Jemisi 3 - BAṈARA KO VAIRU AMA LEVELEVEO

Lenio ko kalo

¹ A lolo poso mela, pui uri tu kubo mela ta lotu kale ama nianiiekato ko maba poso elo. Ako meta meqai nianiia ta eṉe lotu kale ama nianiiekato ko maba poso ṉela ta ṉe qovou ko Baṉara ko matuma kuiripato kokai paloasako se pui nianiiekato ko maba poso ke kovo ama, ruqe ṉe erekou ta.

² Ako animea kiada mela ta me erekani mela ko sarueko poso sole. Melai voa maba vo pui o saruekani voko pesio kale, vo inio vo sidopu ala ni o roveani kati vailo voko pado ama saevo.

³ Animeta me nasoeka kama pado qusini ṉomaṉoma kaqe hose ko suto kale ni me rovea kati zio sai anime meqa zariakoi zio.

⁴ Ma meta kerukeruevomo kala vaka: vota matula, ni ko matuma ururu ta ko soleva, melai omadeu silo ama ṉomanoma ikio ko sidopua ṉomanomaeva, ti vota o rovea zio sai vo rairirairi o kamakani oka zariakoi zio.

⁵ Omadeuvo so jari nio ko lenio, kota matu silo ama, melai kokale inio vo maba ta o rovea matu raurailo. Kerukeruekomo, ko matu silo ama urusana ta ko bainaeka ko matuma uza ko tabatabari ama siqo kale.

⁶ Lenio ta omadeuvo kama pado uza jari. Kota kama pado quli kubo quli ko saruekako, kota ko ereka ko ruqe animeko tupu poso kale ni ko zaroeka ko ruqe animeko pado ama saevo kale. Omadeuvo ko uza ta ko bainaeka mata kama pado uza, so jari nio vo Setani, heli ko lekasa, ko iruruputo kale inio vo maba ta o kaseka ko ruqe voko lenio kale.

⁷ Maba madu ta ke rovea mabaeko kiadama biana poso, ko piru ama ariku kiti ama biana poso, ni koko akazako bianabiana, ni koko vaerako quli, ni ko niuniu poso,

⁸ melai puliala ta o rovea uria kati vailo ko lenio, tu uri ko kiada ko rukuilo. Kota ruqe ama ni pui ko roveako nomanomailo, ni kota ko vouvatako dole jari.

⁹ Lenio kale inio animeta me ilusiva vo animevo Lekasa Mama ni lenio kale inio me ruqe kaseva vo maba, vo Baṉara o ereveni o ṉaviko ereere kale.

¹⁰ Ilusato ni ruqe pesio ta ko saqora omadeuma suto kale. A visi poso mela, ko quli ta pui ko male tu ko ereilo.

¹¹ Ko saroro ju ni ivere ta pui ko rovea purato omadeuma vuolovuolo kale kude.

¹² A lolo poso mela, ko ivere ta pui ko puarika ko saroro ju. Ko piqi ore ta pui ko epamuka ko Olive ore ko epa ni vaini ko siakona ta pui ko epamuka ko piqi ore ko epa, ni so jari nio anime me rukuekako quli lenio kale.

Baṉara kasi azo ama raura kama nianiio

¹³ Kala me azo ta nianiiola ni paqumato sala, kiovo ala, vota kasa o ikou voko uri ama saevo kale. Vota kasa o ikou koa uri ama kalo, zarazarailo ni raura kama nianiio ko puratikako.

¹⁴ Melai meta me dukiekou bulo kale ko konoilo ni muino, ta meta pui aikailo sidopu kai lipalipaito kale.

¹⁵ Soama kalo ta pui ko kuevako vo aukale ala Baṉara kasi azo. Kota se komia peuru ma peuru kale amu vo Baṉara ke vaevani maba poso ko, kota ziolo poso kasi azo ko kuevako.

¹⁶ Sai konoilo ni kiadailo ko evakoi, sai nio ko evakoi ko aivekinio ni kiadama ruqe poso.

¹⁷ Melai vo aukale ala Baṉara kasi azo ko kuevako raura kama nianiio ko qulepo ama ta kota remedemede pide ama ni kota bule ama, ni baise ama, ni lolopareo sama. Kota matuma roquano sama ni kota ko puratika ko uri ama kalo poso; ni kota pui ko pitopitotako ni pui ko lipalipatako.

¹⁸ Ni seke mati bulekikiniani edolomu ta ke tauvema se tu sidopu ke elo. Kota omadeuvo kala maba jari vo o papakani ko uri ama rui ni ota ka kajorikani koko uri ama epa.