Jemisi 4 - BAṈARA KO VAIRU AMA LEVELEVEO

Peuru ma peuru ko kalo lulueko

¹ Loma ikio koko raki koa kiadama pazokinio ni aivekinio meme erekako me ṉavio kude? Kota meko bulo kale ama ruqe ama zario kale azo ko kuevako.

² Meta meqa zaria kama lomaloma, melai meta pui me rovea ṉeamuko, so sole meta meqa zaria vouvato; meta matu viluloqu meqai eva kama lomaloma, melai meta pui me rovea kovo, Sokale meta meda pazokinia ni meda aivekinia. Meta pui me qoa ko me meqa zariako quli ako meta pui me baseka ko vo Baṉara kasi azo sole.

³ So keru meme baseka keru, meta pui me qoa ko quli meme basekako quli, ako meko zio ta edolovo sole, ako meta me baseka ko quli me ṉaviko zario ko quli pala sole.

⁴ Meta pui kerula kama maba poso mela! Meta pui me baqumuka ta komia peuru ma peuru ko kalo lulueko ta Baṉara ko kana elo ikio, kio? Ako vo oka zariani peuru ma peuru ko kalo lulueko ta Baṉara vo kana ota eva.

⁵ Pui lipato iko ko tuveano Tabu ama Riki topi ama ko so kikolako, “Vo maba ko auvana vo Baṉara lula o vaekema anime tona ta kokai sukata ko ṉaloṉalo ama vatolo.”

⁶ Melai ko tauvezato sama roquano vo Baṉara o puarikako ta kobe kai paloasa koa ṉaloṉalo ama vatolo, Tabu ama Riki kikolani jari, “Baṉara ta seke aikaivani vo kana, melai seke zarazaraivani ta o katima ko tauvezato sama roquano.”

⁷ So sole meta katiziomo vo Baṉara kasi. Ni meta vati kanaekiniomo vo Setani, nio vota o soqoilou mekasi azo.

⁸ Kuemo Baṉara ko sipole, ni vota o kilou meko sipole. Meta liliziomo meko sarueko poso kale azo, me sarueko poso samela! Rurubiatana ikomo meko bulo poso, mea maba poso mela me meqai lipalipaitani mela ko sidopu!

⁹ Duki emo, ni ziaroreputomo, ni zialomo. Besiekomo meko niureo zialo kale, ni meko zoleilo ta upotuqu ko elo.

¹⁰ Meta zarazaraimo me ṉavi vo Baṉara ko tanama kale, nio vota o rauraemelou me.

Edolola maba pui titizivo ko balauvato

¹¹ Meta pui kuirikinio me ṉavio kude, me aṉako tamania kalea mela. Ako vo kuiripato saṉa o ivani kala lotu maba ma o titizivani, vota kuiripato saṉa o ika ko Tabu ama Bazu ni vota o titizika. Ni meta me ditizikou ko Tabu ama Bazu, ta me inio ko me pui me zorikani mela ko Bazu, ni me inio me ditizikani mela ko.

¹² Omadeu pado Baṉara o kiada inio Bazu o katizatani ni o titizikani ko maba. Vo o kiada inio o pakiemani se maba poso ma o niumaemani se. Nonia kerukeruilo inio me eva me, nio meta me ditiziva edolola maba?

Balauvato rauraraurailo ko maba poso kasi ama

¹³ Erisaṉa meta didielomo aṉa me eri kimelani mela, “Vairutu ma lea eṉeta ṉeda ziovou vaṉama matu peuru kale ni eṉeta ṉe elou sai omadeu sabere tu tatabarao ko maba ṉe elou ni batiro ṉe elou.”

¹⁴ Meta pui me baqumuka koko ereilo ama quli lea meko saevo kale! Meko saevo ta omadeuvo ko rovuzu jari, koko puratako puju ama taku kale ni kota mata kota paraka.

¹⁵ Melai ko me kimevo avo ta eri, “Vo Baṉara o zarieṉelou, ta eṉeta ṉe jaevou ni ṉe erekou eṉeko zario.”

¹⁶ Melai erisaṉa meta meqai zoleiva meko nakanakati kai rauraraurailo ni aikailo. Koa rauraraurailo poso ta ruqe ama.

¹⁷ So sole kala maba, vo obe kai nianiiani ereko ko sidopu, melai vo pui o erekani ko, voa maba ta o sarueka.