Iruruputo 7 - BAṈARA KO VAIRU AMA LEVELEVEO

Sitiveni ko pesio Voko kuleto vai bazubazuto vo Ebarahami

¹ Nio vo Ṉisa Siama ta o kuimaevake vo Sitiveni ni eri kiolake, “Komi ta tuvevo ama quli kio, kio?” kiolake.

² Nio Sitiveni ta o opatake, ni eri kiolake, “Kaka ni visi poso mela ni mama poso mela meta didielomo aṉa! Lulavo inio vo ṉaṉaidara kala Baṉara ta ovai puratake vo animevo taite Ebarahami sai Mesopotemia rana Kolodia o ṉisa peuru kale, puliako vo zio Harani elole,

³ ni vota eri kiolake vokasi, ‘Vaema ṉoko mabamu ni komia peuru tu ṉota ola koa peuru kale aṉa aṉa kaseko ama ṉo,’ kiolake.

⁴ So sole vota o vaekake voko peuru ni ota olake Harani peuru kale elole sai. Nio Ebarahami vo mama ko vou ko tova inio vo Baṉara ta o vatutivake vo nio o evake komia zaekale sai meme evakoi erisaṉa.

⁵ Ni vo Baṉara ta pui opa kative vo kama kena miduku koi tu o ṉavi kaqe, puliama kama supi opa kative vo, melai vota leveleveo o vaeke tu komia miduku ta vo ni voko vikuvikula kaqe kiove. Ni mata kama pado quli ta so keru vo Baṉara o ereke keru koa leveleveo ta Ebarahami ta puliama meqora sala.

⁶ Eri nio vo Baṉara kiovevo vokasi, ‘Noko vikuvikula kale amu ta ke elou edoloma qoqono ko peuru kale vaṉa, sai se mabaku ke eloa koi ni sai ke niumaemoa koi ariku paizana sabere.

⁷ Melai aṉata a qoqotaekou koa qoqono koko mabaku puemo amu se, ni koko tova seta ke saqorou koa qoqono ko peuru kale azo ni seta ke ilusilou aṉa koi komia zaekale,’ kiolake.

⁸ Ni vo Baṉara ta o kativake vo Ebarahami movezato ko iruruputo tu leveleveo ko mamola ko elo kiolake sole. Nio Ebarahami ta o movevake vo Aisake vovo meqora siotolu ama ṉaniu kale o alilake saita, ni Aisake melai o movevake vo Jekopi vovo meqora, ni Jekopi melai o movemake voko toni omuqa lasive meqora poso, se animeko toni omuqa susu ko raki madu.

Sitiveni ko mai bazubazuto sea toni omuqa susu ko raki madu

⁹ “Ni Jekopi ko meqora poso ta kevai konoivake sevo visi Josepa ni kevai tatabaraovake kake kasi seke vati keveni Ijipi tu vota mabaku o elo sai kikelake. Melai Baṉara ta o evake vo sase,

¹⁰ ni vota o patoevake vo kiadama voko tapata poso kale azo. So keru vo Josepa o loje keru Ijipi ala aikovakova ko tanama kale, Baṉara ta o kativake zoleilo sama kalo ni nianiio vo Josepa ni vota o zolevake vo aikovakova. So sole vo aikovakova ta qavuna o ivake vo koa pado ama Ijipi kale tu o kati vailo kiadama saizama peuru poso, ni mata kiadama iruruputo o ṉavi aikovakova ko pade kale ama melai vo Josepa inio o kati vailake.

¹¹ Nio matuma nioṉe ta kota evake koa pado ama Ijipi ni Kenani ko peuru poso kale, kubo tapata ko erekema. Nio animeko taite poso ta puliakoi ke keake ko sailao,

¹² melai Jekopi ta o viqa ko Ijipi ta ikoana kama vuiti kio sama bazu, so sole vota o soroemake voko meqora poso, se animeko taite poso, seko kuleto ama soipo kale sai.

¹³ Ni seko omuqama soipo kale sai Josepa kasi, vota kasa omai evake o ṉavi o kaka poso, nio vo Ijipi ala aikovakova ta o toraemake Josepa ko mabamu koa taku kale.

¹⁴ So inio Josepa ta o soroekake ko bazu vovo mama kasi, ni sea kiadamu voko mabamu sikeura toni sike maba madu tu ke kilo Ijipi kiolake.

¹⁵ So sole Jekopi ta o olake Ijipi, sai vo ni o meqora poso ke evekoi ni ke vovikoi.

¹⁶ Ni ke tupu ta keta mati keve Sekemi ni ke mutame sai niami keaka kale Ebarahami seleni kale sai o tatabaraekema vo Hemo ko toutou kasi azo.

Sitiveni ko vai bazubazuto vo Mosese

¹⁷ “Nio koa ariku paizana sabere ko taku vo Baṉara ko leveleveo kale lula o kasekema Ebarahami kasi ta sipole kota okotake, ni matu ti matu vario keta evake animeko taite poso sai Ijipi.

¹⁸ Sai nio vo Josepa pui opa vai nianiiovini aikovakova ni pui o kerukeruekani voko uri ama iruruputo ta o lekasa puake Ijipi.

¹⁹ Ni vota o ubeubemake animeko taite poso ni vota o niumaniumaemake se, vota o zuruzuruemake se tu seta ke kupemo seko salua poso seko pade kale azo, tu ke vouvou sai kiolake.

²⁰ Ni koa taku kale inio Mosese ta o alilake, kala matu ileile ala salua. Vota ke vati vailake ke ṉaviko pade kale zouke kaboso,

²¹ ni so keru vo ke saqorive keru pade kale azo, voa aikovakova ko meqora ta ko voake ni ko pauzuvake vo ni ko ṉavivo maba meqora jari ko ivake.

²² Nio vota ke nianiiekivake kiadama se Ijipi amu ko nianiiekato kale ni vota matula maba o evake pesio kale ni iruruputo kale.

Mosese ko madolo tu o pakiemo se Izireli mu

²³ “Ni so keru Mosese ariku toni sabere ala keru inio vota oma zariake soipimo voko mabamu Izireli amu tu o kelo seko mati vailo ko kavani.

²⁴ Ni vota o veake kala pado sekale ala vo Ijipi ala o pazovani, so sole vota o tauvevake vo ni o vouvaevake vo Ijipi ala maba.

²⁵ Voko kerukeru kale ta voko mabamu ta kekai nianiiovou ta vo Baṉara ta o tauvemou vokale kude tu o rupasimo se kiolake, melai seta pui ke paqumukake.

²⁶ Ni koko raneo kale inio omuqa maba Izirelia nioqa ta qopeta pazokiniako ni vota o madoekake bule ereko nioqa kasi sole eri kiolake, ‘Qeva, tala viqoko aṉa, qeta omadeu Izirelia qela inio melai qeta eri ama pazokinio qe ereka?’ kiolake.

²⁷ Melai kala pado nioqʼazo vo olaquavo o ivani kala pado, ta o ibaevake vo Mosese ni eri kiolake, ‘Lala inio lekasa o iṉa ni titizato ko maba o iṉa eṉe kasi?

²⁸ Ṉota ṉoqa zaria tu vouvaelo aṉa omadeuvo vo Ijipi ala ṉo ivalavo vouvaevo ravi jari kio?’ kiolake.

²⁹ Nio so keru Mosese o viqa keru koa pesio, vota ota soqoike ni ota olake Midiani peuru kale elole. Sai nio omuqa meqora saṉa ota evake.

Vo Mosese ko tava viqo vo Baṉara ko pesio

³⁰ “Ni ariku toni sabere lula kota paloasake saita, nio kala mateana ta o puratake Mosese kasi urusana sala sasa ore topi lealea kama zaekale Sainai sopu ko sipole.

³¹ Ni Mosese ta okai vuzeike vo o kevema quli, sole vota o olake voa sasa ore ko sipole tu o uria velo kiolake. Melai vota o viqake vo Baṉara ko kora eri kikovema,

³² ‘Aṉata ṉoko taite poso vo Baṉara lala, vo Ebarahami, ni Aisake, ni Jekopi vo Baṉara lala,’ kikovema. Nio vo Mosese ta ota dederake, ni ota ṉake tu o toiritoirivo voa sasa ore topi.

³³ Ni vo Baṉara ta eri kiolake, ‘Ivika ṉoko sadolo, ako koa zae sai ṉo ṉoqai lojoako ta tabu ama zae sole.

³⁴ Aṉata ada ma kea aṉako maba madu ko olaquavo elo Ijipi. Aṉata ada ma viqa seko akeakeoto, nio aṉata a jaqora tu a rupasimo se. Kua erisaṉa, aṉata a joroeṉa ṉo Ijipi,’ kiolake.

Se Izireli mu ko vai kaikuapo vo Mosese

³⁵ “Mosese ta kala pado maba vo keta va lupaovini se Izireli amu. ‘Lala inio lekasa ni titizato ko maba ṉa o iṉeni eṉe kasi?’ va kikeveni nio vo. Melai vo inio vo vo Baṉara o soroeveni tu se maba poso vo lekasa o elou tu o rupasimou se vo mateana o purateni vokasi urusana sama sasa ore ko tiania ko tauvezato kale.

³⁶ Ni vota o odiemake se ni o saqorimake Ijipi azo, voko ereko kale aqasiele ama iruruputo Ijipi ni Diri ama Ivere kasi ni ariku toni sabere ko poro kale lealea kama zaekale.

³⁷ Ni Mosese inio vo eri kioveni sea Izireli ama maba poso kasi, ‘Baṉara ta o melai soroevou me kala pado Poropita, omadeuvo vota o soroela aṉa jari, ni vota kala pado me ṉaviko qoqono kale ala,’ kioveni.

³⁸ Vo inio vo vo o eveni Izireli ama qoqono sase seko padoilo kale lealea kama zaekale, vo inio sai o eveni animeko taite poso sase ni voa mateana sase vo o pesiovini Sainai sopu kale, ni vo inio o koeni vo Baṉara ko saevoma bazu ni vo o melai vikuekeni anime.

³⁹ “Melai animeko taite poso ta keta lupaoke zorivo vo! Ni seta kevai kedui ni seta keka zariake vaito Ijipi.

⁴⁰ So sole seta eri kikelake Eroni kasi, ‘Ṉela ereka kama baṉara poso tu ke ṉelati talio ni ke odieṉelo. Eṉeta pui ṉeqai nianiia ko lula ko ereivako quli voa maba Mosese kasi, vo o saqorineleni eṉe Ijipi azo,’ kikelake.

⁴¹ Ni seta ke erevake kala pado bulumakau meqora beku, ni keva siqatake, ni ṉojola ke erekake ni ke rauraekake ke ṉavi ke erekema quli.

⁴² So sole vo Baṉara ta o vaemake se ni vota o zariemake tu seta ke ilusiko ko aukale ama Suti poso, omadeuvo se poropita madu ko riki topi ko rikiziovima jari, ko eri kikovema, ‘Me Izireli amu mela! Pui aṉa inio meta meba la vouvaeke ko biaṉa poso ni meba la siqate ariku toni sabere lealea kama zaekale.

⁴³ Koa tepe pade meme borikema ta Meleki baṉara ko ikio, ni Repani ko piqepiqemu ikio meko suti baṉara, me ṉavi meme erekema beku ikio meta me ilusikake. Sole aṉata a joroemelou me mabaku saevo elole Babiloni koa rana vasi,’ kikovema.

Vo Baṉara ko tauvemo se Izireli amu rosi ama taku kale

⁴⁴ “Animeko taite poso ta Baṉara ko tepe pade samu lealea kama zaekale ko kasa ko ikema ko vo Baṉara ta se sase inio kio. Baṉara ta o bazuevake vo Mosese tu o ereko koa tepe pade, koa ereere Baṉara kasa ova ikema kale.

⁴⁵ Ni koko tova inio animeko taite poso ta ke koe koa tepe pade seko mama poso kasi azo ni ke borike ko Josua sate ke keve keru ni keta ma koe keru ko zae azaazama toutou poso vo Baṉara o butuemeni ti seta keta soqoi animeko taite poso kasi azo. Ni sai nio ikoana kobeta evake koa tepe pade ti kota kobeta baroi Devita ko taku keru.

⁴⁶ Ni Baṉara ta ova zoleivake vo Devita ni vo inio o paseveni vo Baṉara tu ova ereko vo Jekopi vo Baṉara ko tabu pade tu okai elo.

⁴⁷ Melai kota Solomone inio o erekeni koa pade.

⁴⁸ Melai vo matu Raura kala Baṉara ta pui se maba madu ke erekema pade poso kale inio o evani. Vo poropita Aisea kiovevo jari,

⁴⁹ ‘Au ta aṉako lekasa puo ko papupapu ni miduku ta aṉako kiti iviivi, kiola vo Baṉara. Nio noni ama pade ikio meta mela erekou aṉa, kimela? Lai nio koa zae sai aṉa a eloa koi?

⁵⁰ Aṉa a ṉavi nio a erekani lala kiadama soama quli.’ ”

Se Izireli mu ko bikoiriko vo Baṉara ko bazu

⁵¹ Ni Sitiveni ta obeta olake pesio ni eri ma kiolake, “Me matu meomeo kamela! Maba kutumana kamu mebeta eva meko bulo poso kale, ni puliama ka taku kale inio meqai zaria viqo vo Baṉara ko bazubazu! Meta omadeuvo meko taite poso jari meda kava, ako meta se jari kiada keru me bikoirivani mela vo Tabu ala Auvana!

⁵² Sea lulavo ama poropita madu ta maba sea kiadamu ti ke toraeke ko niumaniumato meko taite poso kasi, ni se Baṉara ko bazu ke kati kuevini maba madu ta ke vouvaeme, seke kasekeni lulavo vovo sidopu ala Nabulu ko kilo. Ni erisaṉa meta lula me jaiqoriva vo ni me vouvaeva vo.

⁵³ Me inio vo Baṉara ko bazu me qoeni mela, koko vikima me tona mateana madu kale kude— melai meta pui me zorika ko!” kiolake.

Sitiveni ko taivo lado kale

⁵⁴ Ni so keru se Kauniseli kale amu keta va viqa keru vo Sitiveni ko pesio inio seta keta matu iqaike ni keta nanaburitake vai korakorailole vo.

⁵⁵ Melai Sitiveni, vo ovai sukatani vo Tabu ala Auvana, ta o tadatake aukale ni o keake vo Baṉara ko ṉaṉaidara ni Jisu vo obeta lojoani Baṉara ko palo rana vasi.

⁵⁶ Nio eri kiolake, “Keatini! Ko au ta kota veukaziola ni vo maba o eveni Jisu ta obeta lojoa Baṉara ko palo rana vasi!” kiolake.

⁵⁷ Nio se Kauniseli ko maba poso ta ke matu upaupatake ni ke sutamukake seko taliṉa seko ṉase kale. Ni sea kiadamu ta kevai rerikiniake vo,

⁵⁸ ni ke rajaevake peuru kupekupe ni ke taivake vo lado kale. Se lipalipato bazu ke erekeni ta ke vaekake seko sabosabo poso Saula va kikelani maba ko vailo kale seko taivo maqa vo Sitiveni.

⁵⁹ Ni se kebeta ola keru taivo vo Sitiveni vota matuma kora kale ovai petaoke vo Lekasa ni eri kiolake, “Lekasa Jisu, tala koa aṉako auvana!” kiolake.

⁶⁰ Nio vota o iqeiqeake ni matuma kora sama pesio o erekake ni eri kiolake, “Lekasa! Ṉota pui tama kerukerueko komia sarueko tu ṉota ṉomai besiekou ko!” Vota so kiolake ni ota vouvake.