko poso vo lula o erekako.

¹⁶ So sole meta kai eraeraekiniomo meko sarueko poso me ṉavio kude, ni tauvekiniomo vararaito kale me ṉavio kude, so inio me urikou. Ako vo sidopu ala maba ko vararaito ta ko ereka piza kama quli sole.

¹⁷ Ilaija ta kala pado maba lulali ala anime erisaṉa mu mela jari ala. Vota o matu vararaitake tu nioro ta pui ko elo sai, nio nioro ta pui ko piake zouke sabere ka kobu Izireli amu ko kena miduku topi.

¹⁸ Ni vota mata o vararaitake, ni oka vararaitake ko nioro, nio ko nioro ta ko piake aukale azo, ni papapapa poso ta mata ko qotupake miduku topi.

¹⁹ A lolo poso mela, meta kerukeruekomo ko komi. Kala me azo ta o vaekou ko tuveano, ti kala edolola ta mata o vaitoevou vo sidopu kale,

²⁰ voa maba vo o lilivani kala maba voko sarueko kale azo, vota o pakieva voa sarueko sala maba heli kale azo, ni kubo sarueko poso ta ko akoilou.