Iruruputo 3 - BAṈARA KO VAIRU AMA LEVELEVEO

Lepu ala maba ko urikivo

¹ Ni omadeu ṉaniu kale inio Pita ni Jone ta qo olake Jelepade zouke koloko keru raisiraisi, koa taku ta vararaito ko taku sole.

² Nio koa Matu Ileile ama Veutu ka kikelako veutu tona, ta obeta papuake kala raiqo ala maba soa alilo o eveni ni vota soa saevo o eveni. Kiadama ṉaniu seta ke borivake ni ke vati olake koa veutu kasi ni ke papuevake sai tu vota o pasepaseto ko seleni sea maba poso kasi seke olani koa Jelepade kale.

³ Nio so keru vo o kea keru nioqa Pita ni Jone ko amaqeo koa Jelepade kale vota okai pasetake nioqa tu nioqata qo kativo vo kama quli kiolake.

⁴ Melai nioqata qo toiritoirivake vo ni Pita ta eri va kiolake, “Toiritoiriqela eqe!”

⁵ So sole vota o toiritoirikake nioqa, esa nioqata qo kativou kama quli kiolake sole.

⁶ Melai Pita ta eri kiolake vokasi, “Aṉata puliama siliva ni qolo seleni salala, melai aṉata ikoana ka pado quli salala ni ko quli kio a qatiṉou ṉo. Sole vo Nazareti ala Jisu ko ṉikale aṉata a bazueṉa ṉo tu ṉota loje ni tali!” va kiolake.

⁷ Ni vota ota va noqoekake voko palo ṉase ni o lojoevake vo. Nio maba koa taku kale inio voa maba ko omuqa kiti ni voko omuqa vaquvaqu ta kota va pizatake,

⁸ ti obeta sokaoke inio ti ota lojoake, ni ota tanitake lebalebaito. Nio vota ota amaqeake nioqa sase Jelepade kale sokasokaitole ni o ilusivake vo Baṉara.

⁹ Nio sea maba madu sai ke evani ta ke veake voko talio sai ni voko ilusivo vo Baṉara,

¹⁰ nio ke nianiievake vo ta vo inio voa pasepaseto ko maba o papuani koa Matu Ileile ama Veutu tona, ni seta matu aqasiele kekai evake koko ereivako quli vo tona.

Pita ko bazubazu Jelepade kale ama

¹¹ Ni so keru voa maba obe noqoeka keru Pita ni Jone Solomone ko Sebesebe ka kikelako kale, nio sai zama maba poso ta keta vuzeike ni kemai rerikiniake se.

¹² Nio Pita ta o meake sea maba poso, ni eri ma kiolake, “Me Izireli amu mela, noi sole inio meta aqasiele meqai eva komi quli, ni noi sole inio meta me doiritoiriqela eqe? Me qerukeruta ta qe ṉavi eqeko pizato ni tabu kale inio eqeta qe taliekiva nea maba kimela kio?

¹³ Pui so inio, melai vo Ebarahami, ni Aisake, ni Jekopi vo Baṉara, vo animeko taite poso vo Baṉara, nio o erekani komi quli tu se maba poso ta ṉaṉaidara ke ivou vovo Nabulu Jisu. Melai meta me vaevake vo se Jiu ama tanatanamu ko ṉase topi, ni meta mevai kedui vo Paelati ko tanama kale, so keru vo Paelati ova zariovi tu o rupasivo vo va kiove keru.

¹⁴ Vo inio vo Tabu ala ni Sidopu ala, melai meta mevai kaikuape vo, ni meta mevai titiovi vo Paelati ni me baseve voa maba vo vouvato ko maba ta o rupasio ni vota o besievo.

¹⁵ Ni meta me vouvaeve vo vo tuvevo ama saevo kale o odikatani, melai vo Baṉara ta o saevive vo voukale azo, ni eqeta qe veake vo voko tova saevo kale.

¹⁶ Voko ṉi ko pizato kai oqu ikio nea lepu ala maba ko pizativake, vo nei meme veani ni mevai uria nianiiani. Voko vai oqu vo Jisu ikio ko urikivalama, vo me roveani velo mea kiada mela.

¹⁷ “Lolo poso, aṉata aqai nianiia ta me ni meko vilua pikopiko poso me erekema quli vo Jisu kasi ta meko pui paqumuvo vo kale inio.

¹⁸ Melai vo Baṉara ta lula o pidokike se poropita madu kale kude ta vo o soroevo ala Pakio ta o tolailou; ni kota tuvevo ko evake vokale.

¹⁹ So sole meta liliziomo vo Baṉara kasi nio vota ota mela akoekou meko sarueko poso.

²⁰ So me qalou nio, ko taku poso ta ko kilou, so keru vo Baṉara aukozo o mela ikou keru meko auvana poso, nio vota o soroevou vo Jisu, voa Pakio vo lula o pitoeveni tu me kaqe.

²¹ Vota obeta elou aukale ti kobeta barolou kiadama quli vaini ko elou keru omadeuvo vo Baṉara kiovevo jari voko tabu ama poropita madu kasi se lulavo ke eveni.

²² Ako Mosese ta eri kiove sole, ‘Vo Baṉara mevo Lekasa ta o soroevou kala Poropita mekasi, omadeuvo vo aṉa o soroele jari, ni vota kala pado me ṉavi kale ala inio. Meta tava zorikomo kiadama quli vo o kaseko ama ni erekomo.

²³ Vo pui o zorivo ala voa Poropita ta o pitasiovou Baṉara ko maba madu kasi azo ni vota o niumailou!’ kiove.

²⁴ “Kiadama poropita madu seke bazubazuteni, Samuela ni se voko tova ke eveni ta ke kaseke so keru komia taku kale ko ereivako quli.

²⁵ Vo Baṉara o inainaekema quli o kasekema se poropita madu kale kude ta me kaqe, ni koa korokoroti vo Baṉara o erekema meko taite poso kasi ta meko leveleveo, ko eri ka kiovema Ebarahami kasi, ‘Noko vikuvikula kale aṉata mauru a imou kiadama toutou poso peuru ma peuru kale amu.’

²⁶ So inio vo Baṉara ta o pitoeve vovo Nabulu ni vota o soroeve kuleto mekasi tu mauru o imelo me tu meta me liliziovou kiadama meko ruqe ama iruruputo kale azo,” kiolake vo Pita.