Jemisi 1 - BAṈARA KO VAIRU AMA LEVELEVEO

¹ Aṉa Jemisi lala, vo Baṉara ni Lekasa Jisu Karisito vo nabulu lala, ta a rikieka komia roquano sama leta kiadama vo Baṉara ko maba poso mela me lula birebirea elo me evani mela kasi kiadama peuru ma peuru kale.

Raura kama nianiio ta ko kueva Baṉara kasi azo

² A lolo poso mela, meta zoleimo so keru kiadama tapata poso ko barou keru mekasi,

³ ako meta meqai nianiia ta soama tapata poso me doraekou keru, melai meko oqu ta pui lekuleku ko elou, nio kota kasa ko eva ta kota piza kama ni noqola kama ikio.

⁴ Meta pizaka lojo emo kiadama taku keru, tu meta sidopu ni muqaro me elou, ni pulia quli ta meba ka lilililitou.

⁵ Melai kala me azo ta Baṉara ko raura kama nianiio pide o elou ta, vota o vararaitou Baṉara kasi, nio vota o kativou ko, ako Baṉara ta o puarika ko voko puaropuaro ama iruruputo ni zoleilo kale kiadamu kasi.

⁶ Melai so keru meme vararaitou keru, meta tuvevo putomo ni pui niuniala elo. Vo niuniala o evani maba ta omadeuvo ko ivere kale ama vate ko qiloqiloeka ni ko alazikako ko ururu jari.

^7-8 Soala maba ta pui omadeu o ikani voko kerukeru ni pui o pitoeka vo o ereko ama quli. Vota pui o kerukerutou vota o kovou kama quli vo Baṉara kasi azo.

Ozaoza ni batiro ama lotu maba poso

⁹ Vo ozaoza kala lotu maba ta o zoleilou, ako Baṉara ta o rauraeva vo sole,

¹⁰ ni vo batiro ala lotu maba ta o zoleilou, ako Baṉara ta zara o iva vo sole. Ako vo batiro ala ta o paloasou omadeuvo ko siqo kale ama papapapa ko sisusisu jari.

¹¹ Vo ṉaniu ta o purata voko vualavuala kama urusana sase ni ko zulueka ko papapapa; koko sisusisu ta kota ka vuzara, ni koko olaupo ta lula kota ka niumaiva. Omadeuvo so jari nio vo batiro ala maba ta o niumailou voko batiro elo kale, ni riteraite kai elo kale voko iruruputo.

Zolizolito, ko kuevakoi kazo

¹² O zoleiva tisoiko voa maba vo o pataitani voko oqu kale tapata ko taku keru, ako voko pataito kale soama tapata keru, vota o kovou ko saevo, koa reketekete vo Baṉara lula oma inainaekako seke roquevani vo.

¹³ Ni kala maba ta o toraekou ko zolizolito soama tapata poso kale, ta vota pui eri kiovou, “Komia zolizolito ta Baṉara kasi azo ko kuevako ikio.” Ako ko ruqe ta pui ko rovea zolizolievo vo Baṉara, ni vo Baṉara ta pui o zolizoliema se maba madu tu ke ereko ko ruqe.

¹⁴ Melai voa maba ta voko zario kale inio o koani ko zolizolito ni ko tataeva vo ni ko jouraeva o ṉaviko ruqe ama kerukeru roa kale jari.

¹⁵ Nio voko ruqe ama zario ko sukata keru, saruilo ta ko purata, ni voko sarueko poso, so keru koko rapuka keru, ta ko vouvaevou vo, auvana ni tupu kale.

¹⁶ Me a lolo poso a roquemelani mela, meta pui zariemo kake tu seta ke saruemelo me!

¹⁷ Kiadama uri ama ni kiadama sidopu ama katizato ta ko kuevako aukale azo; kota ko saqora Baṉara kasi azo, vo o erekeni aukale ama zakaremu poso, ṉaniu ni kaboso ni Suti poso, ni voko zakaremu ta pui ko besizia omadeuvo kaboso ko zakaremu ko besizia jari.

¹⁸ O ṉaviko vatolo kale vota o saevimela anime tuvevo ama bazu kale, tu animeta me qovou ko raura kama zae kiadama quli vo o erekema kasi azo.

Viqo ni ereko

¹⁹ Lolo poso, me a roquemelani mela, meta kerukeruekomo komi quli! Kiada mela meta dikidauputole viqomo, melai pui jijiro pesio elo ni pui kapi avole korakorailo.

²⁰ Maba ko korakorailo ta pui ko kati korotikinia vo Baṉara ko sidopu ama nakanakati.

²¹ So sole meta vaekomo kiadama kuna kama kalo ni kiadama ruqe ama iruruputo. Katiziomo Baṉara kasi ni ṉeamukomo ko bazu vo o papakako meko bulo kale, koko roveako pakiemelo me.

²² Meta pui me jaruilou voko bazu ko viqo pala kale, pui kai uria iruruputo kale.

²³ Vo o viqani ko bazu melai pui ota ka erekani koko iruruputo ta omadeuvo kala maba jari, vo o keani voko mudalidali mudamuda kale.

²⁴ Vota o uria keazaiva, melai vo o vaeka keru koa mudamuda vota ukaka o ika o ṉaviko loilo.

²⁵ Melai vo o vinaivani sidopu ama bazu kale, maba poso ko rupasimako, ni vo pui o lalamatani ereko ko, ni pui o utu viqani ni o ukaka puekani, ni vo okai iruruputani, vo inio voa maba vo Baṉara mauru o ivo ala vo o erekako quli kale.

²⁶ Esa kala ta o kerukeruta ta vota lotu maba inio, melai pui o kati vailou voko lenio, ta voko lotu saevo ta pui ko malezia ni vota ota saruiva.

²⁷ Ko animevo Mama Baṉara o kerukeruekako ta vo lotu maba ko bulebule ni rurubiatana elo ta eri: mati vailo se esapa kamu ni naboko poso seko tapata kale, ni ota ka balauvo peuru ma peuru kale ama maba poso ke erekako sarueko poso kale azo.