Iruruputo 6 - BAṈARA KO VAIRU AMA LEVELEVEO

Sikeura tauvezato ko maba poso

¹ Ni kama taku poso ko tova, inio seke tuvevo putani ta kubo keta evake, koa taku inio se Jiu amu Quriki pesio mu seke tuvevo putani ni se Jiu amu ke ṉaviko Jiu ama pesio mu seke tuvevo putani ta keta aivekiniake ke ṉavio kude. Se Quriki pesio ama Jiu amu ta keta tirazake ako seko naboko poso ta lula ukaka kemai ika Jiu pesio mu ṉaniu poso kale ke puarikake sailao ma seleni seke koako sole.

² So sole sea toni omuqa apositolo madu ta ke padoemake sea kiadamu ke tuvevo putani, ni eri kikelake, “Kota pui sidopu tu eṉeta ṉe vaeko kai bazubazuto vo Baṉara ko bazubazu tu riteraite ṉeqai elo ko sailao ni seleni.

³ So sole lolo poso meta pitoemomo sikeura maba madu me ṉavi kasi amu, se me memai nianiiani komai sukato amu vo Tabu ala Auvana ni Baṉara ko nianiio, ni eṉeta ṉe qatimou se koa iruruputo.

⁴ Ni ṉe ṉavi eṉeta ṉe vararaitou ni ṉeqai nianiiekatou vo Baṉara ko bazubazu eṉeko pado ama taku kale.”

⁵ Nio koa pado ama poqala kale ama maba poso ta keka zoleike se apositolo madu ko kerukeru, so sole seta ke pitoevake vo Sitiveni, vo Tabu ala Auvana ovai sukatani ni piza kama oqu sala maba, ni Pilipi, Porokorasi, Nikano, Timoni, Pamenasi, ni Nikolasi kala pui Jiu ala, Anitioko ala Jiu lotu o luluekeni puliako tuvevo puevo vo Jisu.

⁶ Nio koa poqala maba madu ta ke lojoemake se apositolo madu ko kuleto, ni se apositolo madu ta ke mati vararaitake se ni kemai ivikake seko ṉase ke lezu topi ni mauru ke imake se.

⁷ Nio vo Baṉara ko bazubazu ta kobeta olake pailailo. Ni seke tuvevo putani ko ataataiti Jerusalema ke eveni ta matu kubo kota evake, ni matu kubo siama madu ta ke tuvevo putake koa taku.

Sitiveni ko noqoevo

⁸ Nio voa Sitiveni, vo Tabu ala Auvana ko pizato kovai sukatani ni Baṉara ko mauruto sala maba, ta o erekake matu piza kama ni aqasiele ama iruruputo maba poso kasi.

⁹ Melai kake Jiu amu “Ruparupasi amu ko ilusato ko pade” ka kikelako poqala kale amu ta pui keka zariake tu vo Sitiveni ta ovai bazuto vo Jisu. Seta Sairini ni Alekezadaria azo ke kuevini Jiu amu. Ni se ni mata Silisia rana ni Eisia ranʼazo ke kuevini Jiu amu ta ke tanitake vati zolizoliekinio vo Sitiveni.

¹⁰ Melai vo Tabu ala Auvana ta o kativake ko nianiio vo Sitiveni so keru vo o pesi keru, so sole seta pui ke roveake tava pazoko voko pesio.

¹¹ So sole seta zuzuku ke imake kake maba poso tu seta ke kaseko ko eri kio, “Eṉeta ṉe viqala vo o pesila keru vota o zaraevala vo Mosese ni Baṉara!” kikevo tu kikelake. Nio seta so kikelake.

¹² Koa kalo kale inio seta ke korakoraemake se maba poso, se lotu lekasa poso ni Mosese ko Bazu kekai nianiiekatani. So sole seta ke olake ni ke saputivake vo Sitiveni ni ke vati olake Kauniseli ko kuleto.

¹³ Nio seta ke mati kuevake kake maba poso ni seta keva lipalipatake vo ni eri kikelake, “Nea maba ta kiada keru ta ruqe kaseko o eva ko animeko tabu ama Jelepade ni vo Mosese ko Bazu.

¹⁴ Eṉeta ṉeda va viqala ta voa Nazareti ala Jisu ta o biresukou ko Jelepade ni vota o besiekou kiadama animeko bazu poso koko vikima anime tona Mosese kasi azo!” kikelake.

¹⁵ Nio sea kiadamu seke papuani koa pesipesito kale ta ke toiritoirivake vo Sitiveni ni keta va keake voko loilo ta mateana ko loilo jaria simanamanato kota va evake.